އިދިކޮޅު ކޯލިޝަނުން މިއަދުވެސް އިލެކްޝަންސް ކޮމިޝަނަށް!
22 ޖެނުއަރީ 2018 | ހޯމަ 08:54ކޮމިޝަނަށް ދިޔައީ އެ ކޮމިޝަނުގެ މެންބަރުންނާ ބައްދަލުކުރުމަށް
އިދިކޮޅު ކޯލިޝަނުން އިއްޔެ ވަނީ އިލެކްޝަންސްގެ މެންބަރުންނާ ބައްދަލުކުރެއްވުމަށް އެދި ހަތަރު ލީޑަރުންގެ ސިޓީއެއް ހަވާލުކޮށްފައި
އިދިކޮޅު ކޯލިޝަނުގެ ބައެއް މެމްބަރުން ހޯމަދުވަހު ވެސް އިލެކްޝަންސް ކޮމިޝަނަށް ވަޑައިގެންފި އެވެ.
ރާއްޖެއެމްވީއަށް މައުލޫމާތު ދެއްވަމުން އެމްޑީޕީގެ ޗެއާޕާސަންގެ ނާއިބު އަލީ ނިޔާޒު ވިދާޅުވީ އާދިއްތަ ދުވަހު އެބޭފުޅުން އެ ކޮމިޝަނަށް ވަޑައިގެން ތިއްބެވީ، އެ ކޮމިޝަނުގެ މެންބަރުންނާ ބައްދަލުކުރުމުގެ ފުރުސަތު ލިބޭތޯ ކަމަށެވެ. އަދި ބައްދަލު ވަންދެއް ނުވަތަ އޮފީސް ބަންދު ކުރަންދެން ތިއްބަވާނެ ކަމަށް އޭނާ ވިދާޅުވިއެވެ.
ތިމަރަފުށީ ދާއިރާގެ މެންބަރު މުހައްމަދު މުސްތަފާ ކުރެއްވި ޓްވީޓެއްގައި، ހެޔޮއެދޭ ހުރިހާ ފަރާތްތަކުން އެބޭފުޅުންނަށް އެއްބާރުލުން ދެއްވުމަށް ކޮމިޝަން ހުންނަ ސަރަހައްދަށް ވަޑައިގެންދެއްވުން ގޮވާލައްވައިފައިވެ އެވެ.
ގޮނޑިގެއްލިފައިވާ ކަމަށް އެ ކޮމިޝަނުން ކަނޑައަޅާފައިވާ ރައްޔިތުންގެ މަޖިލީހުގެ 12 މެންބަރުންގެ މައްސަލައިގައި އެ ކޮމިޝަނުގެ މެންބަރުންނާ ބައްދަލުކުރެއްވުމަށް އެދި އިދިކޮޅު ހަތަރު ލީޑަރުންގެ ފަރާތުން ވެސް ކޮމިޝަނަށް ސިޓީއެއް ވަނީ ހުށަހަޅުއްވައިފަ އެވެ.
އިދިކޮޅު ކޯލިޝަނުން ކޮމިޝަނުގެ މެންބަރުންނާއި ބައްދަލުކުރެއްވުމަށް އެދި ވަޑައިގަތުމުން އެ ކޮމިޝަނުން ވަނީ އެބޭފުޅުންނަށް ސިޓީއެއް ހަވާލުކުރައްވާފައެވެ.
ކޮމިޝަންގެ ސިޓީގައި ބުނެފައިވަނީ، މެންބަރުންގެ މައްސަލައިގައި ކޮމިޝަންގެ މެންބަރުންނާއި ބައްދަލުކުރެއްވުމަށް އެދިފައިވާ އެޕއިންޓްމެންޓް ހަމަޖެއްސުމަށް ޖަލްސާއަކަށް އެޖެންޑާ ކުރުމަށްފަހު ޖަވާބެއް ދެއްވާނޭކަމަށެވެ. އެހެންނަމަވެސް އިދިކޮޅު ކޯލިޝަނުން ބުނީ ސިޓީ އެޑްރެސް ކުރައްވާފައި އޮތީ ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހިމްއަށް އެކަނިކަމަށެވެ.
އިލެކްޝަންސް އިން މިއަދު ދިން ޖަވާބު
ގޮނޑިގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ 12 މެންބަރުންގެ ގޮނޑީގެ މައްސަލައިގައި ސުޕްރީމް ކޯޓުން އަދިވެސް ސާފު ގޮތެއް ކަނޑައަޅާފައެއް ނުވެއެވެ. މިކަން އެ މެންބަރުން ދަނީ ކަންބޮޑުވުމާއިއެކު ފާހަގަކުރައްވަމުންނެވެ.
