ގާސިމާ ގުޅޭ ގޮތުން ރައީސް ޔާމިން ދެއްކެވި ވާހަކަފުޅަށް ވަކީލުން ރައްދު ދީފި!

ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ޤާސިމް އިބްރާހީމަކީ ކޯޓުތަކުގައި ހިންގަވާ އެންމެ ކުރު މަގުން އިންސާފާ ހަމައަށް ދާން ވަރަށް ފަރިތަ ބޭފުޅެއް ކަމުގައި ރައީސް އަބްދުﷲ ޔާމިން ވިދާޅުވުމާ ގުޅިގެން ގާސިމްގެ ގާނޫނީ ވަކީލުންގެ ޓީމުން އެ ވާހަކަފުޅަށް ރައްދު ދެއްވައިފިއެވެ.

ރައީސް ޔާމީން މި މަހުގެ 19 ވަނަ ދުވަހު ހދ. ހަނިމާދޫގެ ރައްޔިތުންނާ މުހާތަބުކުރައްވައި ދެއްކެވި ވާހަކަފުޅާ ގުޅިގެން ގާސިމްގެ ގާނޫނީ ވަކީލުން ނެރުނު ބަޔާނުގައި ބުނެފައި ވަނީ ޤާސިމް އިބްރާހީމަކީ ކޯޓުތަކުގައި ހިނގަންވާ އެންމެ ކުރު މަގުން އިންސާފާ ހަމައަށް ދާން ވަރަށް ފަރިތަ ބޭފުޅެއް ކަމުގައި ރައީސް ވިދާޅުވި އިރު، ޤާސިމްގެ މަޞްލަޙަތާ ގުޅިފައިވާ ގިނަ ޢަދަދެއްގެ ބޮޑެތި މައްސަލަތަކެއް ޝަރުޢީ އެކި މަރުޙަލާތަކުގައި އެކި ކޯޓުތަކުގައި މި ވަގުތު ވެސް ހުރީ ކުރިޔަށް ނުގޮސް މަޑުޖެހިފަ ކަމަށެވެ. އޭގެ ތެރޭގައި ކޯޓަށް ހުށަހެޅުނު ފަހުން ތިން އަހަރު އަދި ހަތަރު އަހަރުގެ އިތުރުން ނުވަ އަހަރު ވެފައިވާ މައްސަލަތައް ވެސް ހުރިކަން އެ ބަޔާނުގައި ފާހަގަ ކޮށްފައިވެއެވެ.

އެ ބަޔާނުގައި އިތުރަށް ބުނެފައި ވަނީ އަވަސް ގޮތަކުން ކުރުމަގަކުން ޤާސިމްގެ މައްސަލައެއް މި ފަހުން ނިންމާފައި ވަނީ، ކްރިމިނަލް ކޯޓުން، ކަމަށެވެ. އެއީ ދައުލަތުން ކުރި ދައުވާއެކެވެ. އަދި އެއީ ފަހުގެ ތާރީހެއްގައި އެފަދަ ޖިނާއީ ކުށުގެ ދައުވާއެއްގައި ޣައިރު ހާޒިރުގައި ހުކުމެއް ކުރި ފުރަތަމަ ފަހަރު ވެސް މެއެވެ.

"ޤާނޫނީ އުޞޫލުތަކާ ޚިލާފު ދުސްތޫރީ ހަމަތަކާ މުޅީން އިދިކޮޅު އެ ޙުކުމަކީ އަވަސް ގޮތަކަށް ކުރު މަގުން ދިވެހިރާއްޖޭގެ ކޯޓަކުން މިފަހުގެ ތާރީޚުގައި ނިންމާފައިވާ އިންސާފުވެރި ނޫން ކަމަށް ދިވެހި ރައްޔިތުން ދެކޭ މައްސަލަތަކުގެ ތެރެއިން ފާހަގަކޮށްލެވޭ އެއް މައްސަލައެވެ. އަދި އެމައްސަލަ ނިންމާފައި ވަނީ ޤާނޫނީ އުޞޫލުތަކާ ޚިލާފަށް، ދުސްތޫރީ ހަމަތައް ވެސް މުގުރިގެންދާ ގޮތެއްގައިކަމަށް އަޅުގަނޑުމެން ދެކޭތީ، މައްސަލަ ނިމުނުތާ 10 ދުވަހުގެ ތެރޭގައި މައްސަލަ ވާނީ ޤާސިމް އިބްރާހީމްގެ ފަރާތުން އިސްތިއުނާފަށް ހުށަހަޅާފައެވެ."

ޤާސިމް އިބްރާހީމްގެ މައްޗަށް ޣައިރު ހާޒިރުގައި ޝަރީޢަތް ހިންގައި ކްރިމިނަލް ކޯޓުން މިދިޔަ އަހަރުގެ އޮގަސްޓް 15 ވަނަ ދުވަހު ނެރުނު ޙުކުމް ހައިކޯޓުގައި އިސްތިއުނާފު ކޮށްފައިވާކަން ރައީސުލްޖުމްހޫރިއްޔާ އަށް އެނގިވަޑައިގެންފައި ނުވި ނަމަވެސް އެމައްސަލަ ވަނީ ދިވެހިރާއްޖޭގެ ހައިކޯޓުގައި އިސްތިއުނާފު ކޮށްފައި ކަމަށް އެ ބަޔާނުގައި ބުނެފައި ވެއެވެ. ދަށު ކޯޓުގެ ޝަރީއަތް ހަލުވި މިނެއްގައި ކުރިއަށް ގޮސް ހުކުމް އިއްވި ނަމަވެސް އެ ހުކުމުގެ އިސްތިއުނާފުގެ އެއްވެސް އަޑުއެހުމެއް މިހާތަނަށް ބޭއްވިފައި ނުވާ ކަމަށް އެ ބަޔާނުގައި ފާހަގަ ކޮށްފައި ވެއެވެ. އަދި އެ ބަޔާނުގައި ބުނެފައި ވަނީ ޤާސިމް ބޭސް ފަރުވާއަށް ރާއްޖެއިން ބޭރުގައި ހުންނެވުމަކީ، ޤާސިމްގެ ބައިވެރިވަޑައިގަތުމަކާ ނުލައި ހިންގެވި ޝަރީޢަތެއްގައި ކޮށްފައިވާ ޙުކުމަކާ މެދު މަތީ މަރުޙަލާގެ ކޯޓަކުން ގޮތެއް ނިންމުމަށް އޮތް ހުރަހެއް ކަމުގައި ވާނަމަ، އެކަމުން ވެސް ދަލީލުކޮށްދެނީ އެމަނިކުފާނުގެ ޣައިރު ހާޒިރުގައި ކޮށްފައިވާ ޙުކުމަކީ، ޣައިރު ހާޒިރުގައި ކޮށްފައިވާ ސަބަބަށްޓަކައި އެކަނި ވެސް ބާޠިލުވެފައިވާ ޙުކުމެއް ކަމަށް ބަޔާނުގައި ވެއެވެ.

"ސޯޝަލް މީޑިއާއި ޚަބަރު ފަތުރާ އެހެނިހެން ވަސީލަތްތަކަށް ފަރިތަ ދިވެހި ރައްޔިތުންނަށް މިކަންކަން އޮޅިފައި ނެތް ނަމަވެސް، ޢަބްދުﷲ ޔާމީން ޢަބްދުލްޤައްޔޫމް ރައީސުލްޖުމްހޫރިއްޔާގެ ހައިސިއްޔަތުން ވާހަކަފުޅުދައްކަވަން ވަޑައިގަންނަވާއިރު ދެންނެވުނު މަޢުލޫމާތުތައް ކަމާ ބެހޭ ބޭފުޅުން އެމަނިކުފާނަށް އަރުވާފައި ނެތްކަމީ އަޅުގަނޑުމެން ހިތާމަކުރާ ކަމެކެވެ."