މާލެއާއި ހުޅުލެއާއި ދެމެދު އަޅާފައިވާ ބްރިޖް މަތީގައި ކައިވެނިކުރުމަށް ބޭނުންވާ ފަރާތްތަކުން ކައިވެނިކުރާއިރު ބްރިޖް ޒީނަތްތެރިކުރާ ފަރާތެއް ހޯދުމަށް އިއުލާންކޮށްފިއެވެ.
ހައުސިންގ މިނިސްޓްރީއިން އަންގާރަ ދުވަހު ކުރި އިއުލާނެއްގައިވަނީ ސިނަމާލެ ބްރިޖް މަތީގައި ބޭއްވުމަށް ހަމަޖެހިފައިވާ ކައިވެނި ހަފްލާތަކުގެ ވެޑިންގ ބެކްޑްރޮޕް އާއި އެއާއި ގުޅިގެން ކުރަންޖެހޭ އެންމެހައި ޑެކަރޭޝަންތައް ހަދައިދޭނެ ފަރާތެއް ހޯދުމަށް ބޭނުންވާކަމަށެވެ.
އެކަންކުރަން ޝައުޤުވެރިވާ ފަރާތްތަކުން އަގުތައް ހައުސިންގ މިނިސްޓްރީއަށް ހުށަހަޅަން ޖެހެނީ މިމަހުގެ 19 ވާ އާދިއްތަ ދުވަހުގެ މެންދުރުފަހު 1:30ގެ ކުރިންނެވެ. އަދި މައުލޫމާތު ސާފުކުރުމަށް ބާއްވާ ބައްދަލުވުން މިމަހުގެ 16 ވާ ބުރާސްފަތި ދުވަހު މެންދުރުފަހު 2:00 ގައި އެމިނިސްޓްރީގައި އޮންނާނެކަމަށްވެސް ގެޒެޓްކޮށްފައިވާ އިއުލާނުގައިވެއެވެ.
ހައުސިންގ މިނިސްޓްރީގެ އިއުލާނުގައިވާ ގޮތުން ބެކްޑްރޮޕްތައް ހަދަން ޖެހެނީ 6 ތީމަކަށެވެ.
ބްރިޖްގައި ކައިވެނިކުރާ ފަރާތްތަކަށް ބެކްޑްރޮޕް ހަދައިދީ، ފޮޓޯގްރަފީއާއި ކޭޓަރިންގގެ ޚިދުމަތްވެސް ފޯރުކޮށްދެނީ ސަރުކާރުންނެވެ. އަދި މީގެ އިތުރުން ވެޑިންގ ޑްރެސްވެސް ސަރުކާރުން ފަހައިދޭ ގޮތަށް ކުރިން ހަމަޖެއްސިނަމަވެސް އާއްމުންގެ ފާޑުކިޔުންތަކާއިއެކު ވެޑިންގ ޑްރެސްގެ ޚަރަދު ސަރުކާރުން ނުދޭ ގޮތަށް ނިންމީއެވެ.
