ފައިސަލް ކެމްޕެއިން ދަތުރުފުޅެއްގައި ޅ. އަތޮޅަށް
10 އޯގަސްޓު 2018 | ހުކުރު 04:20ޅ. އަތޮޅުގެ ތިން ރަށަކަށް ވަޑައިގަތުމަށް ވަނީ ހަމަޖެހިފައި
އިބޫގެ ރަނިންމޭޓް ފައިސަލް ނަސީމާއި ގުޅިފައިވާ ޕާޓީތަކުގެ އިސް ބޭފުޅުން ޅ. އަތޮޅަށް ފުރާވަޑައިގަތުމުގެ ކުރިން ފޮޓޯއެއް ނަންގަވަނީ
އިދިކޮޅު ކޯލިޝަނުގެ ރިޔާސީ ކެންޑިޑޭޓް، އިބްރާހިމް މުހައްމަދު ސޯލިހުގެ ރަނިންގ މޭޓް ފައިސަލް ނަސީމް ކެމްޕެއިން ދަތުރުފުޅެއްގައި ޅ. އަތޮޅަށް ފުރާވަޑައިގެންފިއެވެ.
އަންނަ މަހުގެ 23 ވަނަ ދުވަހު ބާއްވާ ރިޔާސީ އިންތިހާބަށް ކެމްޕެއިން ކުރެއްވުމަށް ޅ. އަތޮޅަށް ކުރައްވާ ދެ ދުވަހުގެ މި ދަތުރުފުޅުގައި ފައިސަލް ހުކުރު ދުވަހު އެންމެ ފުރަތަމަ ވަޑައިގަންނަވާނީ އޮޅުވެލި ފުއްޓަށެވެ. އަދި އެރަށުގައި ގަތަކަށް ވަޑައިގެން ރައްޔިތުންނާ ބައްދަލުކުރެއްވުމަށް ހަމަޖެހިފައިވެއެވެ. އަދި ގުޅިފައިވާ ސިޔާސީ ޕާޓީތަކަށް ތާއީދުކުރާ ފަރާތްތަކާ ބައްދަލުކުރައްވައި ކެމްޕެއިންގެ ކަންކަން ކުރިއަށް ދާގޮތް ބައްލަވާލައްވާނެއެވެ.
ހުކުރު މެންދުރު ފަހު ފައިސަލް ވަޑައިގަންނަވާނީ އިދިކޮޅު ރިޔާސީ ކެންޑިޑޭޓް އިބޫގެ އުފަން ޅ. ހިންނަވަރަށެވެ. އަދި އެރަށުގައި "ޔޫތު ޖަގަހަ" ހުޅުވައިދެއްވުމަށް ފަހު އެރަށުގައި ވެސް ގެތަކަށް ވަޑައިގަތުމަށް ވަނީ ހަމަޖެހިފައެވެ. އޭގެ ފަހުން ހުކުރު ދުވަހުގެ ރޭ ކުރެންދޫ އަށް ވެސް ވަޑައިގަންނަވަން ވަނީ ހަމަޖެހިފައިއެވެ.
ކުރެންދޫގައި ހުންނެވުމަށް ފަހު ހުކުރު ދުވަހު ދުވަހުގެ ރޭ އެނބުރި އަނެއްކާ ވެސް ހިންނަވަރަށް ވަޑައިގަތުމަށް ފަހު ނައިފަރަށް ވަޑައިގަންނަވާނީ ހޮނިހިރު ދުވަހުއެެވެ.
