ރައީސް ޔާމީނަކީ އިގްތިޞާދީ މާހިރެއް ނޫން، އިގްތިޞާދީ 'މަރުމޯލެއް': މަލީހު
ރައީސް ޔާމީނަށް އިތުރު ދައުރެއް ދެއްވައިފިނަމަ ދައުލަތުގެ ދަރަނި 75 ބިލިއަން ރުފިޔާއަށް އަރުވާލާނެ
މުހައްމަދު މަލީހު ޖަމާލު | ޓްވިޓަރ
ސަރުކާރަށް ނިސްބަތްވާ ފަރާތްތަކުން ރައީސް އަބްދުﷲ ޔާމީން އަބްދުލްގައްޔޫމަކީ އިގްތިޞާދީ މާހިރެއް ކަމަށް ބުނަމުންދިޔަ ނަމަވެސް، ދިވެހި ރައްޔިތުންނަށް ބުނަމުން ދަނީ ރައީސް ޔާމީނަކީ އިގްތިޞަދީ "މަރުމޯލެއް" ކަމަށް ރައީސް ޔާމީންގެ ސަރުކާރުުގައި ކުރިން ޔޫތު އެންޑް ސްޕޯޓްސް މިނިސްޓަރުކަން ކުރެއްވި މުހައްމަދު މަލީހު ޖަމާލު ވިދާޅުވެއްޖެ އެވެ.
ގުޅިފައިވާ ސިޔާސީ ޕާޓީތަކުން މ. ކުނޫޒުގައި ބުދަ ދުވަހުގެ ރޭ ބޭއްވި ހާއްސަ ޖަލްސާގައި ވާހަކަ ދައްކަވަމުން ރައީސް ޔާމީންގެ ސަރުކާރުގެ ޔޫތު އެންޑް އިކޮނޮމިކް ކައުންސިލުގެ މެމްބަރެއްގެ ގޮތުގައި ކުރިން އުޅުއްވި މަލީހު ވިދާޅުވީ ރައީސް ޔާމީނަށް އިތުރު ދައުރެއް ވެރިކަން ކުރުމަށް ދެއްވައިފިނަމަ ދައުލަތުގެ ދަރަނި 75 ބިލިއަން ރުފިޔާއަށް އަރުވާލާނެ ކަމަށެވެ. މަލީހު ވިދާޅުވީ ރައީސް ޔާމީން ވެރިކަމަށް ވަޑައިގެންވިއިރު، ދައުލަތުގެ ދަރަނި ދައުލަތުގެ ދަރަނި ހުރީ 19 ބިލިއަން ރުފިޔާގައި ކަމަށާއި އެމަނިކުފާނުގެ ފަސް އަހަރުގެ މި ހިނގާ ދައުރު ނިމޭއިރު ދައުލަތުގެ ދަރަނި 50 ބިލިއަން ރުފިޔާއަށް އަރާނެ ކަމަށެވެ. އަދި އެއީ ދައުލަތުގެ ލިޔެކިޔުންތަކުން ފެންނަހުރި ހަގީގަތް ކަމަށްވެސް މަލީހު ވިދާޅުވި އެވެ.
މީގެ އިތުރުން މަލީހު ވިދާޅުވީ ރައީސް ޔާމީންގެ ވެރިކަމުގައި ރާއްޖޭގެ އެއްވެސް ވިޔަފާރިވެރިއަކަށް ރައްކާތެރިކަން ނެތް ކަމަށާއި އެކަން ރާއްޖޭގައި އެންމެ ފުޅާ ދާއިރާއެއްގައި ވިޔަފާރި ކުރާ ވިލާ ކުންފުންޏާ ދޭތެރޭ ކަންކުރަމުންދާ ގޮތުންވެސް ވަރަށް ސާފުކޮށް އެނގޭ ކަމަށެވެ.
މަލީހު ވިދާޅުވީ ދައުލަތުގެ ފައިސާ އިސްރާފު ކުރުމާއި ޕްރޮޖެކްޓްތައް ހިންގުމުގެ ނަމުގައި ކޮރަޕްޝަނުގެ އަމަލުތައް އިންތިހާއަށް ހިންގަމުންދާ ކަމަށާއި އެގޮތުން މި ސަރުކާރުން މަގެއްގައި ތާރު އެޅި ނަމަވެސް ދެވަނަ ފަހަރަށް ތާރު އަޅަން ނުޖެހޭ ގޮތަށް މަގެއްގައި ތާރުވެސް އަޅާ ނުލެވޭ ކަމަށާއި އެކަންވެސް މާލޭގެ އިންޑަސްޓްރިއަލް ވިލެޖް ސަރަހައްދުގައި ތާރު އަޅާފައިވާ މަގަށް ބަލާލުމުން ވެސް އެނގޭ ކަމަށެވެ.
