ޖަލްސާ އޮންނާނީ ކުނޫޒުގައި، ބުދަ ދުވަހުގެރޭ 9:30 ގައި
ކުނޫޒުގައި މީގެ ކުރިން ބޭއްވި ކެމްޕެއިން ޖަލްސާއެއްގެ ތެރެއިން
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިޙް (އިބޫ) އާއި އެމަނިކުފާނުގެ ރަނިންގމޭޓް ފައިސަލް ނަސީމް ނިމިިދިޔަ ހަފްތާ ބަންދުން ފެށިގެން އަތޮޅުތަކަށް ކުރެއްވި ކެމްޕެއިން ދަތުރުފުޅުތައް ނިންމަވާލައްވައި، މާލެ ވަޑައިގަތުމަށްފަހު ބުދަ ދުވަހަގެ ރޭ މާލޭގައި ކެމްޕެއިން ޖަލްސާއެއް ބޭއްވުމަށް ހަމަޖެހިއްޖެއެވެ.
ގުޅިފައިވާ ޕާޓީތަކުން ބުނީ މިޖަލްސާ އޮންނާނީ ބުދަ ދުވަހުގެރޭ 9:30 ގައި ޖުމްހޫރީ ޕާޓީގެ މައި އޮފީސް ހުންނަ މ. ކުނޫޒުގައިކަމަށެވެ. މި ޖަލްސާއަށް ގުޅިފައިވާ ޕާޓީތަކުގެ މެމްބަރުންނާއި ސަޕޯޓަރުންނަށް ވަނީ ދައުވަތު އަރުވާފައެވެ.
ކުނޫޒުގައި ކެމްޕެއިން ޖަލްސާއެއް ބޭއްވުމަށް ނިންމާފައިވާއިރު، ކެމްޕެއިން ބޮޑު ޖަލްސާއެއް ހަފްތާ ބަންދުގައި ބޭއްވުމަށް މާލެއިން ތަނެއް ހަމަޖައްސައިދިނުމަށް ގުޅިފައިވާ ޕާޓީތަކުން ވަނީ ހައުސިންގ މިނިސްޓްރީގައި އެދިފައެވެ. އަދި ކުރިން ފަހަރު ހެދި ގޮތަށް ވަގުތު ކުޑަތަންވުމުން އެކަން ނާންގައި، ކުރިން އެންގުމަށްވެސް ޕާޓީތަކުގެ ފަރާތުން އެމްޑީޕީއިން ވަނީ އެދިފައެވެ. ނިމިދިޔަ ހަފްތާގެ ހުކުރު ދުވަހުގެރޭ ދަރުބާރު ގޭގައި އިދިކޮޅު ފަރާތްތަކަށް ޖަލްސާއެއް ބޭއްވުމަށް އެތަން ދޫކުރުމަށް ހައުސިންގ މިނިސްޓްރީއިން ނިންމައި، އެކަން އެންގީ ބުރާސްފަތި ދުވަހުގެ އޮފީސް ބަންދުކުރި ފަހުންކަމަށް އެމްޑީޕީއިން ބުންޏެވެ.
ބުދަ ދުވަހުގެރޭ މާލޭގައި ޖަލްސާއެއް ބޭއްވުމަށްފަހު އަނެއްކާވެސް ދޮރުން ދޮރަށް ކެމްޕެއިންގެ އިތުރުން އަތޮޅުތެރެއަށާއި ރާއްޖެއިން ބޭރަށް ކެންޑިޑޭޓާއި ރަނިންގ މޭޓް ކުރައްވާ ދަތުރުފުޅުތައް ކުރިއަށްދާނެކަމަށް ގުޅިފައިވާ ޕާޓީތަކުން ހާމަކުރެއެވެ.
