ތުރުކީ އާއި ޕާކިސްތާނުގެ ގުޅުން އައު ހަރުފަތަކަށް ގެންދެވޭނެ ކަމަށް އުންމީދު ކުރަން: ޣުރުދުޣާން

ޕާކިސްތާނުގައި ދާދިފަހުން ބޭއްވި އާއްމު އިންތިޚާބު ކާމިޔާބު ކުރެއްވި އަދި އެގައުމުގެ ބޮޑުވަޒީރު ކަމުގެ ހުވާ ކުރެއްވުމަށް ތައްޔާރުވެ ވަޑައިގަންނަވަމުންދާ ކުރީގެ މަޝްހޫރު ކްރިކެޓް ކުޅުންތެރިޔާ އިމްރާން ޚާން އަށް ތުރުކީގެ ރައީސް ރަޖަބް ރަޖަބް ތައްޔިބު ޣުރުދުޣާން މަރުހަބާ ވިދާޅުވެއްޖެއެވެ.

ތުރުކީ އާއި ޕާކިސްތާނުގެ ގުޅުން އައު ހަރުފަތަކަށް ގެންދެވޭނެ ކަމަށް އުންމީދުކުރައްވާ ކަމަށް ރައީސް ޣުރުދުޣާން، ފޯން މެދުވެރިކުރައްވައި އިމްރާން ޚާން އަށް ވިދާޅުވި ކަމަށް ރިޕޯޓުތައް ބުނެއެވެ. އަދި އިމްރާން ޚާން އަށް ހެޔޮ އެދިވަޑައިގަންނަވާ ކަމަށާއި އިމްރާން ޚާން އެކުލަވާލަން މަސައްކަތްޕުޅު ކުރައްވާ ކޯލިޝަން ސަރުކާރަށް ފަހިކަން އެދިވަޑައިގަންނަވާ ކަމަށް ޣުރުދުޣާން ވިދާޅުވި ކަމަށް ރިޕޯޓުތައް ބުނެއެވެ.

މަޝްހޫރު ކްރިކެޓް ކުޅުންތެރިޔާ އިމްރާން ޚާން އަންނަ އޯގަސްޓް 11 ގައި ޕާކިސްތާނުގެ ބޮޑުވަޒީރު ކަމުގެ ހުވާކުރައްވަން ހަމަޖެހިފައިވާއިރު، ހުވާކުރުމުގެ ރަސްމިއްޔާތަށް އިންޑިއާގެ ބޮޑު ވަޒީރު ނަރެންދުރަ މޯދީ ހިމެނޭ ގޮތުން ސާކް ގައުމުތަކުގެ ލީޑަރުންނަށް ދައުވަތު އަރުވަން ވިސްނަމުން ގެންދާ ކަމަށް ވެސް ރިޕޯޓުތައް ބުނެއެވެ.

އިމްރާން ޚާންގެ ޕާކިސްތާން ތަހްރީކީ އިންސާފް (ޕީޓީއައި) އަށް އާއްމު އިންތިޚާބުގައި 116 ގޮނޑި ލިބިފައި ވެއެވެ. އެެހެން ނަމަވެސް މިއީ ސަރުކާރެއް އެކުލަވާލެވޭނެ ވަރެއް ނޫނެވެ. ޕާކިސްތާނުގެ ގާނޫނު ހަދާ މަޖިލީހުގެ އަގުލަބިއްޔަތެއް ހޯދައި އެއް ޕާޓީއަކުން ސަރުކާރެއް އެކުލަވާލުމަށްޓަކައި 137 ގޮނޑި ބޭނުން ވެއެވެ. އެންމެ ފަހުގެ ރިޕޯޓުތައް ބުނާ ގޮތުން އިމްރާން ޚާންގެ ޕީޓީއައި އަށް މިހާރު ވަނީ ކޯލިޝަން ސަރުކާރެއް އެކުލަވާލެވޭ ވަރަށް ގޮނޑިތައް ހަމަވެފައެވެ.

އިމްރާން ޚާންގެ ޕީޓީއައިއާ އެންމެ ގާތުން ވާދަކުރި، މަގާމުން ދުރުކުރެވިފައިވާ ކުރީގެ ބޮޑު ވަޒީރު ނަވާޒް ޝަރީފްގެ ޕީއެމްއެލް-އެން ޕާޓީ ލިބިފައި ވަނީ 66 ގޮނޑިއެވެ. ޕާކިސްތާން ޕީޕަލްސް ޕާޓީ އަށް ލިބިފައި ވަނީ 43 ގޮނޑިއެވެ.