އިބޫ އާއި ފައިސަލްގެ ކެމްޕެއިން ބެނަރ ހަރުކުރަން ތިބި 3 މީހުން ހައްޔަރުކޮށްފި!
22 އޯގަސްޓު 2018 | ބުދަ 03:38އިދިކޮޅު ފަރާތްތަކަށް މިނިވަންކަމާއިއެކު ކެމްޕެއިން ކުރަން ފުރުސަތެއް ނެތް
ފުލުހުން ގޮސް އިދިކޮޅު ފަރާތްތަކުގެ ކެމްޕެއިން ބެނަރތައް ނަގަނީ
އިދިކޮޅު ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) އާއި އެމަނިކުފާނުގެ ރަނިންގމޭޓް ފައިސަލް ނަސީމްގެ ކެމްޕެއިން ބެނަރތައް ހަރުކުރަން އުޅުނު 3 މީހަކު ފުލުހުން ހައްޔަރުކޮށްފިއެވެ.
އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނީ ބެނަރތައް ހަރުކުރަނިކޮށް 3 މީހުން ހައްޔަރުކުރީ މާލޭ އަމީނީމަގުން ކަމަށެވެ. އެ 3 މީހުންވެސް ވަނީ ފަހުން ދޫކޮށްލާފައެވެ. މީގެ އިތުރުން ހެންވޭރު ދަނޑު ސަރަހައްދުގައި ހަރުކޮށްފައިވާ އިިދިކޮޅު ކެންޑިޑޭޓާއި ރަނިންގމޭޓްގެ ކެމްޕެއިން ބެނަރތަކެއްވެސް ފުލުހުން ގޮސް ބިދޭސީންތަކެއް ލައްވާ ނަގާފައިވެއެވެ. އަދި އަންގާރަ ދުވަހުގެ ހަވީރު މާލޭގެ މަޖީދީމަގުގައި ހުންނަ ގެއެއްގެ މަތީގައި ނަގާފައި ހުރި ޖުމްހޫރީ ޕާޓީގެ ބޮޑު ދިދައެއްވެސް ކޯޓު އަމުރެއް ނުވަތަ އެހެން ލިޔުމެއް ނުދައްކައި، ފުލުހުން ވަދެ ވަނީ ތިރިކޮށްފައެވެ. އެދިދަ ނަގާފައިވަނީ ހޯމް މިނިސްޓްރީއިން ހަދާފައިވާ ޤަވާޢިދާއި އެއްގޮތަށް، ޖުމްހޫރީ މައިދާނުގައި ނަގާފައިވާ ޤައުމީ ދިދައަށްވުރެ އުސް ނުވާ ގޮތަށެވެ.
ފުލުހުން ގޮސް ޖުމްހޫރީ ޕާޓީގެ ދިދަ ބޭލިތަން ކަވަރުކުރުމަށް ޙަރަކާތްތެރިވި ރާއްޖެޓީވީގެ ކެމެރާމަނަކުވެސް ފުލުހުން އެތަނުން ހައްޔަރުކޮށް، ފަހުން ދޫކޮށްލިއެވެ.
ހޯމަ ދުވަހުގެރޭ ހުޅުމާލޭގައިވެސް ބެނަރ ހަރުކުރަން އިދިކޮޅު ޕާޓީތަކުގެ މެމްބަރުން ހަރަކާތްތެރިވަމުން ދަނިކޮށް ފުލުހުންނާއި ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)ގެ މުވައްޒަފުން ވަނީ ގޮސް ހުއްޓުވާފައެވެ.
