ރިލްވާނަށް އިންސާފު ހޯދުމަށް މެދުކެނޑުމެއްނެތި މަސައްކަތް ކުރާނަން: ސިވިކަސް

ނޫސްވެރިޔާ އަހުމަދު ރިލްވާން އަބްދުﷲ ގެއްލުވާލި މައްސަލައިގައި އިންސާފު ހޯދުމަށް މެދުކެނޑުމެއްނެތި މަސައްކަތްކުރާނެ ކަމަށް ފަރުދުންގެ ހައްގުތައް ކަށަވަރުކުރުމަށް މަސައްކަތްކުރާ ބައިނަލްއަގްވާމީ ޖަމިއްޔާއެއް ކަމަށްވާ ސިވިކަސްއިން ބުނެފިއެވެ.

ރިލްވާން ގަދަކަމުން ފޮރުވި މައްސަލައިގައި ޓެރަރިޒަމްގެ ދައުވާ އުފުލި ހި. ހިލްޓަން އާލިފް ރައޫފް އާއި ގދ. ވާދޫ ކަރަންކާގޭ މުހައްމަދު ނޫރައްދީންގެ މައްޗަށް އެ ދައުވާ ސާބިތުނުވާކަން މިއަދު ފާހަގަކޮށް ސިވިކަސްއިން ނެރުނު ބަޔާނެއްގައި ވަނީ މި ޝަރީއަތުގެ ހުކުމާއިމެދު ވަރަށް ބޮޑަށް ހިތްހަމަނުޖެހޭ ކަމަށެވެ.

މިކަމާއި ގުޅިގެން ވާހަކަ ދައްކަމުން ސިވިކަސްގެ ސިވިކް ސްޕޭސް ރިސާޗް އޮފިސަރ ޖޯސެފް ބެނެޑިކްޓް ވިދާޅުވީ ކުށެއް ކުރުމަށް ފަހު ސަލާމަތް ވެވޭނެކަމުގެ ޔަގީންކަން ރާއްްޖޭގައި ކުށް ކުރާ މީހުންނަށް އޮންނަ ކަމަށާއި އަދި ސަރުކާރު ޒިންމާދާރު ކުރުވުމަށް މަސައްކަތްކުރަމުންދާ ނޫސްވެރިންނަށް މި ނިންމުމާއެކު ލިބެން ނުޖެހޭ މެސެޖެއް ލިބިގެން ގޮސްފި ކަމަށެވެ.

މި މައްސަލައިގައި ފުލުހުން ކުރި ތަހުގީގުގެ އިތުބާރު ނެތްކަމަށާއި ކުށް ކުރާ މީހުންނަށް އަދަބު ދިނުމަށް ކަނޑައެޅިފައިވާ މުއައްސަސާތަކުން ކުރަމުންދާ މަސައްކަތްތަކާއި މެދު ގިނަ ސުވާލުތަކެއް އުފެދިފައިވާ ކަމަށް ވެސް ބެނެޑިކްޓް ވިދާޅުވިއެވެ.

ހަމައެހެންމެ ރިލްވާނާއި، މަސައްކަތުގެ މާހާއުލުގައި ހަމަލާ ލިބި އެކިއެކި އިންޒާރު ލިބިފައިވާ ނޫސްވެރިންނަށް އިންސާފު ހޯދައިދިނުމަށް މެދުކެނޑުމެއްނެތި ސިވިކަސްއިން މަސައްކަތްކުރާނެ ކަމަށް ބެނެޑިކްޓް ވިދާޅުވިއެވެ. މީގެއިތުރުން ނޫސްވެރިންގެ މަސައްކަތަށް ހުރަސްއެޅުމަށް ކުރަމުންދާ މަސައްކަތް ހުއްޓާލައި ނޫސްވެރިކަމުގެ މިނިވަންކަމާއި އެކު ލިބިދޭންޖެހޭ ހުރިހާ ހައްގުތަކެއް ނޫސްވެރިންނަށް ދޭން ޖެހޭ ކަމަށް ވެސް އޭނަ ވިދާޅުވިއެވެ.

ހުޅުމާލޭގައި ދިރިއުޅެމުންދިޔަ ރިލްވާން 2014 ވަނަ އަހަރުގެ އޮގަސްޓް 8 ވަނަ ދުވަހުގެ ރޭ ގަދަކަމުން ކާރަކަށް ލައިގެން ގެންގޮސް ފޮރުވި ކަމަށްބުނެ ދައުލަތުން ކޮށްފައިވާ ދައުވާ އިން ދެ މީހުން ސަލާމަތްވީ އެ އަމަލު ހިންގުމުގައި ބައިވެރިވި ކަން އެނގޭނެ އެއްވެސް ހެއްކެތް ގަރީނާއެއް ދައުލަތަށް ދެއްކިފައި ނުވާތީ އެވެ.

ސިވިކަސްއަކީ 1993 ވަނަ އަހަރުން ފެށިގެން ފަރުދުންގެ ހައްގުތައް ހިމާޔަތްކުރުމަށް މަސައްކަތްކުރަމުންދާ ބައިނަލްއަގްވާމީ މަދަނީ ޖަމިއްޔާއެކެވެ. ސިވިކަސްގެ މައި އޮފީސް ހުންނަނީ ދެކުނު އެފްރިކާގެ ޖޮހޮނަސްބަރގްގައެވެ. މީގެ އިތުރުން އިނގިރޭސިވިލާތުގެ ލަންޑަނާއި، ސްވިޓްޒަލެންޑްގެ ޖެނީވާގެ އިތުރުން އެމެރިކާގެ ނިއުޔޯކްގައި އެޖަމްއިއްޔާގެ އޮފީސްތައް ޤާއިމްކޮށްފައިވެއެވެ.