އަމިއްލަ ދަތުރުފުޅެއްގައި އިބޫ އިނގިރޭސިވިލާތަށް ފުރާވަޑައިގެންފި
18 ޖުލައި 2018 | ބުދަ 06:11ވަޑައިގެންނެވީ ދަރިކަނބަލުންގެ ގްރެޖުއޭޝަނަށް
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިހް އައްޑޫ ސިޓީއަށް ކުރެއްވި ދަތުރުފުޅުގެ ތެރެއިން
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ޞާލިޙް އަމިއްލަ ދަތުރުފުޅެއްގައި އިނގިރޭސިވިލާތަށް ފުރާވަޑައިގަންނަވައިފިއެވެ.
އިބޫގެ ތަރުޖަމާން, މައްޗަންގޮޅީ އުތުރު ދާއިރާގެ މެންބަރު މާރިޔާ އަހުމަދު ދީދީ ރާއްޖެ އެމްވީއަށް ވިދާޅުވީ އިބޫ ބުދަ ދުވަހުގެ ހެނދުނުގެ ވަގުތެއްގައި އިނގިރޭސި ވިލާތަށް ފުރާވަޑައިގަންނަވާފައިވާ ކަމަށާއި އެއީ އަމިއްލަ އާއިލީ ދަތުރުފުޅެއް ކަމަށެވެ.
މާރިޔާ ވިދާޅުވީ އިބޫގެ ދަރިކަނބަލުންގެ ގްރެޖުއޭޝަންގައި ބައިވެރިވެވަޑައިގަތުމަށް ކުރައްވާ އެދަތުރުފުޅުގައި ގާތްގަނޑަކަށް ހަފުތާއެއް ހާ ދުވަސް ވާނޭ ކަމަށެވެ. އަދި އެނބުރި ވަޑައިގެންނެވުމަށް ފަހު އަނެއްކާ ވެސް އަތޮޅުތަކަށް ކުރައްވާ ދަތުރުފުޅު ފައްޓަވާނެ ކަމަށް މާރިޔާ ވިދާޅުވިއެވެ.
މިދިޔަ ހަފުތާ ބަންދުގައި އިބޫ ވަނީ އައްޑޫ އާއި ފުވައްމުލަކަށް ވަޑައިގެންފައެވެ. އައްޑޫ ސިޓީ އާއި ފުވައްމުލަކު ސިޓީން ގިނަ ބަޔަކު ވަނީ އިބޫއަށާއި އިބޫގެ ރަނިން މޭޓް ފައިސަލް ނަސީމަށް ހޫނު މަރުހަބާއެއް ކިޔާފައެވެ.
