އިދިކޮޅު ފަރާތްތަކާ މަޝްވަރާނުކޮށް ދެން ސަލާމަތެއް ނުވާނެ: ޝިފާޒު
17 ޖުލައި 2018 | އަންގާރަ 03:55އެމްޑީޕީން ވެސް ބޭނުން ވަނީ މަޝްވަރާ ކޮށްގެން މިކަން ހައްލުކުރަން
އެމްޑީޕީގެ ނައިބް ރައީސް މުހައްމަދު ޝިފާޒް
ޔޫރަޕިއަން ޔޫނިއަނުން ދިވެހި ސަރުކާރުގެ އިސްވެރިންނާ ދެކޮޅަށް އަޅާނެ ފިޔަވަޅަށް އޮތް ހައްލަކީ ސަރުކާރުން އިދިކޮޅު ފަރާތްތަކާއެކު މަޝްވަރާ ކުރުން ކަމަށް އެމްޑީޕީގެ ނައިބް ރައީސް މުހައްމަދު ޝިފާޒް ވިދާޅުވެއްޖެ އެވެ.
ހޯމަ ދުވަހުގެ ރޭ ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ޝިފާޒް ވިދާޅުވީ އެމްޑީޕީން ވެސް ބޭނުން ވަނީ މަޝްވަރާ ކޮށްގެން ކަންކަން ހައްލުކުރަން ކަމަށާއި ބައެއްގެ ފިއްތުން ތަކުގައި ތާށިވެގެން ތިބުމަކީ ރަނގަޅު އަދި ފަސޭހަ ކަމެއް ނޫން ކަމަށެވެ.
ދިވެހިރާއްޖޭގެ މުޅި އިގްތިސާދު ޓޫރިޒަމަށް ބަރޯސާވެފައި އޮންނައިރު އީޔޫއިން ދަތިކުރުމުގެ ފިޔަވަޅު ތަކެއް އަޅައިފިނަމަ މުޅި ދުނިޔެއިން ދިވެހިރާއްޖެ އާއިމެދު ދެކޭ ދެކުން މިހާރަށް ވުރެ ގޯސްވެ މުޅި މުސްތަގްބަލު ގެއްލިގެންދާނެ ކަމަށް ޝިފާޒު ފާހަގަކުރެއްވެވި އެވެ. މުޅި ރާއްޖޭގެ އިގްތިސާދަށް އެކަމުގެ ގެއްލުން ފޯރާނެ ކަމަށް ޝިފާޒު ވިދާޅުވި އެވެ.
އެކަން ހައްލު ކުރުމަށް ހަނި ފުރުސަތެއް އެބަ އޮތް ކަމަށާއި އެއީ ދިވެހި ސަރުކާރުން އިދިކޮޅު ފަރާތްތަކާއިއެކު އަވަހަށް މަޝްވަރާކުރުން ކަމަށެވެ. އެނޫން ގޮތަކަށް މި ރާއްޖެ ދެން ސަލާމަތް ކުރެވެން ނެތް ކަމަށް ޝިފާޒް ވިދާޅުވިއެވެ.
އެ މަޝްވަރާ ވާން ޖެހެނީ ބައިނަލް އަގްވާމީ ފަރާތްތަކުން މެދުވެރިއެއްގެ ރޯލް އަދާކުރާ މަޝްވަރާއެއް ކަމަށާއި އެ މަޝްވަރާ ވާންޖެހޭނީ ވަގުތު ކަނޑައެޅިފައި އޮތް މަޝްވަރާއަކަށް ކަމަށެވެ.
"އެމަޝްވަރާ ވާން ޖެހޭނީ އެ މަޝްވަރާގައި ހިނގަނީ ކޮން ކަމެއްކަން އެނގިގެން ވަގުތު ކަނޑައެޅިގެން ބޭރުގެ ފަރާތްތަކުން ޚާއްސަކޮށް އދ އިން މެދުވެރިއެއްގެ ރޯލް އަދާކުރާ މަޝްވަރައަކަށް،" ޝިފާޒް ވިދާޅުވިއެވެ.
މިއީ ސަރުކާރުން ގަދަބަސް ބުނަންވީ ވަގުތެއް ނޫން ކަން ފާހަގަ ކުރައްވައި ޝިފާޒު ވިދާޅުވީ މިއީ ސަރުކާރުން ފަހަތަށް ފިޔަވަޅެއް އަޅަން ޖެހިފައިވާ ވަގުތެއް ކަމަށެވެ. އަދި މިހާރުން މިހާރަށް ކުރަންޖެހޭ ކަންތައްތައް ބައިވަރު އެބަހުރި ކަމަށާއި އެކަންކަން ކުރުމުން ނޫނީ ދެން މިރާއްޖެ ސަލާމަތް ނުކުރެވޭނެ ކަމަށެވެ.
ސަރުކާރުގެ ވެރިންނާއި ބައެއް ވިޔަފާރިވެރިންނާމެދު ފިޔަވަޅު އަޅާނެ އޮނިގަނޑެއް އީޔޫއިން ހޯމަ ދުވަހު ފާސްކޮށްފައިވާއިރު، އެއީ ސަމާސާއެއް ނޫން ކަމަށް ޝިފާޒު ވިދާޅުވި އެވެ. މިހާރު ރާއްޖެއަށް ލިބިފައި މިވާ ވަގުތު އަތުން ބީވެގެން ހިނގައްޖެ ނަމަ ދެން ގައުމު ވެއްޓިގެންދާ ހާލަތުން އަރައި ނުގަނެވޭނެ ކަމަށް ޝިފާޒު ވިދާޅުވިއެވެ.
