އަތޮޅުތަކުގެ ތެރޭގައި ކުދި އަދި މެދުފަންތީގެ ވިޔަފާރީތަކުގެ ކަރަންޓް ބިލުތަކަށް ހެޔޮ ބަދަލެއް ގެންނަވާނެ ކަމަށް އިދިކޮޅު ކޯލިޝަނުގެ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ވައުދުވެވަޑައިގެންފި އެވެ.
ބުދަ ދުވަހު ލ.ފޮނަދޫގައި ކެމްޕެއިން ޖަގަހަ ހުޅުވުމަށްފަހު ވާހަކަފުޅު ދައްކަވަމުން އިބޫ ވިދާޅުވީ އެމަނިކުފާނުގެ ސަރުކާރެއްގައި ކުދި އަދި މެދުފަންތީގެ ވިޔަފާރިތަކަށް ކަރަންޓް ބިލަކީ ބުރައަކަށް ނުވާނެ ގޮތަށް ބަދަލު ގެންނަވާނެ ކަމަށެވެ.
"ކަރަންޓްގެ އަގު މާލެއާ އެއްވަރަކަށް ރާއްޖޭގެ އަތޮޅުތަކާ އަގުމަގު ކުރިއިރުގައި ވިޔަފާރީގެތަކުން ނަގާ ފީ އިންތިހާއަށް ބޮޑުވުމުގެ ސަބަބުން ކުދި އަދި މެދުފަންތީގެ ވިޔަފާރީތަކަށް މި ވަނީ އުނދަގޫތަކެއް ކުރިމަތިވެފައި. ވިޔަފާރީން ލިބޭ ފައިސާއިން ކަރަންޓް ބިލު ދައްކާފައި ދެން ހުރި ކަންތައްތަކަށް ނުކުރެވޭ ހިސާބަށް ބައެއް ވިޔަފާރީތައް ވަނީ ގޮސްފައި،" އިބޫ ވިދާޅުވި އެވެ.
އިބޫ ވިދާޅުވީ ގުޅިފައިވާ ޕާޓީތަކުން ކުރާ މަސައްކަތަކީ ކޮންމެ ސިޔާސީ ފިކުރެއްގެ މީހަކަށް ވެސް މިނިވަންކަމާއެކު މަސައްކަތް ކުރެވޭނެ މާހައުލެއް ގާއިމުކޮށްދިނުން ކަމަށެވެ. ހަމަ އެހެންމެ ލޯކަލް ޓޫރިޒަމް ކުރިއެރުވުމަކީ ގުޅިފައިވާ ޕާޓީތަކުން އެކުލަވާލާ ސަރުކާރެއްގައި ވެސް އެންމެ ބޮޑު އަހައްމިޔައްތުކަން ދޭނެ އެއް ދާއިރާކަން ފާހަގަ ކުރައްވައި އިބޫ ވިދާޅުވީ އެތެރޭގެ އުދުހުންތަކުގެ އަގު ހެޔޮ ކޮށްދެއްވާނެ ކަމަށެވެ.
މީގެ އިތުރުން އިބޫ ވިދާޅުވީ ތ.އަތޮޅާއި ލ.އަތޮޅުން ފެނިގެންދިޔައީ ވަރަށް އުއްމީދީ މަންޒަރުތަކެއް ކަމަށާއި އިރާދަ ކުރެއްވިއްޔާ އެމަނިކުފާނު އިންތިހާބު ކާމިޔާބު ކުރާނީ އެ ދެ އަތޮޅުގެ ފުރިހަމަ ތާއީދާއެކު ކަމަށެވެ. އަދި އެއަށްފަހު އޮންނީ ރައްޔިތުން ބޭނުންވާ އިންސާފު ގާއިމުކޮށްދެއްވުން ކަމަށް ވެސް އިބޫ ވިދާޅުވި އެވެ. ލ.އަދި ތ.އަތޮޅަށް ކުރެއްވި ދަތުރުފުޅަށްފަހު އިބޫ ބުރާސްފަތި ދުވަހު މާލެ ވަޑައިގަންނަވާނެ އެވެ.
