ރަޖިސްޓްރީ ކޮށްފައިނުވާ ނަމެއް ބޭނުންކޮށްގެން ކެންޑިޑޭޓަކަށް ތާއީދު ހޯދުމުގެ މަސައްކަތް ކޮށްގެން ނުވާނެކަމަށާއި، ސިޔާސީ ޕާޓީއަކަށް ނިސްބަތްވާ ކުލައެއްވެސް ހުއްދަ ހޯދުމެއް ނެތި ބޭނުންކޮށްގެން ނުވާނެކަމަށް އިލެކްޝަންސް ކޮމިޝަނުން ބުނެފި އެވެ. 

ކެންޑިޑޭޓުންނަށް ތާއީދު ހޯދުމުގައި ކޮށްގެން ނުވާނެކަންކަން ބަޔާންކޮށް އިލެކްޝަންސް ކޮމިޝަނުން އާންމުކުރި ބަޔާނެއްގައި ބުނީ، ސިޔާސީ ޕާޓީތަކުން ނެރޭ ކެންޑިޑޭޓުންނަށް ތާއީދު ހޯދުމުގެ ގޮތުން ހިންގާ ސިޔާސީ ހަރަކާތްތައް ޤާނޫނާއި ގަވައިދުގެ ހުދޫދުގެ ތެރޭގައި ކުރިއަށްގެންދިޔުމަށް ސިޔާސީ ޕާޓީތަކުގެ ބެލެނިވެރި ފަރާތުގެެ ހައިސިއްޔަތުން ޕާޓީތަކަށް އިލްތިމާސްކުރާކަމަށެވެ. އަދި ސިޔާސީ ޕާޓީތަކުން ތާއީދު ހޯދުމަށް ބާއްވާ ހަރަކާތްތަކުގައި ކޮށްގެން ނުވާނެ 3 ކަމެއް އިލެކްޝަންސް ކޮމިޝަނުގެ ބަޔާނުގައި ވަނީ ފާހަގަކޮށްފަ އެވެ. 

ފުރަތަމަ ކަމެއްގެ ގޮތުން ޖަލު ހުކުމެއް ތަންފީޒްކުރާ ފަރާތެއް ކުރިއަށް ނެރެ، ތާއީދު ހޯދުމުގެ މަސައްކަތްކޮށްގެން ނުވާނެ ކަމަށް އިލެކްޝަންސް ކޮމިޝަންގެ ބަޔާނުގައި ވަނީ ބުނެފަ އެވެ. އަދި އެއީ ޖަލުތަކާއި ޕެރޯލްގެ ޤާނޫނުގެ 62 ވަނަ މާއްދާއިން މަނާކުރެވިފައިވާކަމެއް ކަމަށްވެސް ބަޔާނުގައި ބުނެފައިވެއެެވެ. 

އޭގެއިތުރުން ތާއީދު ހޯދުމަށް ކުރިއަށްގެންދާ ހަރަކާތްތަކުުގައި ސިޔާސީ ޕާޓީއެއްގެ ގޮތުގައި ރަޖިސްޓްރީކޮށްފައި ނުވާ ނަންތަކެއް ޕާޓީއެއްގެ ގޮތުގައި ބޭނުންކުރަމުންދާކަމަށް ކޮމިޝަނަށް ޝަކުވާ ލިބިފައިވާކަމަށް ބަޔާނުގައި ބުނެފައިވެއެވެ. އެހެންކަމުން ރަޖިސްޓްރީ ކޮށްފައި ނުވާ ސިޔާސީ ޕާޓީއެއްގެ ގޮތުގައި ނުވަތަ އެ ނޫންވެސް ހައިސިއްޔަތަކުން ރަޖިސްޓްރީކޮށްފައިނުވާ ނަމެއް ބޭނުންކޮށްގެން ތާއީދު ހޯދުމުގެ އެއްވެސް ހަރަކާތެއް ކުރިއަށް ނުގެންދިއުމަށް އިލެކްޝަންސް ކޮމިޝަނުން ވަނީ އަންގާފަ އެވެ. 

ތިން ވަނަ ކަމެއްގެ ގޮތުން އިލެކްޝަން ކޮމިޝަނުން ބުނެފައިވަނީ ސިޔާސީ ޕާޓީއަކަށް ނިސްބަތްވާ ނިޝާނައި، ކުލަ ނުވަތަ އެ ޕާޓީއެއް ރަމްޒުކޮށްދޭ ތަކެތި އެ ސިޔާސީ ޕާޓީއެއްގެ ހުއްދަ ނެތި ބޭނުންކޮށްގެން ނުވާނެކަމަށެވެ. އަދި ސިޔާސީ ޕާޓީއަކުން ޖަލްސާތަކުގަޔާއި ތާއީދު ހޯދުމަށް ބާއްވާ ހަރަކާތްތަކުގައި ބޭނުންކުރާ ކުލަ އެހެން ސިޔާސީ ޕާޓީއަކުން އެ ޕާޓީގެ ހުއްދައާއިއެކު ނޫންގޮތަކަށް ބޭނުންކޮށްގެން ނުވާނެކަމަށްވެސް އިލެކްޝަންސް ކޮމިޝަނުން ބުނެފައިވެއެވެ. 

ވަކި ނަމެއް އިލެކްޝަންސް ކޮމިޝަންގެ ބަޔާނުގައި ފާހަގަކޮށްފައިނުވިނަމަވެސް، އިލެކްޝަންސް ކޮމިޝަނުންް ބަހުގެ ހަމަލާތައްދީފައިވަނީ މައުމޫން ރިފޯމް މޫވްމެންޓަށްކަމަށް ބެލެވެ އެވެ. ރައީސް މައުމޫންގެ ރިފޯމް މޫވްމެންޓުގެ ނަމުގައި ހަރަކާތެއް ފަށައި، ގުޅިފައިވާ ސިޔާސީ ޕާޓީތަކުގެ ކެނޑިޑޭޓް އިބްރާހިމް މުހައްމަދު ސޯލިހަށް ތާއީދު ހޯދުމަށް އެ މޫވްމެންޓުން އަންނަނީ ހަރަކާތްތެރިވަމުންނެވެ.