ކޮމިޝަނަށް ހުށައަޅާ ފޯމްތަކުގެ ސައްޙަކަން ކަށަވަރުކުރާނަން: އިލެކްޝަންސް
30 ޖުލައި 2018 | ހޯމަ 06:00ރީ-ރަޖިސްޓްރޭޝަން ފޯމް ހުށައެޅުމުގައި އޮޅުވާލުންތައް ހުރިކަމުގެ ޝަކުވާތައް އެ ކޮމިޝަނަށްވެސް ލިބޭ
އިލެކްޝަންސް ކޮމިޝަނުގެ ރައީސް އަހުމަދު ޝަރީފް، އެމްޑީޕީގެ ޗެއަރޕާސަންގެ ނައިބް އަލީ ނިޔާޒާއި ސަލާމްކުރައްވަނީ
އިލެކްޝަންސް ކޮމިޝަނަށް ހުށައަޅާ ރީ-ރަޖިސްޓްރޭޝަން ފޯމްތަކުގެ ސައްހަކަން ކަށަވަރުކުރާނެކަމަށް އިލެކްޝަންސް ކޮމިޝަނުން ބުނެފި އެވެ.
އޮޅުވާލައިގެން ރީ-ރަޖިސްޓްރީ ކުރާކަމުގެ ޝަކުވާތައް ބޮޑުވެފައިވާއިރު އިލެކްޝަންސް ކޮމިޝަނުން ބުނީ، ރީ-ރަޖިސްޓްރޭޝަން ފޯމް ހުށައެޅުމުގައި އޮޅުވާލުންތައް ހުރިކަމުގެ ޝަކުވާތައް އެ ކޮމިޝަނަށް ވެސް ލިބެމުން އަންނަކަމަށެވެ. އެހެންކަމުން އެ ކޮމިޝަނަށް ހުށައެޅޭ ހުރިހާ ފޯމެއްގެ ސައްހަކަން ކަށަވަރުކުރާނެކަމުގެ ފުރިހަމަ ޔަޤީންކަންދޭކަމަށެވެ.
އޮޅުވާލައިގެން ރީ-ރަޖިސްޓްރީ ކުރާކަމުގެ ޝަކުވާތައް ލިބެމުންއަންނަކަމަށް އިލެކްޝަންސް ކޮމިޝަނުން ބުނެފައިވާއިރު، ސަރުކާރުގެ މިނިސްޓްރީތަކުންނާއި ކުންފުނިތަކުން މުވައްޒިފުންނަށް މަޖުބޫރުކުރުވައިގެން ރީ-ރަޖިސްޓްރީކުރާކަމަށް މުވައްޒަފުން ގެންދަނީ ބުނަމުންނެވެ. އަދި ރަޖިސްޓްރީކުރަން ގެންނަ ފޯމުގައި ވޯޓުލާ މަރުކަޒުގެ ނަން ވެސް ޖަހާފައި ނޯންނަކަމަށާއި، ވޯޓުލާ މަރުކަޒު ވެސް ކަނޑައަޅަނީ މިނިސްޓްރީތަކާއި ކުންފުނިތަކުގެ އެޗްއާރު ޑިޕާޓްމެންޓުންކަމަށް މުވައްޒިފުން ދަނީ ބުނަމުންނެވެ.
އޭގެ އިތުރުން ރީ-ރަޖިސްޓްރޭޝަންގެ ކަންކަން މިނިސްޓްރީތަކުން ކުރިއަށްގެންދާތީވެ ގިނަ ބަޔެއްގެ ފާޑުުކިޔުންތައް ސިވިލް ސާރވިސް ކޮމިޝަނަށް އަމާޒުވެފައިވެއެވެ. އިލެކްޝަންސް ކޮމިޝަނުން ވަނީ މިނިސްޓްރީތަކުގެ މަސައްކަތްތަކަށް ތާއީދުކުރައްވާކަމަށް ވިދާޅުވެފައެވެ.
