ރިޔާސީ އިންތިހާބުގައި ހަރަކާތްތެރިވާ ކޮމާންޑަރުންނާ އެކްޓިންގ ކޮމިޝަނަރ ނަވާޒު ބައްދަލު ކުރައްވައިފި
އޮަޕަރޭޝަން "ބްލޫ ވޭވް" ކާމިޔާބުކަމާއި އަމާންކަމާއެކު ނިންމާލަ ދެއްވާނެ ކަމަށް އުއްމީދު ކުރަން: ނަވާޒު
ކޮމާންޑަރުންނާއެކު ބޭއްވެވި ބައްދަލުވުމުގެ ތެރެއިން
އަންނަ ސެޕްޓެމްބަރު މަހުގެ 23 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގެ ސަލާމަތީ ކަންކަން ބެލެހެއްޓުމުގައި ހަރަކާތްތެރިވާ ފުލުހުންގެ ކޮމާންޑަރުންނާ، އެކްޓިންގ ކޮމިޝަނަރ އޮފް ޕޮލިސް އަބްދުﷲ ނަވާޒު ބައްދަލު ކުރައްވައިފިއެވެ.
އިސްކަންދަރު ބިލްޑިންގގައި ބުދަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުން ނަވާޒް ވަނީ ރިޔާސީ އިންތިހާބުގެ ކަންކަން އަމާންކަމާއިއެކު ކުރިއަށް ގެންދިއުމަށް ފުލުހުން ކުރަންޖެހޭ ކަންކަން ފުރިހަމައަށް ކުރުމާއި، ރަށްރަށުގެ އަމަން އަމާންކަން ދެމެހެއްޓުމަށް ދުރާލާ ކުރަންޖެހޭ ކަންކަން ދެނެގަނެ ރައްޔިތުންނާއި ގުޅިގެން މަސައްކަތްކުރުމަށް ކޮމާންޑަރުންނަށް އިރުޝާދު ދެއްވާފައެވެ.
ކޮމާންޑަރުންނާއެކު ބޭއްވެވި ބައްދަލުވުމުގެ ތެރެއިން
ކޮންމެ ކޮމާންޑަރެއްގެ ވެސް އަމާޒަކަށް ވާންވީ އިންތިހާބުގެ ކަންކަން އަމާންކަމާއި ސުލްޙަވެރިކަމާއެކު ނިންމާލުމަށް ކަމަށާއި ރިޔާސީ އިންތިހާބާ ގުޅިގެން ފުލުހުން ކުރިއަށް ގެންދާ އޮޕަރޭޝަނަކީ ކާމިޔާބު އޮޕަރޭޝަނަކަށް ވެގެންދާނެ ކަމަށް އުއްމީދު ކުރައްވާކަމަށް ވެސް ނަވާޒް ވިދާޅުވިއެވެ.
އެ ބައްދަލުވުމުގައި ރިޔާސީ އިންތިހާބާ ގުޅިގެން ފުލުހުން ކުރިއަށް ގެންދާ އޮަޕަރޭޝަން "ބްލޫ ވޭވް" ގެ ކޮމާންޑަރު އެސިސްޓަންޓް ކޮމިޝަނަރ އޮފް ޕޮލިސް ހަމްދޫން ރަޝީދު އާއި ޑެޕިއުޓީ ކޮމާންޑަރު ޗީފް ސްޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް އާއި ފުލުހުންގެ އެގްޒެކެޓިވް އޮފިސަރުންނާއި އިންތިހާބުގެ ސަލާމަތީ ކަންކަން ބެލެހެއްޓުމަށް ކުރިއަށް ގެންދާ އޮޕަރޭޝަންގައި އަތޮޅުތަކަށް ދިއުމަށް ހަމަޖެހިފައިވާ ކޮމާންޑަރުންނާއި މާލޭގައި ކޮމާންޑަރުންގެ ގޮތުގައި ހަރަކާތްތެރިވާ އޮފިސަރުން ބައިވެރިވެލެއްވިއެވެ.
