އިންތިޚާބު ކާމިޔާބުކުރާނީ ދައުލަތުގެ ވަޞީލަތްތައް ބޭނުން ކޮށްގެންކަމަށް އަބްދުއްރަހީމް ވިދާޅުވެއްޖެ!
އަބްދުއްރަހީމް ވިދާޅުވީ އެއީ ޑިމޮކްރަސީގައި އޮންނަ ގޮތްކަމަށް
ފޮނަދޫ ދާއިރާގެ މެމްބަރު އަބްދުއްރަހީމް
މިއަހަރު ބާއްވާ ރިޔާސީ އިންތިޚާބު ރައީސް އަބްދުﷲ ޔާމީން ކާމިޔާބު ކުރައްވާނީ ސަރުކާރުގެ ވަސީލަތްތަކާއި މީހުން ބޭނުންކޮށްގެންކަމަށް ވެރިކަންކުރާ ޕާޓީ ޕީޕީއެމްގެ ނާއިބު ރައީސް އަދި ފޮނަދޫ ދާއިރާގެ މެމްބަރު އަބްދުއްރަޙީމް އަބްދުﷲ ވިދާޅުވެއްޖެއެވެ.
ޕީޕީއެމް. އިން މާލޭގައި ހުޅުވި ކެމްޕޭން ޖަގަހައެއް ހުޅުވުމުގެ ރަސްމިއްޔާތުގައި އަންގާރަ ދުވަހުގެރޭ ވާހަކަ ދައްކަވަމުން އަބްދުއްރަހީމް ވިދާޅުވީ ގިނަ ޕާޓީތައް އެކުލެވޭ ޑިމޮކްރެސީގެ ނިޒާމެއްގައި ވެރިކަންކުރާ ޕާޓީއިން ދެވަނަ ނުވަތަ އިތުރު ދައުރެއް ހޯދަން މަސައްކަތް ކުރާނީ ސަރުކާރުގެ ވަސީލަތްތަކާއި މަގާމުތަކުގައި ތިބި މީހުން ބޭނުންކޮށްގެން ކަމަށެވެ. އަދި އިދިކޮޅު ފަރާތްތަކަށް މަލްޓި ޕާޓީ ޑިމޮކްރަސީ ނޭނގޭކަމަށް އަބްދުއްރަހީމް ސިފަކުރެއްވިއެވެ.
ޕީޕީއެމްގެ ކެމްޕޭން ހަރަކާތްތައް ސަރުކާރުގެ އިސް ބޭފުޅުން ސަރުކާރުގެ އޮފީސްތަކާއި އިދާރާތަކުގައި ހިންގަވާ މައްސަލައިގައި ވެސް އަންގާރަ ދުވަހު ހަވީރު ބޭއްވި ނޫސްވެރިންގެ ބައްދަލުވުމެއްގައި އަބްދުއްރަޙީމް ވިދާޅުވީ ސަރުކާރު ހިންގާ ޕާޓީ އިން އެކަން ކުރާނެކަމަށާއި، އެ އޮފީސްތަކާއި ކުންފުނިތަކުގައި އިސްކޮށް ތިއްބަ ވަނީ ޕީޕީއެމް އިން އައްޔަންކޮށްފައި ތިއްބަވާ ބޭފުޅުންކަމަށެވެ.
އަބްދުއްރަހީމްގެ ވާހަކަފުޅާއި ގުޅިގެން އެވާހަކަތައް ތަހުޤީގުކުރުމަށް އިދިކޮޅު ގިނަ ފަރާތްތަކުން ވަނީ އިލެކްޝަންސް ކޮމިޝަނަށާއި އޭސީސީ. އަށް ގޮވާލާފައެވެ. ސަރުކާރުގެ ވަޞީލަތްތައް ބޭނުންކުރައްވާ ކަމަށާއި، އަދި ކުރިއަށް އޮތްތަނުގައި ވެސް ކެމްޕޭނަށް ބޭނުން ކުރައްވާނޭ ކަމަށް އަބްދުއްރަހީމް އިއުތިރާފްވެ ވަޑައިގެން ފައި މިވަނީ ޕީޕީއެމް. އިން ކެމްޕޭނުގައި ސަރުކާރުގެ ވަޞީލަތްތައް ބޭނުން ކުރާކަމަށް އިދިކޮޅު ޕާޓީތަކުން އެތައް ފަހަރަކު ބުނެފައި ވަނިކޮށެވެ. އަދި މިއިން މައްސަލައެއް ބަލާކަމެއް އެންޓިކޮރަޕްޝަން ކޮމިޝަނުން މިހާތަނަށް ހާމަ ކޮށްފަ އެއް ނުވެއެވެ.
ކެމްޕޭން ކުރުމުގެ އިތުރުން ސަރުކާރުގެ އޮފީސްތަކުންނާއި ކުންފުނިތަކުން ރީ ރަޖިސްޓްރީ ކުރުމުގައި މަޖުބޫރު ކުރުންތަކެއް ގެންގުޅޭކަމުގެ ޝަކުވާތައް ކުންފުނިތަކުގެ މުވައްޒަފުން ދަނީ ކުރަމުންނެވެ. އަބްދުއްރަހީން ވިދާޅުވީ 70 ވަރަކަށް ހާސް ރައްޔިތުން ރީ ރަޖިސްޓަރ ކުރަން ޖެހޭއިރު އޭގެ ތެރެއިން 56 ހާސް ރައްޔިތުން ރީރަޖިސްޓަރ ކުރާނީ ޕީޕީއެމް. އިން ކަމަށެވެ.
