މެމްބަރު ކަމަށް ކުރިމަތިލުމުގެ ފީ ބޮޑުކުރަން ހުށަހެޅި އިސްލާހު މާދަމާގެ ޖަލްސާގައި ފާސްކުރަނީ
22 ޖުލައި 2018 | އާދީއްތަ 15:51މިހާރު ފީ އަކީ 5000ރ، އިސްލާހުގައި ވަނީ 15000ރ
ސަރުކާރަށް ނިސްބަތްވާ ރައްޔިތުންގެ މަޖިލީހުގެ ބައެއް މެމްބަރުން
ރައްޔިތުންގެ މަޖިލީހުގެ މެމްބަރު ކަމަށް ކުރިމަތިލުމަށް ދައްކަންޖެހޭ ފީ ބޮޑުކުރަން މަޖިލީހުގެ އިންތިހާބުގެ ގާނޫނަށް ސަރުކާރުން ހުށަހެޅި އިސްލާހު ފާސްކުރުމަށް މަޖިލީހުގެ ހޯމަ ދުވަހުގެ ޖަލްސާއަށް އެޖެންޑާ ކޮށްފި އެވެ.
އެ ބިލު ދިރާސާ ކޮށްފައި ވަނީ މަޖިލީހުގެ މިނިވަން މުއައްސަސާތަކުގެ ކޮމެޓީން ނެވެ. އެ ކޮމެޓީން އެބިލް ފާސްކޮށްފައި ވަނީ، ސަރުކާރުގެ ފަރާތުން، ޕީޕީއެމަށް ނިސްބަތްވާ ފަރެސް މާތޮޑާ ދާއިރާގެ މެމްބަރު ހުސައިން މުހައްމަދު ލަތީފް ހުށަހެޅުއްވި ގޮތަށް އެއްވެސް ބަދަލެއް ގެނައުމެއް ނެތި އެވެ.
ހުސައިން ހުށަހެޅުއްވި އެއިސްލާހުގައި ވަނީ މެމްބަރު ކަމަށް ކުރިމަތިލުމަށް މިހާރު ދައްކަންޖެހޭ 5،000ރ. ގެ ބަދަލުގައި 15،000ރ. ދައްކަންޖެހޭ ގޮތަށް ބަދަލު ކުރުމަށެވެ.
މަޖިލީހުގެ މެމްބަރު ކަމަށް ކުރިމަތިލުމުގެ ފީ ބޮޑުކުރަން ސަރުކާރުން ހުށަހަޅައި ފާސްކުރުމުގެ ކަންކަން ކުރިއަށްދާއިރު، ރިޔާސީ އިންތިހާބަށް ކުރިމަތިލުމުގެ ފީ ވެސް 40،000ރ. އިން 100،000ރ. އަށް ބޮޑުކުރުމަށް ރިޔާސީ އިންތިހާބުގެ ގާނޫނަށް އިސްލާހު ހުށަހަޅައި، ދާދިފަހުން ވަނީ ފާސްކޮށްފަ އެވެ.
އެ ބިލު މަޖިލީހަށް ހުށަހެޅުއްވީ ވެސް ހުސައިން އެވެ. ރައީސް އަބްދުﷲ ޔާމީން އަބްދުލްގައްޔޫމް އެ ބިލް ތަސްދީގު ކުރެއްވުމާއެކު މިހާރު ދަނީ އެ އިސްލާހަށް އަމަލު ކުރަމުން ނެވެ.
