މިއަހަރުގެ ސެޕްޓެމްބަރު މަހު ބޭއްވުމަށް ނިންމާފައިވާ ރިޔާސީ އިންތިޚާބަކީ މިނިވަން އިންސާފްވެރި އިންތިޚާބަކަށް ހެދުމަށް ގޮވާލައި އިދިކޮޅު ފަރާތްތަކުން ބޭއްވި މުޒާހަރާގެ އަޑާއި މަންޒަރު ރައްޔިތުންނާ ހަމައަށް ގެނެސްދިނުމަށް ފުލުހުން ހުރަސްއަޅައިފިއެވެ.
ހޯމަ ދުވަހު އިލެކްޝަންސް ކޮމިޝަންުގެ ދޮރުމައްޗަށް އެއްވެ ސުލްހަވެރިކަމާއެކު ޝުއޫރު ފާޅު ކުރަމުން ދިޔައިރު ރާއްޖެ ޓީވީގެ ނޫސްވެރިން ދިޔައީ އެމަންޒަރުތަކާއި އަޑު ވަގުތުން ރައްޔިތުންނާ ހަމައަށް ގެނެސްދިނުމަށް މަސައްކަތް ކުރަމުންނެވެ.
އެމަސައްކަތް ކުރަމުން ދަނިކޮށް އެސްއޯ ފުލުހުންގެ ޓީމެއް އައިސް ރާއްޖެ ޓީވީގެ ކެމެރާމަން ވަނީ މަންޒަރު ފެންނަ ވަރަށްވުރެ ދުރަށް ޖައްސައި އެސަރަހައްދުން ފޮނުވާލާފައެވެ. އޭރު އެސަރަހައްދުން ޢާއްމުން ވެސް ދުރައްޖައްސާފައި ނުވުމުގެ އިތުރުން މީހަކު ހައްޔަރުކޮށްފައެއް ވެސް ނުވެއެވެ.
ސުލްހަވެރިކަމާއެކު މުޒާހަރާ ކުރަމުން ދިޔަ މީހުން ގޮވާލާފައި ވަނީ އިލެކްޝަންސް ކޮމިޝަންގެ ރައީސް އަހުމަދު ޝަރީފަކީ ޕީޕީއެމްގެ މެމްބަރެއް ކަމަށާއި، އޭނާ ހުރެގެން މިނިވަން އިންސާފުވެރި އިންތިހާބެއް ނުލިބޭނެ ކަމަށެވެ. އަދި ވޯޓުން ވައްކަން ނުކުރުމަށާއި ސެޕްޓެމްބަރު 23 ގައި ބާއްވާ ރިޔާސީ އިންތިހާބަކީ އެންމެނަށް ގަބޫލުކުރެވޭ އިންސާފުވެރި އިންތިހާބަކަށް ހެދުމަށެވެ. މީގެއިތުރުން މުޒާހަރާގެ ބައިވެރިން ވަނީ އެމީހުންގެ ޝުޢޫރު ފާޅުކޮށް ބޯޑުތަކެއް ވެސް ގެންގުޅެފައެވެ.
