ރާއްޖެޓީވީގެ އަބުރުފުޅު ފަންޑަށް އެހީވުމަށް ޚާއްސަ ހަރަކާތްތަކެއް ކުރިއަށް ގެންދަނީ
23 އޯގަސްޓު 2018 | ބުރާސްފަތި 19:58ރާއްޖެޓީވީގެ ޓީޝާޓު ވިއްކުމުގެ އިތުރުން އަބުރުފުޅު ފަންޑު ފޮއްޓަށް ފައިސާ ހޯދުމުގެ މަސައްކަތް މާލޭގެ ތިން ސަރަހައްދެއްގައި ކުރިއަށްދާނެ
ޒުވާނުންގެ މިޓީމްގައި އިސްކޮށް ހަރަކާތްތެރިވާ ހަތަރު މެންބަރުން: ފޮޓޯ: ރާއްޖެއެމްވީ
ބްރޯޑްކާސްޓިން ކޮމިޝަނުން ރާއްޖެޓީވީ ދެމިލިއަން ރުފިޔާއިން ޖޫރިމަނާ ކުރުމާއި ގުޅިގެން އެފައިސާ ދެއްކުމަށް އެހީތެރިވެދިނުމަށް ޒުވާނުންގެ ޓީމަކުން ޚާއްސަ ހަރަކާތްތަކެއް ކުރިއަށް ގެންދަން ނިންމައިފިއެވެ.
މިޒުވާނުންގެ ޓީމުގައި އިސްކޮށް ހަރަކާތްތެރިވާ ހަތަރު މެމްބަރުން ބުރާސްފަތި ދުވަހުގެ ރޭ ރާއްޖެޓީވީގެ އަބުރުފުޅު ފަންޑުފޮއްޓަށް ފައިސާ ވަނީ ހަދިޔާކޮށްފައެވެ.
މިޓީމްގައި ހިމެނޭ ހަމިއްޔާ އަލީ ބުނީ ރާއްޖެޓީވީއަށް އެހީވުމަށް ހިންގާ ހަރަކާތްތަކުގެ ދަށުން ފުރަތަމަ ހަރަކާތް ހުކުރު ދުވަހުގެ ހަވީރު 4:00 އިން 6:00 އަށް ކުރިއަށް ގެންދާނެ ކަމަށެވެ. ރާއްޖެޓީވީގެ ޓީޝާޓު ވިއްކުމުގެ އިތުރުން އަބުރުފުޅު ފަންޑު ފޮއްޓަށް ފައިސާ ހޯދުމުގެ މަސައްކަތް މާލޭގެ ތިން ސަރަހައްދެއްގައި ކުރިއަށްދާނެ ކަމަށް ހަމިއްޔާ ބުންޏެވެ. އޭނަ ބުނީ މާރުކޭޓް ސަރައްހަދާއި، ހުޅުމާލެ އަދި ވިލިމާލެ ޓާމިނަލް ސަރަހައްދުގައި މިހަރަކާތްތައް ކުރިއަށްދާނެ ކަމަށެވެ.
"ރާއްޖެޓީވީ ހުއްޓިގެންދާކަށް އަޅުގަނޑުމެން ބޭނުމެއް ނުވޭ . މިނިވަން ނޫސްވެރިކަމެއް ކުރުމުގެ ފުރުސަތު ދިނުމަށް ސަރުކާރަށް ގޮވާލަން" ހަމިއްޔާ ބުންޏެވެ.
ޒުވާނުންގެ މިޓީމްގައި ހިމެނޭ ޝަޒައިލް ޝިޔާމް ބުނީ މީޑިއާ އަކީ ޑިމޮކްރަސީގެ އެއްބާރުކަމަށްވާއިރު މިނިވަން ނޫސްވެރިކަމަށް މަސައްކަތް ކުރާ މީޑިއާދެވޭ ހަމަލާއަކީ ދިވެހި ހުރިހާ ރައްޔިތުންނަށް ދެވޭ އަނިޔާއެއް ކަމަށެވެ.
މިއަދުގެ ސަރުކާރުން ބޭނުންވަނީ އެންމެ މީޑިއާއެއް ބޭއްވުމަށްފަހު އެހެން މީޑިއާތައް ފުޑާލަން ކަމަށާއި، ނަމަވެސް އެކަން ކުރުމުގެ ފުރުސަތު ޒުވާނުން ނުދޭނެ ކަމަށް އޭނަ ބުންޏެވެ
"ރާއްޖެޓީވީ ޖޫރިމަނާކުރި ކުރުމަކީ އަޅުގަނޑުމެން ބަލައިގަންނާނެ ކަމެއް ނޫން. ބްރޯޑްކާސްޓިން ކޮމިޝަނުން ވަކިކޮޅަކަށް ބުރަވެ ރައީސް ޔާމިން ބޭނުންވާ ގޮތަށް އެނިންމުންތައް ނިންމަމުން އެދަނީ. އެހެން ނަމަވެސް ރާއްޖެޓީވީން އެދަނީ ވަރަށް މިނިވަންކަމާއެކު ޚަބަރުތައް ފެތުރުމަށް މަސައްކަތް ކުރަނީ. އެޒިންމާ ވަރަށް ފުރިހަމައަށް އެބަ ނަގާ" ޝަޒައިލް ބުންޏެވެ.
ޝަޒައިން ބުނީ ރާއްޖެޓީވީގެ އަބުރުފުޅު ފަންޑު ފޮއްޓަށް އެހީވުމަށް ގިނަ އަދަދެއްގެ ޒުވާނުން މަސައްކަތް ކުރާ ކަމަށެވެ.
އެގޮތުން މާލޭގައި ހުކުރު ދުވަހު ބޭއްވޭ މިހަރަކާތުގެ އިތުރުން އަތޮޅުތެރޭގެ ރަށްރަށުގައި ވެސް ޒުވާނުން އިސްވެ ތިބެ އަބުރުފުޅު ފަންޑަށް އެހީވުމަށް އެކިހަރަކާތްތައް ކުރިއަށް ގެންދާނެ ކަމަށެވެ.
