ރިޔާސީ އިންތިހާބަށް ކުރިމަތިލެއްވުމަށް ރައީސް ޔާމީންގެ ފަރާތުން ފޯމް ހުށަހަޅައިފި
9 އޯގަސްޓު 2018 | ބުރާސްފަތި 06:56ރައީސް ޔާމީން ވަޑައެއް ނުގަންނަވާ
ރައީސް އަބްދުﷲ ޔާމީންގެ ފަރާތުން ޓުއަރިޒަމް މިނިސްޓަރު މޫސާ ޒަމީރު ކެންޑިޑެސީ ފޯމް އިލެކްޝަނާ ހަވާލުކުރައްވަނީ: ރައީސް ޔާމީން ވެސް އަދި ރަނިންގ މޭޓް ޑރ. ޝަހީމް ވެސް ވަޑައެއް ނުގަންނަވާ
އަންނަ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ޕީޕީއެމްގެ ފަރާތުން ވާދަކުރެއްވުމަށް ރައީސް އަބްދުﷲ ޔާމީން އަދި ރަނިންމޭޓު ޑރ. މުހައްމަދު ޝަހީމް އަލީ ސައީދުގެ ކެނޑިޑެސީ ފޯމް އިލެކްޝަންސް ކޮމިޝަނަށް ހުށަހަޅައިފިއެވެ.
ބުރާސްފަތި ދުވަހު އިލެކްޝަންސް ކޮމިޝަނުގައި އޮތް ރަސްމިއްޔާތެއްގައި ރައީސް ޔާމީންގެ ކެންޑިޑެސީ ފޯމް އިލެކްޝަންސް ކޮމިޝަނުގެ ރައީސް އަހުމަދު ޝަރީފާ ޙަވާލުކޮށްދެއްވީ ޕީޕީއެމްގެ ނާއިބު ރައީސް އަދި ޓޫރިޒަމް މިނިސްޓަރު މޫސާ ޒަމީރެވެ.
ރައީސް ޔާމީންގެ ކެންޑިޑެސީ ފޯމު އީސީ އަށް ހުށަހަޅާފައި މިވަނީ ރައީސް ޔާމީން ގއ. އާއި ގދ. އަތޮޅަށް ކުރައްވާ ރަސްމީ ދަތުރުފުޅެއްގައި ވަޑައިގެން އުޅުއްވާ ދަނޑިވަޅެއްގައެވެ.
ރައީސް ޔާމީންގެ ކެންޑިޑެސީ ފޯމާ ހަވާލުވެވަޑައިގަތުމަށް ފަހު، އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވީ، ކެންޑިޑެސީ ބަލައިގަތުމާ މެދު، ކުރިއަށް އޮތް 48 ގަޑިއިރުގެ ތެރޭގައި އެ ކޮމިޝަނުން ގޮތެއް ނިންމާނެ ކަމަށެވެ.
ރައީސް ޔާމީން ކެންޑިޑެސީ ފޯމު ހުށަހެޅުމާއެކު މިއިންތިޚާބުގައި ވާދަކުރެއްވުމަށް ފޯމު ހުށަހެޅި ކެންޑިޑޭޓުންގެ އަދަދު ތިނަކަށް އެރީއެވެ. އަދި އިންތިޚާބުގައި ވާދަކުރައްވާނެކަން އިތުރު ދެ ފަރާތްތަކުން ވަނީ އިއުލާންކުރައްވާފައެވެ.
ރައީސް ޔާމީންގެ ފޯމު ހުށަހެޅުއްވުމަށް ފަހު ނޫސްވެރިންނާ ވާހަކަ ދައްކަވަމުން ޕީޕީއެމްގެ ނާއިބު ރައީސް މޫސާ ޒަމީރު ވިދާޅުވީ، ކެންޑިޑެސީ ފޯމު ހުށަހެޅުއްވުމަށް ރައީސް ޔާމީނަށް ވަޑައިނުގެންނެވުނީ ރަސްމީ ދަތުރުފުޅެއްގައި މާލޭން ބޭރުގައި އުޅުއްވާތީ ކަމަށެވެ. އެކެއް ފެބުރުވަރީގެ އަމުރާ ގުޅިގެން ރައީސް އަތޮޅުތަކަށް ކުރައްވަން ޖެހޭ ދަތުރުތައް ވަރަށް ބޮޑަށް ފަސްކުރެވިފައިވާތީ މިވަގުތު ރައީސް އަށް ދަތުރުތައް ކުރުކޮށްލެވެން ނެތް ކަމަށް ވެސް ޒަމީރު ވިދާޅުވިއެވެ.
ޒަމީރު ވިދާޅުވީ ޕާޓީގެ ފަރާތުން ފޯމު ހުށަހެޅީ ކެންޑިޑޭޓު އަދި ރަނިންމޭޓުގެ ވެސް އިޒުނައާ އެކު ކަމަށެވެ. އަދި ބޮޑު ރަސްމިއްޔާތަކާ އެކު ފޯމު ހުށަހެޅުމަށް ޕާޓީގެ އާންމުން މެންބަރުންނާ ވަރަށް ގިނަ ބަޔަކު އެދުނު ނަމަވެސް އެގޮތަށް ކަންތައް ނުކުރީ މަގުތަކުގެ ކާރޫބާރު ބޮޑުކަމާއި ޓްރެފިކް ބާރު ބޮޑު ގަޑިއެއްގައި އެކަން ނުކުރުމަށް ކަމަށެވެ.
ޕީޕީއެމްގެ ރިޔާސީ ކެންޑިޑެސީ ރައީސް ޔާމީނާއި ޙަވާލުކޮށްފައިވާ ވަނީ ޤާނޫނުތަކާއި ޤަވައިދުތަކުގެ އިތުރުން ޕާޓީގެ އަސާސީ ޤަވައިދާ އެއްގޮތަށް ކަމަށާއި، ރިޔާސީ އިންތިޚާބުގައި ވާދަކޮށް އިންތިޚާބާ ގުޅޭ ޙަރަކާތްތައް ވެސް ކުރިއަށް ގެންދާނީ ޤާނޫނީ އިމުގެ ތެރެއިން ކަމަށް ޒަމީރު ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވީ، ރައީސް ޔާމީންގެ ކެންޑިޑެސީ ފޯމް އިލެކްޝަންސް ކޮމިޝަނުން ބަލައިގެންފައިވާ ކަމަށެވެ. އަދި ފޯމް ދިރާސާ ކުރެއްވުމަށް ފަހު 48 ގަޑިއިރުގެ ތެރޭގައި ކެންޑިޑެސީ އާމެދު ގޮތެއް ނިންމަވާނެ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ހަތް ފަރާތަކުން ކެންޑިޑެސީ ފޯމް ނަގާފައިވާތީ އިތުރު ފަރާތްތަކުން މުއްދަތު ހަމަވުމުގެ ކުރިން ފޯމް ހުށަހަޅުއްވާނެ ކަމަށް އުއްމީދު ކުރައްވާ ކަމަށެވެ. ކެންޑިޑެސީ ފޯމް ހުށަހެޅުމުގެ ސުންގަޑިއަކީ މާދަމާ ހަވީރު 16:00 ގެ ނިޔަލަށް ކަމަށް ވެސް ޝަރީފް ވިދާޅުވިއެވެ.
ރައީސް އަބްދުﷲ ޔާމީނާއި އެމަނިކުފާނުގެ ރަނިންގ މޭޓު ޑރ. މުހައްމަދު ޝަހީމް އަލީ ސައީދުގެ އިތުރުން ދެން އިންތިޚާބުގައި ވާދަކުރެއްވުމަށް ކެނޑިޑެސީ ފޯމު ހުށަހަޅާފައި ވަނީ، ގުޅިފައިވާ ސިޔާސީ ޕާޓީތަކުގެ ފަރާތުން އިންތިޚާބުގައި ވާދަކުރައްވާ އިބްރާހިމް މުޙައްމަދު ސޯލިހާއި ރަނިންގ މޭޓު ފައިސަލް ނަސީމްގެ އިތުރުން ދަފްތަރު ނަމްބަރު 6562، ހުސައިން ނަސީރާއި އޭނާގެ ރަނިންގ މޭޓް އަރަބިއްޔާ ސްކޫލްގެ ކުރީގެ ޕްރިންސިޕަލް ޝައިޚް ނަސްރުﷲ މުސްތަފާއެވެ.
