މަސްތުވާތަކެތީގެ ކުށުގައި ތިބި މީހުންނަށް މައާފުދެވޭގޮތަށް ގަވައިދަށް އިސްލާހު ގެނެސްފި

ހުކުމުގެ ދެ ބައިކުޅަ އެއްބައި ފުރިހަމަ ނުކުރި ނަމަވެސް، މަސްތުވާތަކެތީގެ ކުށުގައި 10 އަހަރަށް ވުރެ ގިނަ ދުވަހުގެ ޖަލު ހުކުމް ތަންފީޒްކުރާ ފަރާތްތަކަށް މައާފުދެވޭގޮތަށް ގަވާއިދަށް އިސްލާހު ގެނެސްފި އެވެ.

މައާފު ދިނުމާއި އަދަބު ލުއިކޮށްދިނުމުގެ ޤާނޫނުގެ ދަށުން އަދަބު ލުއިކޮށްދިނުމުގައި އަމަލުކުރާނެ ގަވައިދަށް ދެ ވަނަ އިސްލާހު ގެނެސް ގެޖެޓް ކޮށްފައިވާއިރު، އެ ގަވައިދަށް ގެނެސްފައި ވަނީ އެންމެ އިސްލާހެކެވެ. އެއީ އެ ގަވައިދުގެ 4 ވަނަ މާއްދާގެ (ހ) ގެ 7 ވަނަ ނަމްބަރު އުނިކުރުމެވެ.

މައާފު ދިނުމާއި އަދަބު ލުއިކޮށްދިނުމުގެ ޤާނޫނުގެ ދަށުން އަދަބު ލުއިކޮށްދިނުމުގައި އަމަލުކުރާނެ ގަވާއިދުގެ 4 ވަނަ މާއްދާގެ (ހ) އަކީ އަދަބު ލުއިކޮށްދިނުމުގައި، އަދަބު ތަންފީޒްކުރަމުންދާ މީހުންގެ އަދަބު ލުއިކޮށްދެވޭނީ އެ މީހަކު ތަންފީޒްކުރަންޖެހޭ ހުކުމުގެ 50 އިންސައްތަ ތަންފީޒްކޮށް ނިމުމުން ކަމަށެވެ. އަދި އެ މާއްދާގެ (ހ) ގެ 7 ވަނަ ނަމްބަރުގައި ވަނީ މައާފު ދެވޭނީ މަސްތުވާތަކެތީގެ ޤާނޫނުގެ ދަށުން 10 އަހަރު ދުވަހަށް ވުރެ ދިގު މުއްދަތަށް އަދަބު ކަނޑއެޅިފައިވާ ކުށްތަކުގައި 50 އިންސައްތަ ތަންފީޒްކޮށް ނިމުންކަމަށެވެ.

އެ މާއްދާ އުނިިކުރުމާއެކު، ހުކުމުގެ 50 އިންސައްތަ ފުރިހަމަ ނުކުރި ނަމަވެސް މަައާފު ދެވޭނެ އެވެ.

މަސްތުވާތަކެތީގެ ކުށުގައި ތިބި މީހުންނަށް މައާފުދެވޭގޮތަށް ގަވާއިދަށް ބަދަލު ގެނައިއިރު، ސަރުކާރުން ގެންދަނީ ޤާނޫނުތަކާއި ގަވައިދުތައް ބަދަލުކޮށް، ކުށްވެރިން މިނިވަންކޮށް، ރިޔާސީ އިންތިހާބަށް ކެމްްޕޭން ކުރަމުންނެވެ. އަދި ވެރިކަންކުރާ ޕީޕީއެމުން ދޮރުން ދޮރަށް ކުރިއަށްގެންދާ ކެމްޕޭނުގައި ކުށްވެރިން މިނިވަންކޮށްދޭނެ ކަމަށް ވައުދުވާ ކަމަށް ވެސް ބައެއް އާންމު ރައްޔިތުން ފާހަގަކޮށްފައިވެއެވެ.