ރީ ރަޖިސްޓްރޭޝަންގެ މަސައްކަތްތަކެއް މުލީއާގޭގައި ކުރާކަމުގެ މައުލޫމާތު ދަނީ ލިބެމުން: ޝިފާޒް
އެރޭގެ ސުންގަޑި ހަމަވިފަހުންވެސް މާލެއަށް ފޯމް ސެޓެއް ފޮނުވައި އަދި އެފޯމްސެޓް މުލިއާގެއަށް ވެއްދިކަމަށް މައުލޫމާތު ލިބޭ
ނޫސްވެރިންގެ ބައްދަލުވުމެއްގައިި ޝިފާޒް ވާހަކަދައްކަވަނީ
މިއަހަރުގެ ރިޔާސީ އިންތިޚާބާ ގުޅޭ ރީ ރަޖިސްޓްރޭޝަންގެ ބައެއް ކަންކަން މިހާރުވެސް މުލިއާގޭގައި ކުރަމުންދާކަމުގެ މައުލޫމާތު ލިބިވަޑައިގެންފައިވާ ކަމަށް ވިދާޅުވެ އެމްޑީޕީގެ ނައިބު ރައީސް މުހައްމަދު ޝިފާޒް ކަންބޮޑުވުން ފާޅުކުރައްވައިފި އެވެ.
ގުޅިފައިވާ ޕާޓީތަކުން އަންގާރަ ދުވަހު ބޭއްވި ނޫސްވެރިންގެ ބައްދަލުވުުމުގައި ޝިފާޒް ވިދާޅުވީ ރީ-ރަޖިސްޓްރީ ކުރުމުގެ ސުންގަޑި ހަމަވި ފަހުން،ވެސް ބައެއް މީހުން ފޯމް ބޮނޑި ބޮނޑި ހިފައިގެން ބައެއް ތަންތަނަށް ވަޑައިގެންނެވި ކަމުގެ މައުލޫމާތު ލިބިފައިވާ ކަމަށެވެ. އެގޮތުން ޝިފާޒް ވަނީ އައްޑު އަތޮޅުގައި ހިނގި އެފަދަކަމެއްގެ ވާހަކަ ހިއްސާ ކުރައްވާފައެވެ.
"ރަޖިސްޓްރޭޝަނަށްދިން ވަގުތުގެ ސުންގަޑި ހަމަވިފަހުންވެސް ބައެއް ބޭފުޅުން ފޯމް ބޮނޑި ބޮނޑި ހިފައިގެން ބައެއް ތަންތަނަށް ވަޑައިގެންނެވިކަމަށް މައުލޫމާތު ލިބޭ. އައްޑުއަތޮޅުން ލިބުނު މައުލޫމާތެއް އަޅުގަނޑު ހިއްސާކޮށްލަން ބޭނުން. އެރޭގެ ސުންގަޑި ހަމަވިފަހުންވެސް މާލެއަށް ފޯމް ސެޓެއް ފޮނުވައި އަދި އެފޯމްސެޓް މުލިއާގެއަށް ވެއްދިކަމަށް. އަދި މުލިއާގޭގައި އިލެކްޝަންސް ކޮމިޝަނުން ކުރަންޖެހޭ މަސައްކަތެއް މުލިއާގޭގައި ކުރަމުންދާ ކަމުގެ މައުލޫމާތު އަޅުގަނޑުމެންނަށް އެބަލިބޭ." ޝިފާޒް ވިދާޅުވިއެވެ.
ޝިފާޒް ވިދާޅުވީ ދެ ފުށް ފެންނަ، އިންސާފުވެރި އިންތިޚާބެއް ހޯދަން މަސައްކަތް ކުރާ ބަޔަކަށް މިއީ ވަރަށް ބޮޑު ކަންބޮޑުވުމެއް ކަމަށާއި މުލިއާގޭގައި އެ މަސައްކަތް ކުރަނީ ކޮން ބައެއްކަން އެނގޭ މިންވަރަށް މައުލޫމާތު ލިބިފައިވާ ކަމަށެވެ. އަދި އެކަންކަން ކަމާބެހޭ މިނިވަން މުއައްސަސާތަކުން ބަލައި، ފިޔަވަޅު އަޅައިދިނުމަށްވެސް ޝިފާޒް ވަނީ އެދިވަޑައިގެންފަ އެވެ.
ވޯޓު ލާ މަރުކަޒުތަކުގައި ބަހައްޓާ ވޯޓު ފޮށީގެ ނަތީޖާތައް ޓެބްލެޓެއް މެދުވެރިކޮށް އިއުލާން ކުރަން އުޅޭ ކަމުގެ މައުލޫމާތު ލިބިވަޑައިގެންފައިވާކަން ފާހަގަ ކުރައްވަމުން ޝިފާޒް ވިދާޅުވީ ގުނާފައި ނަތީޖާ ލިޔަން ނޭނގޭ ނަމަ، އެކަން ނުކުރުމަށް އިލެކްޝަންސް ކޮމިޝަންގެ ރައީސް ޝަރީފަށް ގޮވާލައްވާ ކަމަށެވެ. އަދި އެފަދަ ނަތީޖާއެއް ބަލައި ނުގަންނާނެ ކަމަށްވެސް ޝިފާޒް ވިދާޅުވިއެވެ.
ވޯޓު އޮޅުވާލުމަށާއި މަކަރު ހެދުމަށް ކުރާ ކަންކަން ވަރަށް ސާފުކޮށް އެނގެމުންދާ ކަމަށާއި އެވަރުގެ ޓެކްނިކަލް ޓީމެއް ގުޅިފައިވާ ޕާޓީތަކުގައި އެބައޮތްކަމަށް ޝިފާޒް ވިދާޅުވިއެވެ.
"ޓެބްލެޓުން އަންނަ ނަތީޖާ ޝީޓަށް އަޅުގަނޑުމެން ބަރޯސާއެއް ނުވާނަން. ގަލަމަކުން، ނަތީޖާ ގުނާފައި ލިޔަން ނޭނގޭ ނަމަ، ތިކަން ނުކުރަންވީ ޝަރީފް. ތިޔަ ކުރައްވަން އުޅުއްވާ ކަންކަން އެނގޭތީ މި ދަންނަވަނީ. ތިޔަކަންކަން އެނގޭވަރުގެ ޓެކްނިކަލް ވަރުގަދަ ޓީމެއް އަޅުގަނޑުމެންގެވެސް އެބައޮތް." ޝިފާޒް ވިދާޅުވި އެވެ.
ޝިފާޒް ވިދާޅުވި ގޮތުގައި، ރިޔާސީ އިންތިޚާބުގައި ރަށްވެހިވެފައިވާ ރަށް ނޫން އެހެން ރަށެއްގައި ވޯޓު ލުމަށް ރަޖިސްޓްރީ ކުރުމަށް 95،000 ފޯމް އީސީ އަށް ލިބުނު އިރު، ވޭތުވެދިޔަ 24 ގަޑިއިރު ތެރޭގައި ރީ ރެޖިސްޓްރޭޝަން ފޯމުތައް ޕްރޮސެސް ކުރެވިފައިވާ މިންވަރު ސާފުކޮށެއް ނުދެއްވާ ކަމަށާއި މި އަދަދަކީ ރާއްޖޭގެ އެއްވެސް އިންތިޚާބެއްގައި ފެނުނު އަދަދެއް ނޫން ކަމަށެވެ. އެހެންވެ، އެއީ ކިހިނެއްވި ކަމެއްތޯ ސާފު ކުރަމުން އަންނަ ކަމަށް ޝިފާޒް ވިދާޅުވި އެވެ.
މީގެއިތުރުން، ބަނގްލަދޭޝްގައި ކިޔަވަމުން އަންނަ ދިވެހި ދަރިވަރުންތަކެއް މެލޭޝިއާގައި ވޯޓު ލާން ރަޖިސްޓްރީކޮށްފައި އޮތް ކަމުގެ މައުލޫމާތު ލިބިވަޑައިގެންފައިވާ ކަމަށް ވެސް އޭނާ ވިދާޅުވި އެވެ.
ޝިފާޒް ވަނީ އިންތިޚާބާ ގުޅޭ ވަރަށް ގިނަ ކަންބޮޑުވުންތައް ފާހަގަކުރައްވާ އިލެކްޝަންސް ކޮމިޝަނަށް ވަރަށް ބޮޑަށް ފާޑު ވިދާޅުވެފައެވެ. އަދި އެކަންކަން ރަނގަޅުކުރުމަށްވެސް ޝިފާޒް ވަނީ ގޮވާލައްވާފައެވެ.
