ސިޔާސީ ލީޑަރުންނާއި ކުރީގެ ޕީޖީ މުހުތާޒު އާއި ގާޒީ ނިހާން ދޫކޮށްލުމަށް ގޮވާލާއި ގއ. މާމެންދޫގެ ރައްޔިތުންގެ ހިނގާލުމެއް ބާއްވައިފި!
ހިނގާލުން ބާއްވާފައި ވަނީ ހުކުރު ދުވަހުގެ ހަވީރު 4 އަކުން 6 އަކަށް
ގއ. މާމެންދޫގެ ރައްޔިތުން ބޭއްވި ހިނގާލުން ނިންމާލުމަށްފަހު ފޮޓޯ އަކަށް ހުއްޓިލައިގެން
ބަންދުގައި ތިބި ސިޔާސީ ލިޑަރުންނާއި ކުރީގެ ޕްރޮސެކިއުޓާ ޖެނެރަލް މުހުތާޒު މުހުސިން އާއި އދ. މާމިގިލީ މެޖިސްޓްރޭޓް ކޯޓުގެ ގާޒީ އަހްމަދު ނިހާން ދޫކޮށްލުމަށް ގޮވާލައި ގއ. މާމެންދޫގައި ހިނގާލުމެއް ބާއްވައިފިއެވެ.
މި ހިނގާލުން ބާއްވާފައި ވަނީ ހުކުރު ދުވަހުގެ ހަވީރު 4 އަކުން 6 އަކަށެވެ. ހިނގާލުމުގައި އެ ރަށު ރައްޔިތުން ވަނީ ޕޯސްޓަރު ހިއްފުމުގެ ހަރަކާތެއް ވެސް ކުރިއަށް ގެންގޮސްފައެވެ. އަދި ހިނގާލުން ކުރިއަށްދިޔަ ވަގުތު އެ ރަށުގެ ރައްޔިތުން ވަނީ ޕީޖީ މުހުތާޒު އާއި ގާޒީ ނިހާން ދޫކޮށްލުމަށް އެދި ލިޔެފައިވާ ޕޯސްޓަރުތައް ހިފައިގެން ހިނގާފައެވެ.
މި ހިނގާލުމުގައި އެ ރަށުގެ 150 އަށްވުރެ ގިނަ ރައްޔިތުން ބައިވެރިވެފައިވާއިރު ނިހާން އާއި މުހުތާޒުގެ އާއިލާ އިން ވެސް ވަނީ ހިނގާލުމުގައި ބައިވެރިވެފައެވެ.
ހިނގާލުމާއި ގުޅޭގޮތުން ރާއްޖެއެމްވީ. އަށް މައުލޫމާތު ދެއްވަމުން ގއ. މާމެންދޫ ކައުންސިލްގެ ރައީސް މުހައްމަދު ޒައީމް ވިދާޅުވީ މިހާރު ވެސް އެ ރަށަށް ނިސްބަތްވާ ދެ ބޭފުޅަކު ޖަލުގެ ކުޑަ ގޮޅީގައި ދުވަސްތައް ވޭތު ކުރަމުންދާ ކަމަށާއި އެ ރަށަށް ނިސްބަތްވާ އިތުރު މީހަކު މި ވެރިކަމުގައި ނާ އިންސާފުން ޖަލުގައި ދުވަސްތައް ވޭތު ކުރަމުންދާތަން ބަލަން އެ ރަށުގެ ރައްޔިތުން ނޭދޭ ކަމަށެވެ.
ރައީސުލްޖުމްހޫރިއްޔާގެ ރަނިންގމޭޓް ޑރ. މުހައްމަދު ޝަހީމް އަލީ ސައީދު ނިސްބަތްވެވަޑައިގަންނަ ވަނީ ވެސް ގއ. މާމެންދޫ އަށް ކަން ފާހަގަކުރައްވައި ޒައީމް އިތުރަށް ވިދާޅުވީ ޝަހީމް އަށް ވެވަޑައިގަންނަވާނެ ގޮތަކާމެދު ކަންބޮޑުވެވަޑައިގަންނަވާ ކަމަށެވެ.
މުހުތާޒުގެ މައްޗަށް އުފުލި ޓެރަރިޒަމުގެ ދައުވާ ސާބިތުކޮށް 17 އަހަރަށް ޖަލަށް ހުކުމް ކޮށްފައި ވަނީ 2016 ވަނަ އަހަރުގެ ޖޫން 9 ވަނަ ދުވަހުއެވެ. މުހުތާޒާއި އދ. މާމިގިލީ ކޯޓުގެ ގާޒީގެ މަޤާމުގައި ހުންނެވި އަހުމަދު ނިހާން ޖަލަށްލީ، ކޯޓު އަމުރެއް ބޭނުންކޮށްގެން ރައީސް އަބްދުﷲ ޔާމީން ހައްޔަރުކުރަން އުޅުނު ކަމަށް ބުނާ މައްސަލައެއްގައެވެ.
