ރައީސް މައުމޫނުގެ ހާލުކޮޅު އިތުރަށް ބޮޑުވެ މާލޭން ޑޮކްޓަރުން ގެންގޮސްފި!
21 އޯގަސްޓު 2018 | އަންގާރަ 07:51ހާލުކޮޅު ގޯސްކަން އެނގުނީ ވަކީލުންގެ ބައްދަލުވުން ކެންސަލް ކުރުމުން
ރައީސް މައުމޫން ގުޅިފައިވާ ސިޔާސީ ޕާޓީތަކުގެ ލީޑަރުންނާއި އެކު
އަދުލު އިންސާފަށް ހުރަސްއެޅި ކަމަށް ބުނެ ދައުލަތުން އުފުލި ދައުވާ ސާބިތުވުމާ ގުޅިގެން ޖަލުހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް މައުމޫން އަބްދުލްޤައްޔޫމްގެ ހާލުކޮޅު އިތުރަށް ގޯސްވެ، އެމަނިކުފާނަށް ފަރުވާ ދިނުމަށް މާލެއިން މާފުށީ ޖަލަށް ޑޮކްޓަރުން ގެންގޮސްފިއެވެ.
ރައީސް މައުމޫންގެ އިސްލާހީ މަސައްކަތުގައި އިސްކޮށް އުޅުއްވާ ބޭފުޅަކު ރާއްޖެއެމްވީއަށް ވިދާޅުވީ ރައީސް މައުމޫނުގެ ސިއްހީ ހާލުކޮޅު އިތުރަށް ސީރިއަސްވެފައިވާތޯ މާލެ ގެންދިޔުމަށް މާފުށީގައި މަސައްކުރާ ޑޮކްޓަރުން ލަފާދީފައިވާ ކަމަށެވެ.
ރައީސް މައުމޫންގެ ހާލުކޮޅު ގޯސްކަން އެނގުނީ އަންގާރަ ދުވަހު (މިއަދު) 10:00 އަށް ހަމަޖެހިފައި އޮތް ވަކީލުންގެ ބައްދަލުވުން ދެވެން ނެތް ކަމަށް ކަރެކްޝަންސް އިން އެންގުމުން އެކަންހިނގި ގޮތް ސާފުކުރަން ކުރެވުނު މަސައްކަތުންނެވެ.
ރައީސް މައުމޫނަށް ފަރުވާ ދިނުމަށް މާލެއިން ޑޮކްޓަރުން ގެންދިޔުމަށް ނިންމީ އެމަނިކުފާނުގެ ހާލުކޮޅު ހުރިގޮތުންނާއި މިހާރު ދިމާވެފައިވާ އާލާސްކަންފުޅުގެ ގޮތުން ދަތުރުފަތުރު ކުރަން އުނދަގޫފުޅު ވުމުންނެވެ.
މައުމޫންގެ އާއިލާއިން ބުނާ ގޮތުގައި، އެމަނިކުފާނަށް ވަނީ ވެއްޓިވަޑައިގަތުމުގެ އާލާސްކަންފުޅަކާ ކުރިމަތިވެފަ އެވެ. އެހެންވެ އެމަނިކުފާނު އެކަހެރިކޮށް ނުހުންނެވުމަށް ވެސް ޑޮކްޓަރުން މީގެކުރިން ލަފާ ދީފައިވެ އެވެ.
ރައީސް މައުމޫން ހައްޔަރުކޮށް، ހުކުމެއް އިއްވާފައިވަނީ ފެބްރުއަރީ އެކެއްގައި ސުޕްރީމް ކޯޓުން ނެރުނު އަމުރާއި ގުޅިގެން ކުއްލި ނުރައްކަލުގެ ހާލަތު އިއުލާންކޮށް ހިންގި ތަހުގީގަކަށްފަހުއެވެ.
އެ އަމުރާ ގުޅިގެން އެމަނިކުފާނަށް ޓެރަރިޒަމްގެ ދައުވާ ވެސް ދައުލަތުން އުފުލާފައިވެ އެވެ. އެ ދައުވާގެ އަޑުއެހުންތައް ކޯޓްގައި ތާވަލްކުރި ނަމަވެސް ވަނީ ކެންސަލްކޮށްފަ އެވެ. އަދި ހާލުކޮޅު ހުރިގޮތުން ރައީސް މައުމޫނުގެ ޝަރީއަތްތައް ޣައިރު ހާޒިރުގައި ކުރިއަށް ގެންދިޔުމަށްވެސް އެމަނިކުފާނު ވަނީ އެދިވަޑައިގެންފައެވެ.
ސިއްހީ ހާލަތު ގޯސްވުމުގެ ސަބަބުން ރައީސް މައުމޫން ގެއަށް ބަދަލުކޮށް ދިނުމަށް އާއިލާއިން ކޯޓާއި ސަރުކާރުގައިވެސް އެދިފައިވެ އެވެ.
މައުމޫންގެ ހާލު ކޮޅާއި ގުޅިގެން ކަރެކްޝަންސްގެ ބަހެއް ލިބޭ ގޮތެއް ވެފައެއްނުވެ އެވެ.
