އިޓަލީގެ ސިޓީއެއް ކަމަށްވާ ޖެނޯއާ ގައި އަންގާރަ ދުވަހު ހިނގި ބްރިޖް ވެއްޓުމުގެ ހާދިސާގައި މަރުވި މީހުންގެ އަދަދު 41 އަށް އަރާފައިވާ ކަމަށް އޮފިޝަލުން ބުނެފިއެވެ.
ރިޕޯޓުތައް ބުނާގޮތުން، ހުކުރު ދުވަހުގެ ރޭ އޮފިޝަލުން ވަނީ އެއް އާއިލާއެއްގެ މަރުވެފައިވާ ތިން މީހެއްގެ ހަށިތައް، ވެއްޓިފައިވާ ބްރިޖުގެ ކުުނިބުނިތަކުގެ ދަށުން ހޯދާފައެވެ.
އަދިވެސް 20 އާއި 30 އާ ދެތެރޭ އަދަދަކަށް މީހުން ގެއްލިފައިވާ ކަމަށް ރިޕޯޓުތައް ބުނެއެވެ.
ހާދިސާ ހިނގިއިރު ނަގާފައިވާ ވީޑިއޯ ފުޓޭޖްތަކުން ފެންނަ ގޮތުގައި ވެއްޓުނު ސަސްޕެންޝަން ބްރިޖް ހިފަހައްޓައިދޭ އެއް ޓަވަރު މޫސުން ގޯސްވުމުގެ ސަބަބުން ވެއްޓޭތަން ފެނެއެވެ. ބްރިޖުން ވެއްޓުނު ބައިތަކާއި އަދި ވެހިކަލްތައް ވެއްޓިފައި ވަނީ ތިރިން ރޭލު ދަތުރުކުރާ ރޭލު ޓްރެކަަށެވެ.
އަންގާރަ ދުވަހު ހިނގި ހާދިސާ އާއި ބެހޭގޮތުން އިޓަލީގެ ޓްރާންސްޕޯޓު މިނިސްޓަރު ޑަނިލޯ ޓޮނިނެލީ ވިދާޅުވީ "ހިނގި ހާދިސާ ހަކީ ވަރަށް ބޮޑު ހާދިސާއެއް ކަމަަށެވެ."
ހާދިސާ އާއި ބެހޭގޮތުން އިޓަލީގެ ޑެޕިއުޓީ ޓްރާންސްޕޯޓު މިނިސްޓަރު އެޑުއާޑޯ ވިދާޅުވެފައި ވަނީ "މުހިއްމު ބްރިޖެއް ވެއްޓުމަކީ ގަބޫލު ކުރެވޭނެ ކަމެއް ނޫން ކަމަށާއި...އެ ބްރިޖް ބިނާކޮށްފައި ވަނީ ވެއްޓުން ފަދަ ހާދިސާއެއް ދިމާވެދާނެފަދަ ކަމަކުން ސަލާމަތްވެވޭނެ ގޮތަކަށް ނޫން" ކަމަށެވެ.
