މިސަރުކާރުން ރައްޔިތުންގެ ނަފުސާއި މުދަލަށް އިންތިހާއަށް އަނިޔާވެރިވި ނަމަވެސް ރައްޔިތުންގެ އަޒުމާއި ހިތްވަރު ޖަލަށް ނުލެވޭނެ ކަމަށް ޖުމްހޫރީ ޕާޓީގެ ބާނީ، ގާސިމް އިބްރާހީމް ވިދާޅުވެއްޖެ އެވެ.
ގުޅިފައިވާ ޕާޓީތަކުން ބުދަ ދުވަހުގޭ ރޭ މ. ކުނޫޒުގެ ބޭއްވި ޖަލްސާގައި ސްކައިޕް މެދުވެރިކޮށް ވާހަކަދައްކަވަމުން ގާސިމް ވިދާޅުވީ ރައީސް ޔާމިންގެ މިފަސް އަހަރުގައި ނުހައްގުން އެތައް ބަޔަކު ޖަލަށްލާފައިވާ ކަމަށާއި، މި ސަރުކާރަކީ ރައްޔިތުންގެ މައްޗަށް އިންތިހާއަށް އަނިޔާވެރިވެރިވަމުން އަންނަ ސަރުކާރެއް ކަމަށެވެ. ގާސިމް ވިދާޅުވީ މިފަހުގެ ތާރީހެއްގައި އެއްވެސް އުސޫލެއް ނެތި ސިޔާސީ އެތައް ބޭފުޅަކު ހައްޔަރުކޮށްފައިވަނީ ރައީސް ޔާމިންގެ ސަރުކާރުން ކަމަށެވެ. އަދި ދައުވާ އުފުލައި ޝަރީއަތްތައް ހިންގާފައިވާ އެއްވެސް ޝަރީއަތަކީ އިންސާފުން ހިންގާފައިވާ ޝަރީއަތެއް ނޫންކަން ރައްޔިތުންނަށް ކަށަވަރުވާ ކަމަށް އޭނާ ވިދާޅުވި އެވެ.
ރައީސް ޔާމިންގެ ސަރުކާރާއި ދެކޮޅު، ހުރިހާ ސިޔާސީ ލީޑަރުންނަށް ނުހައްގުން ހުކުމްތަކެއް އިއްވާފައިވާކަން ފާހަގަކުރައްވައި ގާސިމް ވިދާޅުވީ ވަކި މަންފާއެއް ހާސިލްކުރުމަށް ސިޔާސީ މީހުން ހައްޔަރުކޮށް އަނިޔާ ދިނުމަށްފަހު އާންމު ރައްޔިތުންގެ ތެރެއިން ހައްގު ބަސް ބުނި އެތައް ބަޔަކަށް މިސަރުކާރުން އަނިޔާވެރިވެ، އެމީހުންގެ ވެސް ޖަލަށްލާފައިވާ ކަމަށެވެ. ރައްޔިތުންގެ ނަފުސާއި މުދަލަށް ކިތަންމެ އަނިޔާ ދިނަސް ރައްޔިތުންގެ އަޒުމާއި ހިތްވަރު ޖަލަށް ނުލެވޭނެ ކަމަށް ވެސް ގާސިމް ވިދާޅުވިއެވެ.
ގާސިމް ވިދާޅުވީ ރައްޔިތުންގެ ބަސް އިއްވަންތިބި ރައްޔިތުންގެ މަންދޫބުންނަށް ރައްޔިތުންގެ ބަހުސްކުރާ މަޖިލިސްގެއަށް ރައީސް ޔާމިންގެ މަގާމާއި ނުފޫޒު ބޭނުން ކުރައްވައިގެން ނުވަދެވޭ ގޮތް ހަދާފައިވާ ކަމަށާއި، ބާރަ ދާއިރާގެ ރައްޔިތުން އަޑު މިސަރުކާރުން ކަނޑުވާލާފައިވާ ކަމަށެވެ. އަދި މިއީ ރައްޔިތުން ބަލައިގަންނާނެ ކަމެއް ނޫން ކަމަށް ވެސް އެމަނިކުފާނު ވިދާޅުވިއެވެ.
ގެއްލުވާލާފައިވާ ނޫސްވެރިޔާ ރިލްވާނުގެ މައްސަލައަށް އިޝާރާތް ކުރައްވާ ގާސިމް ވިދާޅުވީ ރައީސް ޔާމީން ދެއިރުދެދަޅަޔަށް ދެގޮތަށް ދައްކަވާ ވާހަކަފުޅުތަކުން އެމަނިކުފާނު އަމިއްލައަށް ރައްޔިތުންގެ ކުރިމަތީގައި ބޭޒާރުވާ ކަމަށާއި، ހިޔާނާތާއި އަނިޔާވެރިވެފައިވާ މިންވަރު ސާބިތުވާ ކަމަށެވެ. އަދި ރިލްވާންގެ މައްސަލާގައި ރައީސް ޔާމިން ދެއްކެވި ވާހަކަފުޅުތައް ތަހުގީގު ކޮށްދެއްވުމަށް ސަލާމަތީ ފަރާތްތަކަށް ޤާސިމް ވަނީ ގޮވާލައްވާފައެވެ.
ދައުލަތުގެ މުދަލަށް ހިޔާނާތްތެރިވެފައިވާ ކަމަށް ރައީސް ޔާމީން އަމިއްލަފުޅަށް އިއުތިރާފުވެފައިވާކަން ފާހަގަކުރައްވައި ގާސިމް ވިދާޅުވީ މިފަދަ ބޭފުޅަކަށް ރިޔާސީ އިންތިޚާބުގައި ވާދަކުރައްވަން ރިޔާސީ ކެންޑިޑޭޓެއްގެ ގޮތުގައި ކުރިމަތިނުލެއްވޭނެ ކަމަށާއި، އިސްލާމްދީނާއި، ފެހި ގާނޫނު އަސާސީން މިކަމަށް ޖާގަ ނުދޭ ކަމަށެވެ. ގާސިމް ވިދާޅުވީ މިއަހަރުގެ ރިޔާސީ އިންތިޚާބަށް ނުފޫޒު ފޯރުވުމަށް އެކިގޮތްގޮތުން މިސަރުކާރު މަސައްކަތް ކުރާ ކަމަށާއި، މިކަމަށް ހުރިހާ ރައްޔިތުން ފާރަވެރިވެ ތިބެންޖެހޭ ކަމަށެވެ.
ރައީސް ޔާމީން އިންތިޚާބު ކާމިޔާބު ކުރައްވާނީ ކޯޓުން ނޫން ކަމާއި ވޯޓުން ކަމަށް ވިދާޅުވެފައިވާތީ އެކަމަށް ރައްދުދެއްވައި ގާސިމް ވިދާޅުވީ ރައީސް ޔާމިން މިއަހަރުގެ ރިޔާސީ އިންތިޚާބު ރައްޔިތުންގެ ވޯޓުން ކާމިޔާބު ނުކުރެވޭނެ ކަމުގެ ޔަގީންކަން އެބައޮތް ކަމަށާއި، ކާމިޔާބު ކުރެވޭނީ ހަމައެކަނި ކޯޓުން ކަމަށެވެ. އެއީ މިހާތަނަށް ރައީސް ޔާމިން ބޭނުންވާ ކަންކަމުގައި ކުރި ހޯދިގޮތް ކަމަށް ގާސިމް ވިދާޅުވިއެވެ.
ގާސިމް ވިދާޅުވީ އަނިޔާވެރިކަމާއި ބިރުވެރިކަން ރައްޔިތުން ބޭނުންނުވާ ކަމަށާއި، މިއަހަރުގެ ރިޔާސީ އިންތިޚާބުގައި ގުޅިފައިވާ ޕާޓީތަކުގެ ކެންޑިޑޭޓު އިބްރާހިމް މުހައްމަދު ސޯލިހުއަށް ރައްޔިތުން ނުކުމެ ވޯޓުން ރިޔާސީ އިންތިޚާބު ކާމިޔާބު ކޮށްދޭނެ ކަމަށެވެ.
