އެމްޑީޕީގެ ޗެއާޕާސަން އިންތިހާބުގެ ވޯޓުލުން ފަށައިފި އެވެ. މި އިންތިހާބުގައި ރައީސް މުހައްމަދު ނަޝީދު ވަނީ ކޮލަމްބޯގައި ވޯޓް ލައްވައިފަ އެވެ. 

ދިވެހިރާއްޖޭގެ އެންމެ ބޮޑު އެއް ސިޔާސީ ޕާޓީގެ ޗެއާޕާސަންގެ މަގާމް ހުސްވީ ކުރިން އެމަގާމުގައި ހުންނެވި އަލީ ވަހީދު އިސްތިއުފާ ދެއްވުމުމުނެވެ. އެ މަގާމަށް ކުރިމަތިލައްވާފައި ވަނީ އެމްޑީޕީ ސަރުކާރުގެ ޔޫތު މިނިސްޓަރު އަދި ރައީސް ނަޝީދުގެ ގާނޫނީ ވަކީލުންގެ ޓީމުގައި ހިމެނިވަޑައިގަންވާ އަލްއުސްތާޒް ހަސަން ލަތީފް އެކަންޏެވެ.

 ޗެއާޕާސަންގެ އިންތިހާބުގެ ވޯޓުލުން މީހުން ދިރިއުޅޭ ކޮންމެ ރަށެއްގަ އާއި ސްރީ ލަންކާގެ ކޮލަމްބޯގައި ހުކުރު ދުވަހު މެންދުރު 2:00 އިން އިރުއޮއްސި 6:00 އަށް ކުރިއަށް ދާނެ ކަމަށް އެމްޑީޕީން ބުނެ އެވެ. އަތޮޅުތެރޭގެ ރަށްތަކުގައި ވޯޓްލުން ކުރިއަށް ގެންދިއުމަށް ނިންމާފައިވަނީ އެމްޑީޕީގެ ހަރުގެތަކުގައެވެ.

މާލޭގައި ދިރިއުޅުންވާ އެޕާޓީގެ މެމްބަރުން ވޯޓްލުމަށް ޖުމްލަ 7 ވޯޓް ފޮށި ވަނީ ބަހައްޓައިފައެވެ.

މާލޭގައި ވޯޓް ފޮށިތަށް ބެހައްޓާފައިވާ ސަރަހައްދުތަށް

• މާފަންނު ދެކުނު އަދި މެދު ދާއިރާގެ ވޯޓް ފޮށި ބެހެއްޓިފައި ހުންނާނީ މ.ރާޅުފު (ޖަވާހިރުމަގު، ކޮރަލް ހޮޓެލް ކުރިމަތި) ގައެވެ.
• މައްޗަންގޯޅި އުތުރު އަދި ދެކުނު ގެ ވޯޓް ފޮށި ހުންނަނީ ކެފެއިނާ ( އިސްކަންދަރު މަގު) ގައެވެ.
• ހެންވޭރު އުތުރު، މެދު އަދި ދެނުކު ދާއިރާގެ ވޯޓްފޮށި ބެހެއްޓިފައި ހުންނަނީ ހ. ރަބީއީ މަންޒިލް ( ސޯސަންމަގު) ގައެވެ.
• މާލޭގައި ދިރިއުޅޭ އައްޑޫ އަދި ފުވައްމުލަކު މެމްބަރުންނަން ހާއްސަކޮށްފައިވާ  ވޯޓްފޮށި ބެހެއްޓިފައި ހުންނަނީ އެމްޑީޕީ އޮފީސް ގްރައުންޑު ފްލޯގައެވެ.
• މާލޭގައި ދިރިއުޅޭ އަތޮޅުތެރޭގެ ރައްޔިތުންނަން ހާއްސަކޮށްގެން ބައްހައްޓާ ވޯޓް ފޮށިތަށް ބެހެއްޓިފައި ހުންނަނީ އެމްޑީޕީ ހަރުގޭގައެވެ.
• ވިލިމާލޭގައި ވޯޓް ފޮށި ވިލިމާލޭ އެމްޑީޕީ ހަރުގޭގައި ބެހެއްޓުމަށް ނިންމާފައިވާއިރު ހުޅުމާލޭގެ ވޯޓްފޮށި ބެހެއްޓުމަށް ހަމަޖެހިފައި ވަނީ ފިތުރޯނު މަގު ހުންނަ ވޯޓަރސްޕޯޓް ކައިރީގައެވެ.

ސްރީ ލަންކާގައި ވޯޓްލުން ކުރިއަށް ގެންދިއުމަށް ނިންމާފައި ވަނީ 10/69 އޯލްޑް ނާވަލަ ރޯޑް، ނުގޭގޮޑާގަ އެވެ. 

ހަސަން ލަތީފު އެ މަގާމަށް ހޮވިވަޑައިގަންނަވާނީ އެންމެ މަދުވެގެން އެމްޑީޕީގެ މެމްބަރުންގެ ތެރެއިން 5،000 މެމްބަރުންގެ ތާއިދު ލިބުމުންނެވެ.

މަގާމަށް ހޮވިވަޑައިގެންފި ނަމަ، ޕާޓީގެ ހިންގުން ހަރުދަނާކޮށް، އިންތިހާބުތައް ކާމިޔާބުކުރަން މަސައްކަތް ކުރައްވާނެ ކަމަށް އޭނާ ވަނީ ވިދާޅުވެފަ އެވެ.