ރައީސާއި ގުޅުންހުރި ތަންތަން ފާސްކޮށް ޚިޔާނާތުގެ 80 މިލިއަން ޑޮލަރުގެ މައްސަލަ ތަހުގީގުކޮށްދިނުމަށް އެދި ފުލުހަށް!
ޖިނާއީ ފުރިހަމަ ތަހުގީގެއް ހިންގުމަށް އެމްޑީޕީން ފުލުހަށް ވަނީ ހުށައަޅާފައި
ކުރީގެ ނާއިބު ރައީސް އަހުމަދު އަދީބާއި އެކު ރައީސް ޔާމީން އަދި މިނިސްޓަރު ޝައިނީ
ރައީސާއި ގުޅުންހުރި ތަންތަން ފާސްކޮށް ޚިޔާނާތުގެ 80 މިލިއަން ޑޮލަރުގެ މައްސަލަ ތަހުގީގުކޮށްދިނުމަށް އެދި އެމްޑީޕީން ފުލުހުންނަށް މައްސަލަ ހުށައަޅައިފިއެވެ.
އެމްޑީޕީން އާދިއްތަ ދުވަހު ނެރުނު ބަޔާނެއްގައި ބުނެފައި ވަނީ، ރައީސް ޢަބްދުﷲ ޔާމިނުގެ ކުރީގެ ނާއިބު ރައީސް އަޙްމަދު އަދީބު ކްރިމިނަލް ކޯޓުގެ ޝަރީޢަތުގެ މަޖިލީހުގައި އާދިއްތަ ދުވަހު ހާމަކުރެއްވި ވާހަކަފުޅުތަކާ ގުޅިގެން، ރައީސް ޢަބްދުﷲ ޔާމިނު ދިރުއުޅުއްވާ ތަންތަނާއި، އެމަނިކުފާނުގެ ހަވާލުގައިވާ ތަންތަން ބަލައި ފާސްކޮށް، ސީރިއަސް ކަމާއެކު އެ މައްސަލައިގެ ފުރިހަމަ ޖިނާޢީ ތަޙްޤީޤެއް ވަގުތުން ހިންގެވުމަށް ފުލުހުންނަށް ގޮވާލާކަމަށެވެ.
ކްރިމިނަލް ކޯޓުގައި އާދިއްތަ ދުވަހު އޮތް ޝަރީޢަތުގެ މަޖިލީހުގައި ރައީސް ޢަބްދުﷲ ޔާމިނުގެ ކުރީގެ ނާއިބު ރައީސް އަޙްމަދު އަދީބު ހާމަކުރެއްވި ވާހަކައިގެ ތެރޭގައި މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން އެމްއެމްޕީއާރުސީ. ގެ ޚިޔާނާތުގެ 80 މިލިއަން އެމެރިކާ ޑޮލަރު ރައީސް ޢަބްދުﷲ ޔާމިނުގެ އަމިއްލަ ގެކޮޅު ކަމުގައިވާ ގ. ދޫވެއްސަށް ވައްދައި އެ ފައިސާ ގުނާފައިވާ ކަމަށާއި، އަދި ފައިސާ ގުނުމަށް ޚާއްޞަކުރެވިފައިވާ ކޮޓަރިއެއް އެގޭގައި ހުންނަ ކަމަށާއި، އަދި އެފައިސާގެ ތެރެއިން އެއް މިލިއަން އެމެރިކާ ޑޮލަރު ރައީސް ޢަބްދުﷲ ޔާމިނުގެ އަމިއްލަފުޅު އެކައުންޓަށް ވެސް ޖަމާކުރައްވާފައިވާ ކަމަށް ހާމަކުރައްވާފައިވެއެވެ. އަދި މިވާހަކަތައް ނުދެއްކެވުމަށް ރައީސް ޢަބްދުﷲ ޔާމިނު، އަޙްމަދު އަދީބުގެ އަރިހުން އެދިވަޑައިގެންފައި ވާކަމަށް ވެސް ޝަރީޢަތުގެ މަޖިލީހުގައި އަހުމަދު އަދީބު ހާމަކުރެއްވިއެވެ.
މި ބަޔާނުގައި އިތުރަށް ބުނެފައި ވަނީ، އެ ވާހަކަތައް ރައީސް ޢަބްދުﷲ ޔާމިނުގެ ކުރީގެ ނާއިބު ރައީސް އަޙްމަދު އަދީބު ކްރިމިނަލް ކޯޓުގެ ޝަރީޢަތުގެ މަޖިލީހުގައި މިއަދު ހާމަކުރައްވާފައި ވާތީ އާއި، އަދި ރައީސް ޢަބްދުﷲ ޔާމިނުގެ އަމިއްލަފުޅު އިޢުތިރާފު ލިބިފައިވާ ކަންކަން ހުރުމާއެކު، އެމްޑީޕީން އާދިއްތަ ދުވަހު ފުލުސް އޮފީހަށް ހުށަހެޅި މައްސަލައިގައި އެދިފައިވާ ގޮތަށް ރައީސް ޢަބްދުﷲ ޔާމިނު ދިރުއުޅުއްވާ ތަންތަނާއި، އެމަނިކުފާނުގެ ހަވާލުގައިވާ ތަންތަން ބަލައި ފާސްކޮށް، ސީރިއަސް ކަމާއެކު އެ މައްސަލައިގެ ފުރިހަމަ ޖިނާޢީ ތަޙްޤީޤެއް ވަގުތުން ހިންގެވުމަށް ގުޅިފައިވާ ސިޔާސީ ޕާރޓީތަކުން ވެސް މޯލްޑިވްސް ޕޮލިސް ސަރވިސްއަށް ގޮވާލާކަމަށެވެ.
