އިންތިޚާބުގެ ކުރިންވެސް ދަތިކުރުމުގެ ފިޔަވަޅު އަޅާފާނެ: އީޔޫ ޕާލަމެންޓް މެމްބަރުން
23 އޯގަސްޓު 2018 | ބުރާސްފަތި 12:18މިހާރުވެސް އިންތިޚާބު އޮތީ އޮޅުވާލާފައި
ޔޫރަޕިއަން ޕާލަމެންޓްގެ މެމްބަރު ތޮމާސް ޒެކޮވްސްކީ
ޙާލަތު ގޯސްވާނަމަ ރިޔާސީ އިންތިޚާބުގެ ކުރިންވެސް ރައީސް ޔާމީނާއި ގާތް ފަރާތްތަކާއި، އިންތިޚާބުގެ މިނިވަންކަން ނަގާލާ ފަރާތްތަކާއި ދެކޮޅަށް ދަތިކުރުމުގެ ފިޔަވަޅު އަޅައިފާނެކަމަށް ވިލާތުގެ އިއްތިޙާދުގެ ޤާނޫނު ހަދާ މަޖިލިސް (އީޔޫ ޕާލަމެންޓް) ގެ މެމްބަރުންނާއި ވިލާތުގެ އިއްތިޙާދުގެ އެހެން ބައެއް އިސްވެރިން ވިދާޅުވެއްޖެއެވެ.
ރާއްޖެ ޓީވީ އާއި އެހެން ބައެއް މީޑިއާތަކުގެ ނޫސްވެރިންނާއި ފޯނުން ވާހަކަ ދައްކަވަމުން ވިލާތުގެ އިއްތިޙާދުގެ އިޤްތިޞާދީ އަދި އިޖްތިމާޢީ ކޮމިޓީ (އީ.އީ.އެސް.ސީ)ގެ މެމްބަރު މަޑީޝަރްމާ ވިދާޅުވީ ރިޔާސީ އިންތިޚާބުގެ މާކުރިން މިހާރުވެސް އިންތިޚާބު އޮތީ އޮޅުވާލާފައި ކަމަށެވެ. މަޑީ ޝަރްމާއަކީ މިމަހުގެ މެދުތެރޭ ރާއްޖޭގެ ޙާލަތު ވަޒަންކުރެއްވުމަށް ރާއްޖެއަށް ވަޑައިގެންނެވި އީޔޫގެ އިސްބޭފުޅުންގެ ތެރެއިން ބޭފުޅެކެވެ. އެކަމަނާ ވިދާޅުވީ އިންތިޚާބުގެ ކުރިން ހިނގަމުންދާ ކަންކަމާއިމެދު އީޔޫ ޕާލަމެންޓުން ކަންބޮޑުވާކަމަށާއި، އިންތިޚާބުގެ އިންސާފުވެރިކަން ގެއްލޭ ގޮތަށް ހިނގާފައިވާ ކަންކަމާއިމެދު ކަންބޮޑުވާކަމަށެވެ.
އަދި އިންތިޚާބުގެ ކުރިންވެސް ޙާލަތު ގޯސްވާނަމަ ވިލާތުގެ އިއްތިހާދުން ރާއްޖޭގެ އިސް ފަރާތްތަކާއި ދެކޮޅަށް ޓާގެޓެޑް ސެންކްޝަންސް އަޅާފާނެކަމުގެ އިންޒާރު އެކަމަނާ ދެއްވިއެވެ. ޝަރްމާ ވިދާޅުވީ އިންތިޚާބުގެ ކުރިން ފިޔަވަޅު ނޭޅިނަމަވެސް، އިންތިޚާބުގައި ނަހަމަ ކަންތައްތަކެއް ހިންގައިފިނަމަ ފިޔަވަޅުތައް އަޅަން ޔޫރަޕިއަން ކައުންސިލުން ނިންމާނެކަމަށެވެ.
މީގެ އިތުރުން ވިލާތުގެ އިއްތިޙާދުގެ އިޤްތިޞާދީ އަދި އިޖްތިމާޢީ ކޮމިޓީ (އީ.އީ.އެސް.ސީ)ގެ ކުރީގެ ރައީސް ހެންރީ މަލޯސީ ވިދާޅުވީ އެބޭފުޅުން ރާއްޖެއަށް ވަޑައިގެންނެވީ ރަސްމީ ދަތުރުފުޅެއްގައި ނޫންކަމަށާއި، ރާއްޖެއަށް ވަޑައިގަތީ އަމިއްލަ ހައިސިއްޔަތުންކަމަށެވެ. އަދި ދަތުރަށްފަހު އެބޭފުޅުން ދެއްކެވި ވާހަކަފުޅާއި ވިލާތުގެ އިއްތިޙާދުގެ ޚާރިޖީ ފިިޔަވަޅުތަކާއި ބެހޭ އޮފީސް (އީ.އީ.އެސް.އޭ) އިން ނެރުނު ބަޔާނުގައި ހުރި ވާހަކަތަކާއި މާބޮޑު ތަފާތެއް ނެތްކަމަށެވެ. މަލޯސީ ވިދާޅުވީ ރާއްޖެއަށް ވަޑައިގެން ބެއްލެވި ބެއްލެވުމުން ރާއްޖޭގެ ޙާލަތު ކުރިން ލަފާކުރެވުނު މިންވަރަށް ވުރެ ގޯސްކަން ފާހަގަކުރެއްވުނުކަމަށެވެ.
މީގެ އިތުރުން ދަތުރުފުޅަށްފަހު ދެއްކެވި ވާހަކަތަކަށްފަހު ސޯޝަލް މީޑިއާ މެދުވެރިކޮށް އިންޒާރު އެކިއެކި މެސެޖްތައް ލިބިވަޑައިގެންނެވިކަން މަލޯސީ ފާހަގަކުރެއްވިއެވެ.
ރާއްޖެ ޓީވީއިން ދެންނެވި ސުވާލަކަށް ޖަވާބު ދެއްވަމުން ޔޫރަޕިއަން ޕާލަމެންޓްގެ މެމްބަރު ތޮމާސް ޒެކޮވްސްކީ ވިދާޅުވީ ވިލާތުގެ އިއްތިޙާދުން ފިޔަވަޅު އަޅާނެ މީހުންގެ ލިސްޓެއް ތައްޔާރުކޮށްފައިވާކަމަށެވެ. ފިޔަވަޅު އެޅުމާއި ބެހޭ އޮނިގަނޑެއް އެކުލަވާލާއިރު، އެއޮނިގަނޑުގެ ދަށުން ފިޔަވަޅު އަޅާނެ ބަޔަކު ކަނޑައަޅާފައިވާނެކަމަށް ވިސްނާލުމުން އެނގޭނެކަމަށް އޭނާ ފާހަގަކުރެއްވިއެވެ.
ވިލާތުގެ އިއްތިޙާދުން ދިވެހި ސަރުކާރުގެ އިސްވެރިންނާއި، ސަރުކާރަށް ވާގިވެރިވާ ފަރާތްތަކާއި ދެކޮޅަށް ދަތިކުރުމުގެ ފިޔަވަޅު އެޅުމަށް ނިންމާފައިވާ އޮނިގަނޑުގެ އެނެކްސްއަށް ނަމެއް އިތުރުކޮށްފައި ނުވާކަމަށް އީޔޫ އިން ވަނީ ރަސްމީކޮށް ބުނެފައެވެ. ޑިޕޮލޮމެޓިކް ބަހުރުވައިން ނެރުނު ބަޔާނުގައި އީޔޫއިން ދައްކާފައިވާ ވާހަކަތަކަކީ ރަނގަޅު ވާހަކަތަކެއްކަމަށާއި، ލިސްޓަށް ބައެއްގެ ނަންތައް އިތުރުކޮށްފައިވާކަމަށް ބުނެފައި ނުވާނެކަމަށް އީޔޫ ޕާލަމެންޓް މެމްބަރުން ފާހަގަކުރައްވައެވެ.
ޑިޕްލޮމެޓުން ފާހަގަކުރައްވާ ގޮތުގައި ފިޔަވަޅު އަޅާ ލިސްޓަށް އިތުރުކުރާނެ މީހުންގެ ނުރަސްމީ ލިސްޓެއް ވިލާތުގެ އިއްތިޙާދުން ގެންގުޅޭނެއެވެ. އަދި އީޔޫ ޕާލަމެންޓްގެ ނުފޫޒު ގަދަ މެމްބަރުންނާއި ސަރުކާރުގެ އިސް ފަރާތްތަކާއި ދެކޮޅަށް ފިޔަވަޅު އެޅުމަށް ގޮވާލި ޤަރާރު އީޔޫ ޕާލަމެންޓުން މިދިޔަ ޖުލައި މަހުގެ 16 ވަނަ ދުވަހު ފާސްކުރުމަށް މަސައްކަތްކުރި މެމްބަރުންނަށް އެފަދަ ނުރަސްމީ ލިސްޓެއް ފެނިފައި އޮތުމުގެ ފުރުސަތު ބޮޑުކަމަށް ޑިޕްލޮމެޓުން ފާހަގަކުރައްވައެވެ.
އަނެއްކޮޅުން ދިވެހި ސަރުކާރުން ގެންދަނީ އީޔޫގެ ރަސްމީ ބަޔާންތަކުގައި ބޭނުންކޮށްފައި ހުރި ޑިޕްލޮމެޓިކް ބަހުރުވައިގެ ފައިދާ ނަގައި، ފިޔަވަޅު ނާޅާނެކަމަށް ބުނަމުންނެވެ.
