ކުރީގެ ޕީޖީ މުހުތާޒް މުހުސިން އަދިވެސް ރީ-ރަޖިސްޓްރީކޮށެއް ނުދޭ!
މުހުތާޒް ރީ-ރަޖިސްޓަރކޮށްދިނުމަށް އިލެކްޝަންސް ކޮމިޝަންގައި ވަނީ އެދިވަޑައިގެންފައި
ކުރީގެ ޕްރޮސިކިއުޓަރ ޖެނެރަލް މުހުތާޒް މުހުސިން
ކުރީގެ ޕްރޮސިކއިުޓަރ ޖެނެރަލް މުހުތާޒް މުހުސިން، މާފުށީ ޖަލަށް ވޯޓުލުމަށް ރީ-ރަޖިސްޓްރީކޮށްދީފައިނުވާތީ އާއިލާއިން ކަންބޮޑުވުން ފާޅުކޮށްފި އެވެ.
ޤާނޫނީ ވަކީލް، އަދި މުހުތާޒްގެ އަނބިކަނބަލުން ސާދިޔާ އާދަމް ކުރެއްވި ޓުވީޓެއްގައިި ވިދާޅުވީ ވޯޓުލުމުގެ ހައްޤަކީ ޤާނޫނު އަސާސީން ދިވެހި ކޮންމެ ރައްޔިތަކަށްވެސް ކަށަވަރުކޮށްދީފައިވާ ހައްޤެއް ކަމަށެވެ. ނަމަވެސް ރީ-ރަޖިސްޓްރޭޝަންގެ މުއްދަތު ހަމަވެ، 5 ދުވަސް ފާއިތުވެދިޔައިރުވެސް މުހުތާޒް ރީ-ރަޖިސްޓަރ ކޮށްދީފައިނުވާކަމަށް ސާދިޔާ ވިދާޅުވި އެވެ.
ސާދިޔާ ވަނީ މުހުތާޒް ރީ-ރަޖިސްޓަރ ކޮށްދިނުމަށް އިލެކްޝަންސް ކޮމިޝަންގައި އެދިވަޑައިގެންފަ އެވެ.
ސަރުކާރާއި ހިޔާލު ތަފާތުވުމުގެ ސަބަބުން އެކި ތުހުމަތުތައްކޮށް، ޖަލަށްލާފައިވާ ގިނަ ސިޔާސީ ބޭފުޅުންގެ ރީ-ރަޖިސްޓްރޭޝަންގެ މައްސަލައިގައި އާއިލާތަކުންނާއި ސިޔާސީ ޕާޓީތަކުން ވަނީ ކަންބޮޑުވުން ފާޅުކޮށްފަ އެވެ. އޭގެތެރެއިން ބައެއް ބޭފުޅުން ރީ-ރަޖިސްޓްރީކޮށްދީފައި ވާއިރު، އަދިވެސް ބައެއް ބޭފުޅުން ރީ-ރަޖިސްޓްރީކޮށްދީފައެއް ނުވެ އެވެ.
ޖަލުގައި ތިބޭ ފަރާތްތައް ރީ-ރަޖިސްޓްރީކޮށްދިނުމަކީ ކަރެކްޝަނަލް ސާރވިސްގެ ޒިންމާއެކެވެ.
ޖަލުގައި ތިިބި ފަރާތްތަކުގެ އިތުރުން އާންމު ރައްޔިތުންގެ ވޯޓް ރީ-ރަޖިސްޓްރޭޝަންގައި ބޮޑެތި މައްސަލަތަކެއް އުޅޭކަން އަންނަނީ ހާމަވަމުންނެވެ.
