ނޮވެމްބަރު 17 ވެގެންދާނީ އާ މިނިވަން ދުވަހަކަށް: އައިޝާ
މުހިއްމު މަސައްކަތަކީ މާދައާއަށް ތައްޔާރުވުން ކަމަށް ވިދާޅުވި
އައިޝަތު ނަހުލާ: ރާއްޖެ ގޮވަނީ އިސްރާފެއް ނެތް ވެރިކަމަކަށް ކަމަށް ވިދާޅުވި
މިއަހަރުގެ ނޮވެމްބަރު މަހުގެ 17 ވަނަ ދުވަސް ވެގެންދާނީ އާ މިނިވަން ދުވަހަކަށް ކަމަށާއި އެ ދުވަހާއެކު އާ މިނިވަން ކަމެއް ލިބިގެންދާނެ ކަމަށް ޖުމްހޫރީ ޕާޓީގެ ފައުންޑަރ ގާސިމް އިބްރާހިމްގެ ހަގު އަނބިކަނބަލުން އަދި އެޕާޓީގެ ކައުންސިލް މެމްބަރު އައިޝަތު ނަހުލާ ވިދާޅުވެއްޖެއެވެ.
ޖުމްހޫރީ ޕާޓީގެ 10 ވަނަ އަހަރީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަފުޅު ދައްކަވަމުން އައިޝާ ވިދާޅުވީ ރާއްޖެއަށް އަންނަމުންދާ ބަދަލުތަކާ އެކު، ސިޔާސީ އުދަރެހަށް ވަރަށް ބޮޑެތި ބަދަލުތަކެއް އަންނާނެ ކަމަށާއި ރާއްޖޭގެ ސިޔާސީ ޗާޓު އަލުން ކުރަހާލުމަށް ފުރުސަތު ލިބޭނެ ކަމަށެވެ. އަދި ވިދާޅުވީ މާދަމާއަށް ތައްޔާރުވުމަކީ ޖުމްހޫރީ ޕާޓީން ފަށަންވީ އެންމެ މުހިއްމު މަސައްކަތް ކަމަށެވެ.
އައިޝާ އިޝާރާތް ކުރެއްވި މިއަހަރުގެ ނޮވެމްބަރު 17 ވަނަ ދުވަހަކީ މި ހިނގާ ރިޔާސީ ދައުރު ނިމި، އާ ރިޔާސީ ދައުރެއް ފެށިގެންދާ ދުވަހެވެ.
"އިދާރަ ކުރެއްވިއްޔާ ނޮވެމްބަރު މަހުގެ 17 ވަނަ ދުވަސް ވެގެންދާނީ އަޅުގަނޑުމެންނާ އާ މިނިވަން ދުވަހެއް، އާ މިނިވަން ކަމެއް ލިބިގެންދާނެ ދުވަހަކަށް. އަޅުގަނޑު ދެކޭ ގޮތުގައި ދިވެހިރާއްޖެއަށް މި އަންނަ ބަދަލާއެކު، ސިޔާސީ އުދަރެހަށް ވަރަށް ބޮޑެތި ބަދަލުތަކެއް އަންނާނެ. ގައުމުގެ ސިޔާސީ ޗާޓު އަލުން ކުރަހާލުމަށް ފުރުސަތު ލިބޭނެ،" އައިޝާ ވިދާޅުވިއެވެ.
"އޮއިވަރު ބަދަލުވެ، މިއުޒިކު ބަދަލުވާނެ، ނެވިކަން އާވެ، ހެވިކަން ބަދަލުވާނެ. ޝައްކެއް ނެތް އެ ދުވަހަށް، ނުވަތަ މާދަމާއަށް ތައްޔާރުވުމަކީ މިއަދު ޖުމްހޫރީ ޕާޓީން ފަށަންވީ އެންމެ މުހިއްމު މަސައްކަތް."
ޖުމްހޫރީ ޕާޓީގެ ކައުންސިލް މެމްބަރުކަން ވެސް ކުރައްވަމުން ގެންދަވާ އައިޝާ ވިދާޅުވީ ރާއްޖެ ގޮވަމުން ދަނީ ހެޔޮ ވެރިކަމަކަށް ކަމަށާއި އިސްރާފެއް ނެތް ވެރިކަމަކަށް ކަމަށެވެ.
ގާސިމަށް ތައުރީފު ކުރައްވައި ވާހަކަފުޅު ދައްކަވަމުން އައިޝާ ވިދާޅުވީ ޖުމްހޫރީ ޕާޓީ އުފެއްދުމުގެ ކުރިން ވެސް ޖުމްހޫރީ ފިކުރު ރާއްޖެއަށް އުފަންވެފައިވާ ކަމަށެވެ. އެގޮތުން 1980ގެ ކުރީކޮޅު ގާސިމާ އެކު، ރާއްޖެއަށް ޑިމޮކްރަސީ ގެނައުމަށާއި ހެޔޮވެރިކަމެއް ގެނައުމަށް ކުރި މަސައްކަތަކީ ޖުމްހޫރީ ފިކުރު ކަމަށެވެ.
"އަށްޑިހައިގެ އަހަރުތަކުގެ ކުރީކޮޅު ރާއްޖެއަށް ޑިމޮކްރަސީއާއި ހެޔޮވެރިކަމެއް ގެނައުމަށް މި ޕާޓީން ފެއްޓެވި މަސައްކަތްޕުޅަކީ ހަގީގީ ޖުމްހޫރީ ފިކުރު. މި ޕާޓީގެ ބާނީ ފެއްޓެވި މަސައްކަތްޕުޅަކީ ހަގީގީ ޖުމްހޫރީ ފިކުރު. އޭގެ ފަހުން ރާއްޖޭގައި އުފެދުނު ސިޔާސީ ޕާޓީއަކާއި ބޭއްވުނު ހުރިހާ އިންތިހާބަކާއި ގެނެވުނު ހުރިހާ އިސްލާހަކާއި އިސްލާހީ ބަދަލުތަކުގައި އެންމެ މުހިއްމު ހިއްސާދާރަކީ އޮނަރަބަލް ގާސިމް އިބްރާހިމް،" އައިޝާ ވިދާޅުވިއެވެ.
އައިޝާ ދެއްކެވި ވާހަކަފުޅަށް އިޝާރާތް ކުރައްވައި ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު އެ ޖަލްސާގައި ވާހަކަފުޅު ދައްކަވަމުން ވިދާޅުވީ ޖުމްހޫރީ ފިކުރަކީ މާ ކުރިން އުފެދިގެން އައި ފިކުރެއް ކަމަށެވެ.
"މެޑަމް އައިޝާ ވިދާޅުވި ފަދައިން، ޖުމްހޫރީ ފިކުރަކީ އޭގެ މާކުރިން ރާއްޖޭގައި އުފެދިގެން އައި ފިކުރެއް. ޖުމްހޫރީ ޕާޓީއަކީ ގާސިމް އިބްރާހިމް މި ގައުމަށް އިސްލާހީ ހެޔޮ ބަދަލުތަކެއް ގެނައުމަށް ކުރެއްވި މަސައްކަތުގެ ތެރެއިން އުފެދިގެން އައި ޕާޓީއެއް. އެމަނިކުފާނު އެ މަސައްކަތް ފެއްޓެވީ މެޑަމް އައިޝާ ވިދާޅުވި ފަދައިން 1980ގެ ކުރީކޮޅު." އިބޫ ވިދާޅުވިއެވެ.
ސިޔާސީ ދާއިރާއަށް ނުކުމެވަޑައިގެންނެވި ސަބަބާ ގުޅޭ ގޮތުން ވާހަކަފުޅު ދައްކަވަމުން، އައިޝާ ވިދާޅުވީ ގައުމު އެދި ގޮވާ ބަދަލު އަވަސް ކުރެވޭނީ އަންހެނުން ކުރީ ސަފަށް ޖެހިގެން ކަަމަށެވެ. އަދި ވިދާޅުވީ އިންތިހާބުތައް ކާމިޔާބު ކުރުމާއި ގައުމީ ނިންމުންތައް ނިންމުމުގައި އަންހެނުންގެ ބައިވެރިވުން އޮންނަންވާނެ ކަމަށެވެ.
ޖުމްހޫރީ ޕާޓީގެ 10 އަހަރުގެ ހަޔާތުގައި ތަފާތު ތަޖުރިބާތަކެއް ކުރެވިގެން ހިނގައްޖެކަން ފާހަގަ ކުރައްވައި، އައިޝާ ވިދާޅުވީ ވޭތުވެދިޔަ ދުވަސްތަކަކީ ހިތާމަ އާއި ފުން އަސަރުތަކެއް ގާސިމްގެ އާއިލާއަށް ކުރި ދުވަސްތަކެއް ކަމަށެވެ.
"ޖުމްހޫރީ ޕާޓީގެ ހަޔާތުން ވޭތުވެދިޔަ 10 އަހަރަކީ ވަރަށް ތަފާތު ތަޖުރިބާތަކެއް ކުރެވިގެންދިޔަ ދުވަސްތަކެއް. އުފަލާއި ހިތާމައާއި ފުން އަސަރުތަކެއް ޕާޓީއަށާއި ހުދު، ގާސިމްގެ އާއިލާއަށާއި އަޅުގަނޑުމެންގެ ކުދިންނަށް ކުރުވި ދުވަސްތަކެއް. ގާސިމަކީ ދަރިންނަށް ވަރަށް ގާތް ބައްޕައެއް. އޯގާތެރި ފިރިއެއް. ގާސިމް އަޅުގަނޑުމެންގެ ގާތު އެއް ފަސްގަނޑެއްގައި ނެތުމަކީ އަޅުގަނޑުމެން ވަރަށް ހިތާމަ ކުރާ ކަމެއް،" އައިޝާ ވިދާޅުވިއެވެ.
