ވޯޓު ފޮށިތައް ބެހެއްޓުމަށް ދެކޮޅު ހަދާ ރިސޯޓުތައް ހޯދުމަށްފަހު އެ ރިސޯޓުތަކާ ދެކޮޅަށް ފިޔަވަޅު އެޅުމަށް ކުރީގެ ބަންޑާރަ ނައިބު އަދި މަޝްހޫރު ގާނޫނީ ވަކީލް، ހުސްނުއް ސުއޫދު ގޮވާލައްވައިފިއެވެ.
ސުއޫދު މިގޮތަށް ގޮވާލައްވާފައިވަނީ ބައެއް ރިސޯޓުތަކުން ވޯޓު ފޮށިތައް ބެހެއްޓުމަށް ދެކޮޅު ހަދާފައިވާކަން އިލެކްޝަންސް ކޮމިޝަނުން ހާމަކުރުމާއި ގުޅިގެން، ހޯމަ ދުވަހު ކުރެއްވި ޓުވީޓެއްގައެވެ.
ސުއޫދު ކުރެއްވި ޓްވީޓެއްގައި ވިދާޅުވީ ވޯޓުލުމުން އެ ރިސޯޓުތަކުގައި މަސައްކަތްކުރާ މުވައްޒިފުން މަހްރޫމް ކުރުމަށް މަސައްކަތްކުރާ ރިސޯޓުތައް ހޯދަން ޖެހޭކަމަށެވެ. އެރިސޯޓުތަކުގައި މަސައްކަތް ކުރުން ވެސް ހުއްޓުވަން ޖެހޭ ކަމަށް ސުއޫދު ވިދާޅުވެފައި ވެއެވެ.
Let's find out the resorts who are refusing to place ballot boxes at their islands for the workers to vote #mpe2018. Need to organize a work stoppage across all resorts who are refusing to place ballot boxes. https://t.co/3hztSMM5DP
— Husnu Al Suood (@hsuood) July 23, 2018
އިލެކްޝަންސް ކޮމިޝަނުން ފުރަތަމަ އިއުލާން ކުރީ އެންމެ ހަތް ރިސޯޓުގައި ވޯޓުފޮށި ބެހެއްޓުމަށެވެ. ނަމަވެސް ގިނަ ބަޔަކު ފާޑުކިޔަން ފެށުމުން އީސީން ވަނީ 100 މީހުނަށް ވުރެ ގިނަ މީހުން މަސައްކަތް ކުރާ ކޮންމެ ރިސޯޓެއްގައި ވޯޓު ފޮށި ބަހައްޓާނެ ކަން އިއުލާން ކޮށްފައެވެ.
އިލެކްޝަންސް ކޮމިޝަންގެ ރައީސް އަހުމަދު ޝަރީފް އާދީއްތަ ދުވަހު ވިދާޅުވީ ގިނަ ރިސޯޓުތަކުން އެދެނީ ވޯޓުފޮށި ނުބެހެއްޓުމަށް ކަމަށެވެ.
ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ޝަރީފް ވިދާޅުވީ ބޭނުންވެއްޖެ ނަމަ އެރިސޯޓްތައް ހާމަކުރައްވާނެ ކަމަށެވެ.
