ދިވެހިރާއްޖޭގެ ގައުމީ ޔުނިވާރސިޓީގެ ފެކަލްޓީ އޮފް އާރޓްސްގެ ޑީންގެ މަގާމަށް އާސިމް އަބްދުއްސައްތާރު އައްޔަން ކޮށްފިއެވެ.
ގައުމީ ޔުނިވާސިޓީގައި ބުދަ ދުވަހު ބޭއްވި ރަސްމިއްޔާތެއްގައި ޔުނިވާސިޓީގެ ވައިސް ޗާންސެލާ ޑރ. އަލީ ފަވާޒް ޝަރީފް ވަނީ އާސިމް އަށް ޑީންކަމުގެ މަގާމުގެ ލިޔުން ހަވާލު ކޮށްދެއްވާފައެވެ.
ދިވެހިރާއްޖޭގެ ގައުމީ ޔުނިވާރސީޓީގެ އެކި މަގާމުތައް ފުރުއްވާފައިވާ އާސިމް ވަނީ ފެކަލްޓީ އޮފް އެޑިއުކޭޝަންގެ ޑީންގެ މަގާމް ވެސް ފުރުއްވާފައެވެ. މީގެ އިތުރުން ޔުނިވާރސިޓީގެ އެސިސްޓެންޓް ލެކްޗަރާގެ މާގާމު ވެސް ވަނީ އަދާކޮށްފައެވެ.
ފެކަލްޓީ އޮފް އާރޓްސްގެ ޑީންގެ މަގާމާއި ހަވާލުވުމަށް ފަހު އާސިމް ވިދާޅުވީ ފެކަލްޓީ ކުރިއެރުވުމަށް ގިނަ މަސައްކަތެއް ކުރާނެ ކަމަށާއި، އާކޯސްތައް ތައާރަފުކޮށް މިހާރު ހިންގަމުންދާ ކޯސްތަކުގެ ފެންވަރު މަތި ކުރުމަށް މަސައްކަތް ކުރާނެ ކަމަށެވެ.
ތައުލީމީ ދާއިރާއިން މާސްޓާރސް ޑިގްރީ ހާސިލް ކުރައްވާފައިވާ އާސިމްއަކީ މިހާރު ވެސް ޔުނިވަރސިޓީ ކައުންސިލްގެ މެންބަރުކަމާއި އެކެޑަމިކް ސެނޭޓްގެ މެންބަރުކަމާއި އެކެޑެމިކް ބޯޑުގެ މެންބަރެކެވެ.
