އިންޑޮނޭޝިއާ އަށް އައި ބިންހެލުމުގައި މަރުވި މީހުން އަދަދު 259 އަށް އަރައިފި

އިންޑޮނޭޝިއާގެ ރަށެއް ކަމަށްވާ ލޮމްބޮކް އަށް އާދީއްތަ ދުވަހު 6.9 މެގްނިޓިއުޑްގައި ބިންހެލުމާ ގުޅިގެން މަރުވި މީހުންގެ އަދަދު 259 މީހުންނަށް އަރާފައިވާ ކަމަށް ރިޕޯޓުތައް ބުނެފިއެވެ.

އިންޑޮނޭޝިއާގެ ޑިޒާސްޓާ މިޓިގޭޝަން އެޖެންސީ އާ ހަވާލާދީ ރޮއިޓާސް އިން ބުނީ މަރުވެފައިވާ 259 މީހުން އަދަދަކީ މިހާރު ކަށަވަރުވެފައިވާ އަދަދު ކަމަށާއި އެ އަދަދު ދާނީ އިތުރުވަމުން ކަމަށެވެ.

ބިމާހަމަވެފަިއވާ އިމާރާތްތަކުގެ ދަށުންނާއި އަދިވެސް އެހެނިހެން ގޮތް ގޮތުން މަރުވެފައިވާ މީހުންގެ ހަށިތައް ހޯދުމުގެ މަސައްކަތް މީހުން ހޯދުމުގެ މަަސައްކަތް ކުރާ ފަރާތްތަކުން ދަނީ ކުރަމުންނެވެ. ބިންހެލުމާ ގުޅިގެން ވަގުތީ ހިޔާތަކަށް އެތައްހާސް ބަޔަކު ބަދަލުކޮށްފައިވާއިރު، ބުދަ ދުވަހު އޮފިޝަލުން ބުނެފައިވަނީ އިތުރު ހިޔާތަކެއް މިހާރުވެސް ހަދަމުން ގެންދާ ކަމަށެވެ.

ބިންހެލުމާއި ގުޅިގެން މަރުވި މީހުންގެ އަދަދު އަދިވެސް އިތުރުވާނެ ކަަމަށް ރިޕޯޓުތައް ބުނާއިރު، ސީރިއަސް ޒަޚަމްތަކާއި ގުޅިގެން 2500 މީހުން ވަނީ ހޮސްޕިޓަލަށް ގެންދެވިފައެވެ. އަދި 156000 މީހުން ވަނީ ރައްކާތެރި ހިސާބުތަކަށް ބަދަލު ކުރަން ޖެހިފައިވާ ކަމަށް ރިޕޯޓުތައް ބުނެއެވެ.

ދުނިޔޭގެ އެކި ކަންކޮޅުތަކުގެ ޓޫރިސްޓުން ޝައުގެވެރިވާ ލޮމްބޮކް އޮންނަނީ ޓޫރިސްޓް މަންޒިލެއް ކަމަށްވާ ބާލީގެ އިރުން 40 ވަރަކަށް ކިލޯމީޓަރު ދުރުގައެވެ.

ބާލީ އާއި ލޮމްބޮކްގެ އާބާދީ ގާތްގަނޑަކަށް ހަތަރު މިލިއަނަށް އަރާ އިރު، އަހަރެއްގެ ތެރޭގައި ދެ ރަށަށް ޒިޔާރަތްކުރާ މީހުންގެ އަދަދު އެތައް މިލިއަނަކަށް އަރައެވެ.

އިންޑޮނީޝިއާގެ ލޮމްބޮކް އަށް ބުރާސްފަތި ދުވަހު ވެސް ވަނީ އަނެއްކާވެސް ބާރުގަދަ ބިންހެލުމެއް އައިސްފައެވެ. ރާސްފަތި ދުވަހު އައި ބިންހެލުން އައިސްފައިވަނީ 6.2 މެގްނިޓިއުޑް ގައެވެ.