ރައީސް ޔާމީންގެ ފަރާތްޕުޅުން އިންސާނިއްޔަތުކަން ފެންނަންޖެހޭ: ދުންޔާ މައުމޫން
3 އޯގަސްޓު 2018 | ހުކުރު 14:01ޚާރިޖީ ސިޔާސަތަށްވެސް ފާޑު ވިދާޅުވި
މި ސަރުކާރުގެ އެންމެ ފުރަތަމަ ޚާރިޖީ ވަޒީރު ދުންޔާ މައުމޫން
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމްގެ ފަރާތްޕުޅުން އިންސާނިއްޔަތުކަން ފެންނަޖެހޭ ކަމަށް މި ސަރުކާރުގެ ފުރަތަމަ ފޮރިން މިނިސްޓަރު ދުންޔާ މައުމޫން ވިދާޅުވެއްޖެއެވެ.
ސްރީލަންކާގެ ޓީވީއަކަށް ދެއްވި އިންޓަވިއުއެއްގައި، ރައީސް ޔާމީނަށް ބޮޑުބޭބެ ވިދާޅުވާ ދުންޔާ ވިދާޅުވީ ހައްގުތައް ކަށަވަރުވެފައިވާ، އެއްވެސް ބިރުވެރިކަމެއް ނެތި އުޅެވޭނެ މާހައުލެއް ދިވެހި ރައްޔިތުން ބޭނުންވާ ކަމަށެވެ. ދުންޔާ ވިދާޅުވި ގޮތުގައި ރައީސް ޔާމީނަކީ ގައުމަށް ޚިދުމަތްތަކެއް ކޮށްދެއްވި ބޭފުޅެކެވެ. ނަމަވެސް ގައުމަށް މިހާރު ދިމާވެފައިވާ ބޮޑެތި މައްސަލަތައް ހައްލު ކުރުމަށް ރައީސް ޔާމީނަކީ ގާބިލު ބޭފުޅެއް ނޫން ކަމަށް ދުންޔާ ވިދާޅުވިއެވެ.
ދިވެހިންނަކީ އެއްބައިވަންތަ ބަޔަކަށް ހެދުމާއި ސިޔާސީ ބޮޑެތި މައްސަލަތައް ހައްލު ކުރުމުގައި ރައީސް ޔާމީން ފެއިލްވެފައިވާ ކަމުގެ ހެއްކެއްގެ ގޮތުން ދުންޔާ ދައްކަވާފައިވަނީ އެކަމަނާގެ ބައްޕާފުޅު ކުރީގެ ރައީސް މައުމޫން ހިމެނިވަޑައިގަންނަވާ ގޮތަށް ގިނަ ސިޔާސި ފަރާތްތައް ޖަލުގައި ތިބުމާއި މަޖިލީސް ނުހިނގާ އޮތުމާއި 12 މެންބަރެއްގެ ގޮނޑީގެ މައްސަލައެވެ.
ދުންޔާ ވިދާޅުވީ ރައީސް ޔާމީންގެ ޚިދުމަތްތަކުގެ ސަބަބުން އިގްތިސާދީ ހާލަތު ރަނގަޅުވުމާއި ފަތުރުވެރިކަން ކުރިއެރި ނަމަވެސް އަނެއް ފަރާތުގައި ހުރި ބޮޑެތި ކަންބޮޑުވުންތަކަށްވެސް ވިސްނާލަންޖެހޭ ކަމަށެވެ. އެގޮތުން ދަރަނި ބޮޑުވުމާއި އެ އަދާކުރުމުގެ ގާބިލުކަން ހުރި ކަމާމެދު ސުވާލު އުފެދޭ މައްސަލަތައް ހުރި ކަމަށް ދުންޔާ ވިދާޅުވިއެވެ.
މި ސަރުކާރުން އަވައްޓެރި ޤައުމުތަކާއި ދުރުވެ މިހާރު ގެންގުޅެމުންދާ ޚާރިޖީ ސިޔާސަތުތަކާއިމެދުވެސް ދުންޔާ ވަނީ ފާޑު ވިދާޅުވެފައެވެ. އެގޮތުން ސަރަހައްދީ ހަމަޖެހުމަށް ބަލާއިރު އިންޑިޔާ އާއި ޗައިނާ ދެމެދު އޮންނަ ގުޅުން ހަމަހަމަކޮށް ގެންދިޔުމުގެ ސިޔާސަތެއް އޮންނަން ޖެހޭ ކަމަށް ދުންޔާ ވިދާޅުވިއެވެ.
ރައީސް ޔާމީންގެ ސިޔާސަތުތަކަށް ދުންޔާ ފާޑު ވިދާޅުވެފައިވާއިރު، ފެބްރުއަރީ 1 ގައި ސުޕްރީމް ކޯޓުން ނެރުނު އަމުރާ ގުޅިގެން ބައްޕާފުޅު މައުމޫން ހައްޔަރުކޮށް ފުލުހުންނަށް ފޯނެއް ނުދެއްވިކަމުގެ ދައުވާ ސާބިތުގެ އަހަރަކަށް ވުރެ ގިނަ ދުވަހުގެ ހުކުމެއް ވަނީ އައިސްފަ އެވެ. އަދި ޕީޕީއެމުން 12 މެމްބަރުން ވަކިވެ، އިދިކޮޅާ ގުޅުނު ފަހުން ދުންޔާގެ ކޮއްކޮ ފާރިސް މައުމޫން ވެސް ގެންގުޅެމުން ދަނީ ޖަލުގަ އެވެ.
