މުސްލިމް ވެރިއެއްގެ އެންމެ އިސް ވާޖިބަކީ ޢަދްލު އިންސާފް ޤާއިމްކުރުން: ޝައިޚް އިލްޔާސް
6 އޯގަސްޓު 2018 | ހޯމަ 08:54ބައިތުލްމާލުން ޙައްޤު ގޮތުގައި މެނުވީ ޚަރަދު ނުކުރުން
އައްޝައިޚް އިލްޔާސް ހުސައިން
މުސްލިމް ވެރިއެއްގެ އެންމެ އިސް ވާޖިބަކީ ޢަދްލު އިންސާފް ޤާއިމް ކުރެއްވުން ކަމަށް މަޝްހޫރު ދީނީ ޢިލްމުވެރިޔާ އަދި އަދާލަތު ޕާޓީގެ ޢިލްމުވެރިންގެ މަޖިލީހުގެ ރައީސް ޝައިޚް އިލްޔާސް ހުސައިން ވިދާޅުވެއްޖެއެވެ.
ހޯމަ ދުވަހު ޝައިޚް އިލްޔާސް ކުރެއްވި ޓްވީޓެއްގައި ވިދާޅުވީ މުސްލިމް ވެރިއެއްގެ އެންމެ އިސް ވާޖިބަކީ ޢަދްލު އިންސާފް ޤާއިމް ކުރުމާއި ބައިތުލްމާލުން ޙައްޤު ގޮތުގައި މެނުވީ ޚަރަދު ނުކުރުން ކަމަށެވެ. އަދި ކަންކަމަށް އަމާނާތްތެރިން އައްޔަން ކުރުމާއި ރައްޔިތުންގެ ދިރިއުޅުމުގެ އެންމެހާ އަސާސީ ކަންކަން ލުއިފަސޭހަ ކޮށްދިނުން ކަމަށްވެސް އިލްޔާސް ވިދާޅުވިއެވެ.
މީގެ އިތުރުން މިކަންތައް ނުކުރެވޭނަމަ އެފަދަ ވެރިއަކީ ޚިޔާނާތްތެރިއެއް ކަމަށްވެސް ޝައިޚް އިލްޔާސް ވަނީ ވިދާޅުވެފައެވެ.
ޝައިޚް އިލްޔާސް މިމޭރުމުން ވިދާޅުވެފައިވާއިރު ރާއްޖޭގެ ޖުޑިޝަރީ މިވަގުތު އޮތްގޮތާމެދު ގިނަބަޔަކު ދަނީ ކަންބޮޑުވެ ފާޑު ކިޔަމުންނެވެ. ޚާއްޞަކޮށް ވަކިބަޔަކު ބޭނުންވާ ގޮތައް ކޯޓުތަކުން ޙުކުމްތައް ކުރުމާއި ޝަރީޢަތް ކުރުމުގައި ރާއްޖޭގެ ޤާނޫނު އަސާސީއާއި ޤާނޫންތަކާ ޚިލާފަށް އަދި އިންސާނީ ހަމަޔާއިވެސް ޚިލާފަށް މައްސަލަތައް ނިންމާ ކަމުގެ ތުހުމަތު ގިނަ ރައްޔިތުން ދަނީ ކުރަމުންނެވެ.
