ހިޔާ އެކޮމްޕްލިޝްޑް އަށް މާދަމާ ފޯމު ދޫކުރަނީ

ހިޔާ އެކޮމްޕްލިޝްޑްގެ ދަށުން އަންގާރަ ދުވަހު ފޯމު ދޫކުރުމަށް ހަމަޖެހިފައިވާ ކަމަށް ހައުސިންގ މިނިސްޓްރީން ބުނެފިއެވެ.

މިދިޔަ ހަފްތާގެ ބުދަ ދުވަހު ހައުސިންގ މިނިސްޓްރީގައި ބޭއްވި ރަސްމިއްޔާތުގައި ހިޔާ އެކޮމްޕްލިޝްޑް މަޝްރޫއު އިއުލާނު ކުރިއިރު އެ ޕްރޮޖެކްޓްގެ ދަށުން ފޯމު ބަލައިގަތުން ކުރިއަށް ގެންދިއުމަށް ހަމަޖެހިފައިވަނީ އޯގަސްޓް 15 ވަނަ ދުވަހުން ފެށިގެންނެވެ. އަދި އޯގަސްޓް 15 ވަނަ ދުވަހުން ފެށިގެން ހަތަރު މަސް ދުވަހަށް ފޯމު ބަލައިގަތުން ކުރިއަށްދާނެ ކަމަށް ހައުސިންގ މިނިސްޓްރީން ބުނެއެވެ.

އެ ޕްރެސް ކޮންފަރެންސްގައި ވާހަކަދައްކަވަމުން ހައުސިންގ މިނިސްޓަރ ޑރ މުހައްމަދު މުއިއްޒު ވިދާޅުވީ، ހިޔާ އެކޮމްޕްލިޝްޑް މަޝްރޫއުއަކީ ރާއްޖޭގެ ބޯހިޔާވަހިކަމުގެ މައްސަލައަށް ދިމާވެފައިވާ ފުރިހަމަ ހައްލު ލިބިދޭނެ މަޝްރޫއުއެއް ކަމަށެވެ. މިނިސްޓަރ ވިދާޅުވީ، ފްލެޓަށް އެދި ހުށަހަޅާ ފަރާތްތަކަކީ 18 އަހަރުން މަތީގެ މީހެއް ކަމުގައިވުމާއި 1،000 އަކަފޫޓުގެ ބިމެއް ނެތް ކޮންމެ މީހަކަށް ވެސް ފްލެޓް ޔަގީން ވެގެންދާނެ ކަމަށެވެ.

މި ޕްރޮޖެކްޓްގެ ދަށުން 1000 އަކަފޫޓުގެ ފްލެޓެއް ނުވަތަ 1000 އަކަފޫޓުގެ ބިމެއް ހޯދުމަށް ހުށަހެޅިދާނެއެވެ.

މި މަޝްރޫއުގެ ދަށުން ގުޅީފަޅު ސަރަހައްދާއި ފުށިދިއްގަރު ފަރުން ބޮޑު ބައެއް ހިއްކައި 82000 ހައުސިންގ ޔުނިޓް ގާއިމް ކުރެވޭނެ ކަމަށް ހައުސިންގ މިނިސްޓްރީން ބުނެއެވެ. އެހެން ނަމަވެސް މި މަޝްރޫއުއަށް ދާނެ ހަރަދާއި މަސައްކަތް ފަށާނެ ތާރީހެއްވެސް ހައުސިންގ މިނިސްޓްރީން ހާމަކޮށްފައެއް ނުވެއެވެ.