7 ރިސޯޓުގައި ވޯޓު ފޮށި ބެހެއްޓުމަށް ނިންމި ނިންމުން ބަލައެއް ނުގަންނަން: ޕީޕީއެމުން
އެކަން ބަދަލުކުރުމަށް އިލެކްޝަންސް ކޮމިޝަނަށް ޕީޕީއެމުން ވަނީ ގޮވާލާފައި
އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ހަތް ރިސޯޓުގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ނިންމި ނިންމުން ބަލައިނުގަންނަކަމަށް، ވެރިކަންކުރާ ޕީޕީއެމުން ބުނެފި އެވެ.
ޕީޕީއެމްގެ ނައިބް ރައީސް އަދި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ކުރެއްވި ޓުވީޓެއްގައި ވިދާޅުވީ ހަމައެކަނި 7 ރިސޯޓުގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ނިންމެވި ނިންމުމަކީ އެންމެ ރަނގަޅު ނިންމުމެއްކަމަށް ޕީޕީއެމުން ގަބޫލުނުކުރާކަމަށެވެ. އަދި އެކަން ބަދަލުކުރުމަށް އިލެކްޝަންސް ކޮމިޝަނަށް ޕީޕީއެމުން ގޮވާލާކަމަށް އޭނާ ވިދާޅުވި އެވެ.
އިލެކްޝަންސް ކޮމިޝަނުން ހާމަކޮށްފައިވާ ގޮތުގައި ރިޔާސީ އިންތިހާބުގައި އެކި ސަރަހައްދު ތަކުގައި މިހާރު ބެހެއްޓުމަށް ކަނޑައަޅާފައިވަނީ 452 ވޯޓް ފޮއްޓެވެ. މާލޭގެ ރަށްވެހިން ވޯޓްލުމަށް ޖުމްލަ 56 ފޮށި ބަހައްޓާއިރު، މާލޭގައި ދިރިއުޅޭ އަތޮޅުތަކުގެ ރައްޔިތުންނަށް ހާއްސަކޮށް 72 ފޮށި ބަހައްޓާނެ އެވެ. އައްޑޫ ސިޓީގައި 31 ވޯޓު ފޮށި ބެހެއްޓުމަށް ވަނީ ހަމަޖެހިފައެވެ.
ރިސޯޓުތަކުގައި ބެހެއްޓުމަށް ހަމަޖެހިފައިވަނީ ހަތް ފޮއްޓެކެވެ. ސިނާއީ މަސައްކަތް ކުރާ ރަށްރަށުގައި ހަ ވޯޓު ފޮށި ބެހެއްޓުމަށް ކަނޑައަޅާފައިވާއިރު ޖަލުތަކުގައި ބެހެއްޓުމަށް ހަމަޖެހިފައިވަނީ ހަތަރު ވޯޓު ފޮއްޓެވެ.
ރިސޯޓުތަކުގެ ތެރެއިން ވޯޓު ފޮށި ބަހައްޓާނީ އެ މީހަކު ރަށްވެހި ވެފައިވާ ރަށް ނޫން ރަށެއްގައި ވޯޓުލުމަށްޓަކައި ރަޖިސްޓަރީވުމަށް އިލެކްޝަންސް ކޮމިޝަނުން ހުޅުވާލާ މުއްދަތުގައި މަދުވެގެން 250 މީހުން ރަޖިސްޓަރީވެފައިވާ ރިސޯޓްތަކުގަ އެވެ. އެ އަދަދަށް މީހުން ހަމަނުވާ ކަމުގައިވާނަމަ ރިސޯޓުތަކުގައި ވޯޓު ފޮށި ނުބެހެއްޓޭނެ ކަމަށް އެ ކޮމިޝަނުން ބުނެއެވެ.
އިލެކްޝަންސް ކޮމިޝަންގެ އެ ނިންމުމާއި ގުޅިގެން ގިނަ ބައެއްގެ ފާޑުކިޔުންތައް ވަނީ އިލެކްޝަންސް ކޮމިޝަނަށް އަމާޒުވެގެންގޮސްފަ އެވެ.
