ކޮންމެ މީހަކީ ކުރިއެރުމާއި ތަރައްޤީއަށް ދަހިވެތިވެފައިވާ މީހަކަށް ވާންޖެހޭ: ޑރ. ޝަހީމް
ކޮންމެ ޕާޓީއެއްގައި ހުރި މެމްބަރެއް ކަމުގައިވިޔަސް، ޤައުމުދެކެ ލޯބިވާ، ރާއްޖޭގެ ހަމަޖެހުމަށް އިސްކަންދޭ، ކުރިއެރުމާއި ތަރައްޤީއަށް ދަހިވެތިވެފައިވާ މީހަކަށްވާން ޖެހޭ
މެލޭޝިއާގައި ދިރިއުޅޭ ދިވެހިންނާއި ބައްދަލު ކުރުމަށް ބޭއްވި ޖަލްސާގައި ޑރ. މުހައްމަދު ޝަހީމް އަލީ ސައީދު ވާހަކަފުޅު ދައްކަވަނީ
ކޮންމެ މީހަކީ ކުރިއެރުމާއި ތަރައްޤީއަށް ދަހިވެތިވެފައިވާ މީހަކަށް ވާންޖެހޭނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީންގެ ރަނިންމޭޓް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އާދިއްތަ ދުވަހުގެ ރޭ މެލޭޝިއާގައި ދިރިއުޅޭ ދިވެހިންނާއި ބައްދަލު ކުރައްވާ ވާހަކަފުޅު ދައްކަވަން ޝަހީމް ވިދާޅުވީ، ބޭރު ޤައުމުތަކުގައި ހުންނަ ފަދަ ބޮޑެތި އިމާރަތްތަކާއި ތަހުޒީބީ މުޖުތަމައަކާއި ތަރައްޤީ ދިވެހިރާއްޖެއިން ވެސް ފެނުމަށް އެދިވަޑައިގަންނަވާ ކަމަށެވެ.
"އަޅުގަނޑުމެން ވެސް ބޭނުންވޭ ސިންގަޕޫރް މެލޭޝިއާ ފަދަ ޤައުމުތަކުން މި ފެންނަ ބޮޑެތި އިމާރާތްތަކާއި ތަހުޒީބު މުޖުތަމައުއެއް، ކުރިއެރުމާ ތަރައްޤީ އަޅުގަނޑުމެންގެ މުޖުތަމައު އިން ވެސް ފެންނަން. ސިޔާސީ ހަލަބޮލިކަމާއި ނޭއްގާނީކަމާއި އެކަކު އަނެކަކަށް އަދާވާތްތެރިވުމާ ރުޅިވެރިކަން މިއީ އަޅުގަނޑުމެންގެ ތެރެއިން ފުހެލަންޖެހޭނެ ކަންކަން. ކޮންމެ ޕާޓީއެއްގައި ހުރި މެމްބަރެއް ކަމުގައިވިޔަސް ޤައުމުދެކެ ލޯބިވާ ރާއްޖޭގެ ހަމަޖެހުމަށް އިސްކަންދޭ ކުރިއެރުމާއި ތަރައްޤީއަށް ދަހިވެތިވެފައިވާ މީހަކަށްވާން ޖެހޭ"، ޝަހީމް ވިދާޅުވިއެވެ.
ޝަހީމް ވިދާޅުވީ އަންނަ ސެޕްޓެމްބަރު މަހު އޮންނަ ރިޔާސީ އިންތިހާބަކީ ރާއްޖޭގެ މުސްތަޤްބަލް ކަނޑައަޅާނެ މުހިންމު އިންތިހާބެއް ކަމަށާއި އެ އިންތިހާބަކީ ބޭރު ޤައުމުތަކުގެ ނުފުޒޫ ދައުލަތުގެ މައްޗަށް ހުރި ވަގުތެއްގައި ބޭއްވޭ ހައްސާސީ އިންތިހާބެއް ކަމަށެވެ.
މެލޭޝިއާގައި ކިޔަވާ ދަރިވަރުންނާ މެދު ބޮޑެތި އުންމީދުތަކެއް ރައީސް ޔާމީން ކުރައްވާކަން ފާހަގަކުރައްވާ ޝަހީމް ވިދާޅުވީ، އުމްރާނީ ތަރައްޤީ ދެމެހެއްޓުމަށްޓަކައި ރައީސް ޔާމީން ހިންގަވާ ބޮޑެތި މަޝްރޫޢުތައް ދެމެހެއްޓުމުގައި އެ ކިޔަވާ ކުދިންގެ އެހީތެރިކަމަށް އެމަނިކުފާނު އެދިވަޑައިގަންނަވާ ކަމުގައެވެ. އެގޮތުން ރައީސް ޔާމީންއަށް ރިޔާސީ އިންތިހާބު ކާމިޔާބު ކޮށްދެއްވުމަށް އެ ކުދިން މަސައްކަތް ކޮށްދިނުމަށް ޝަހީމް އެދިވަޑައިގަތެވެ.
މި ރިޔާސީ އިންތިހާބު ރައީސް ޔާމީން ކާމިޔާބު ކުރައްވާނެކަމުގެ ފުރިހަމަ ޔަޤީންކަން އޮތް ކަމަށް ވިދާޅުވެ ޝަހީމް ވިދާޅުވީ، ރައީސް ޔާމީން އިންތިހާބު ކާމިޔާބު ކުރެއްވުމަށްފަހު ދިވެހިރާއްޖެ ތަރައްޤީ އާއި ކުރިއެރުމާއި ދިމާލަށް ހަލުވި ދުވެލީގައި ދާ މަންޒަރު އެންމެނަށް ވެސް ފެންނާނެ ކަމަށެވެ.
ރައީސް ޔާމީންގެ ތައުލީމީ ސިޔާސަތަށް ކޮންމެ ޒުވާނަކު ފަހުރުވެރިވާންޖެހޭނެ ކަމަށާއި އެތައްހާސް ތައުލީމީ ފުރުސަތުތަކެއް އެމަނިކުފާނު ހުޅުއްވައިދެއްވި ކަމަށް ޝަހީމް ވިދާޅުވިއެވެ.
ޝަހީމް އިތުރަށް ވިދާޅުވީ، އިންތިހާބު ކާމިޔާބު ކުރުމަށްފަހު ރައީސް ޔާމީން މެލޭޝިއާގައި ދިވެހިރާއްޖޭގެ ސަޤާފީ މަރުކަޒެއް ހުޅުވުމުގެ ކަންތައް ވަރަށް ބާރު މިނެއްގައި ކުރިއަށް ގެންދަވާނެ ކަމަށާއި އަދި އެ ސެންޓަރު މެދުވެރިކޮށް މެލޭޝިއާގައި ދިރިއުޅޭ އާއިލާތަކަށް އިސްލާމް މާއްދާ އާއި ދިވެހި މާއްދާ ކިޔަވައިދޭނެ ކަމަށެވެ.
"ރައީސް ޔާމީން މަސައްކަތްޕުޅު ކުރައްވަނީ ދިވެހި ރައްޔިތުންނަށްޓަކައި، މާތްވެގެންވާ އިސްލާމްދީނުގެ މަތިވެރި އުސޫލުތަކާއި މަތިވެރި އަހްލާޤް ރާއްޖޭގައި ދެމިއޮތުމުގެ މައްޗަށް އެމަނިކުފާނުގެ ސިޔާސަތުތައް ކަނޑައެޅިފައި މި ވަނީ. އެހެންކަމުން ދިވެހި ރައްޔިތުން އެކަތިގަނޑަކަށްވެ މި އިންތިހާބު ރައީސް ޔާމީންއަށް ކާމިޔާބު ކޮށްދިނުމަށްޓަކައި މަސައްކަތް ކުރަންވީ ދަނޑިވަޅުކަމުގައި ދެކެން" ޝަހީމް ވިދާޅުވިއެވެ.
ކޮންމެ ކުއްޖަކީވެސް ތައުލީމް ހާސިލްކުރުމަށްފަހު ޤައުމަށް ހިދުމަތްކުރާނެ ކުއްޖަކަށް ހެދުމަށް އެކުދިންގެ މައިންބަފައިން މަސައްކަތް ކޮށްދިނުމަށް ޝަހީމް އެދިވަޑައިގެންނެވިއެވެ.
