އެމެރިކާގެ ދެ ވަޒީރަކާއި ދެކޮޅަށް ތުރުކީން ފިޔަވަޅު އަޅައިފި
6 އޯގަސްޓު 2018 | ހޯމަ 04:49އެމެރިކާއިން ފިޔަވަޅު އަޅާފައިވަނީ އެމެރިކާގެ ފާދިރީ އެންޑްރޫ ބަރަންސަން ދޫނުކޮށްގެން
ރައީސް ރަޖަބް ތައްޔިބް އުރުދުޣާން(ކ) އަދި އެމެރިކާގެ ރައީސް ޑޮނަލްޑް ޓްރަމްޕް(ވ). އެމެރިކާއިން ތުރުކީއަށް ފިޔަވަޅު އެޅުމާއެކު އެގައުމުންވެސް އެމެރިކާއަށް ވަނީ ފިޔަވަޅު އަޅާފައި
ތުރުކީގެ ދެ ވަޒީރަކާއި ދެކޮޅަށް އެމެރިކާއިން ފިޔަވަޅު އަޅާފައިވަނިކޮށް އެމެރިކާގެ ދެ ވަޒީރަކާ ދެކޮޅަށް ތުރުކީން ވެސް ފިޔަވަޅު އަޅައިފިއެވެ.
ތުރުކީގެ ދެ ވަޒީރުންނާ ދެކޮޅަށް އެމެރިކާއިން ފިޔަވަޅުއެޅީ އެދެބޭފުޅުންނަކީ އެމެރިކާގެ ފާދިރީ އެންޑްރޫ ބަރަންސަން ތުރުކީން ހައްޔަރުކުރުމުގައި އެންމެ އިސްކޮށް އުޅުއްވި ދެބޭފުޅުންކަމަށާއި އެދެބޭފުޅުންނަކީ ތުރުކީގައި އިންސާނީ ހައްގުތަކަށް އަރައިގަތުމުގެ އަމަލުތައް ތަންފީޒުކުރާ އިދާރާތައް ހިންގަވާ ދެވެރިންކަމަށް ބުނެއެވެ.
އެމެރިކާއިން ފިޔަވަޅު އެޅި ދެ ވަޒީރުންނަކީ އިންޓީރިއާ މިނިސްޓަރު ސުލައިމާން ސޮއިލޫއާއި، ޖަސްޓިސް މިނިސްޓަރު އަބްދުލްހަމީދުއެވެ.
ތުރުކީން އެމެރިކާގެ ދެ ވަޒީރަކާ ދެކޮޅަށް ފިޔަވަޅު އެޅީ އެމެރިކާއިން ތުރުކީގެ ދެވަޒީރަކާއި ދެކޮޅަށް ފިޔަވަޅު އަޅާފައި ވާތާ ހަފްތާއެއް ވެސް ނުވަނީހެވެ.
ތުރުކީގެ ދައުލަތުގެ މިޑިއާ އަނާދޫލޫއިން ރިޕޯޓްކޮށްފައިވާގޮތުގައި ފިޔަވަޅު އަޅަން ނިންމީ އެމެރިކާގެ ޖަސްޓިސް އަދި އިންޓީރިޔާ ޑިޕާޓްމަންޓުގެ ދެ ސެކެޓްރީންނާ ދެކޮޅަށެވެ.
ފިޔަވަޅު އެޅުމަށް ނިންމަވައި ތުރުކީގެ ރައީސް ތައްޔިބު އުރުދުޣާން ވިދާޅުވީ އެގައުމުގެ ދެ ވަޒީރަކާ ދެކޮޅަށް ފިޔަވަޅު އެޅުމަކީ ފަސް ޖެހޭނެކަމެއް ނޫންކަމަށެވެ. އަދި އެމެރިކާއިން އެދޭހާ ކަންތައްތަކަށް ބޯ ނުލަނބާނެކަމަށް އުރުދުޣާން ވަނީ ވިދާޅުވެފައެވެ.
