ރައީސް މައުމޫން ހުންނެވި ތަނެއް ވަކީލުންނަށް ކަށަވަރެއް ނޫން
ކަރެކްޝަނަލް ސަރވިސަސްއިން ރައީސް މައުމޫން މާލެއަށް ގެންނަނީ
ކުރީގެ ރައީސް މައުމޫން އަބްދުލްޤައްޔޫމް މާފުށީ ޖަލުން ދޫނިދޫ ޖަލަށް ބުރާސްފަތި ދުވަހު ބަދަލުކުރުމަށްފަހު، ފުލުހުން އެމަނިކުފާނުގެ ބޭސްތައް އަތުލާފައިވާކަމަށް އެމަނިކުފާނުގެ ޤާނޫނީ ވަކީލު އަލްއުސްތާޛް ހުސައިން ޝަމީމް ވިދާޅުވެއްޖެއެވެ.
ކުރީގެ ޑެޕިއުޓީ ޕްރޮސިކިއުޓަރ ޖެނެރަލްކަންވެސް ކުރައްވާފައިވާ ޝަމީމް ވިދާޅުވީ ރައީސް މައުމޫން ދޫނިދޫ ޖަލަށް ބަދަލުކުރުމަށްފަހު ފުލުހުން އެމަނިކުފާނުގެ ދަބަސްކޮޅުން އެބޭސްތައް ނަގާފައިވާކަމަށެވެ. އަދި ބުރާސްފަތި ދުވަހުގެރޭ ބޭސް ފަރިއްކުޅުއްވަން ބެއްލެވިއިރު ބޭސްތައް ނެތްކަމަށް ޝަމީމް ވިދާޅުވިއެވެ. ރައީސް މައުމޫންގެ ބޭސްތައް ފުލުހުން ނެގީ އެމަނިކުފާނަށް ނޭނގިކަމަށްވެސް ޝަމީމް ވިދާޅުވިއެވެ.
މީގެ އިތުރުން ޝަމީމް ވިދާޅުވީ ރައީސް މައުމޫނާއި ބައްދަލުކުރުމަށް ކަރެކްޝަނަލް ސަރވިސަސްއަށް ފޯމު ހުށަހެޅުމުން އެމަނިކުފާނު ހުންނެވީ ފުލުހުންގެ ބެލުމުގެ ދަށުގައިކަމަށް އެތަނުން ބުނިކަމަށެވެ. އެހެންނަމެސް ބައްދަލުވުން ހަމަޖައްސައިދިނުމަށް ފުލުހުންގެ ކިބައިން އެދުމުން، ރައީސް މައުމޫން ހުންނެވީ ކަރެކްޝަނަލް ސަރވިސަސްގެ ބެލުމުގެ ދަށުގައިކަމަށް ފުލުހުން ބުނިކަމަށްވެސް ޝަމީމް ވިދާޅުވިއެވެ. އެހެންކަމުން ރައީސް މައުމޫން ހުންނެވީ ސީދާ ކޮން ތަނެއްގައިކަމެއް އެމަނިކުފާނުގެ ޤާނޫނީ ވަކީލުންނަށް އެނގިވަޑައިނުގަންނާކަމަށް ވިދާޅުވެ، ކަރެކްޝަނަލް ސަރވިސަސްއިން ރައީސް މައުމޫން 'ވަގަށް ނަގާފައިވާ' ކަމަށް ޝަމީމް ސިފަކުރެއްވިއެވެ.
ކަރެކްޝަނަލް ސަރވިސްއިން ބުނީ ރައީސް މައުމޫނު ދޫނިދޫ ޖަލަށް ބަދަލު ކޮށްފައިވަނީ ޖަލުތަކާއި ޕެރޯލް ޤާނޫނުގެ ދަށުން ޚާއްސަ ހާލަތެއްގައި ކަމަށެވެ. ރައީސް މައުމޫން ދޫނިދޫ ޖަލަށް ބަދަލުކުރެވިފައިވަނީ އެމަނިކުފާނުގެ ސިއްހީ ޙާލަތު އިންތިހާއަށް ގޯސްވުމާއި ގުޅިގެން މާލެއިން ޑޮކްޓަރުން މާފުއްޓަށް ގެންގޮސް އެމަނިކުފާނަށް ފަރުވާ ދީފައިވަނިކޮށެވެ.
