ކެޓްރީނާގެ އުފަންދުވަސް އިނގިރޭސިވިލާތުގައި ފާހަގަކޮށްފި

ބޮލީވުޑްގެ މަޝްހޫރު ތަރި ކެޓްރީނާ ޚާއިފްގެ 35 ވަނަ އުފަން ދުވަސް ހޯމަ ދުވަހު އިނގިރޭސިވިލާތުގައި އާއިލާއާ އެކު ފާހަގަ ކޮށްފިއެވެ.

ކެޓްރީނާގެ މަންމަ ސުޒެއިން ވަނީ، ކެޓްރީނާ ކޭކެއް ހިފައިގެން އިންނަ ފޮޓޯއެއް ސޯޝަލް މީޑިއާގައި ހިއްސާ ކޮށްފައެވެ. އެ ފޮޓޯގެ ކެޕްޝަނެއްގެ ގޮތުގައި ކެޓްރީނާގެ މަންމަ ލިޔެފައި ވަނީ "ދަރިފުޅު ހުރިހާ އެންމެންނަށް ދޭ ލޯތްބާއި، ބަހައްޓާ އޯގާތެރިކަން ދަރިފުޅަށް ވެސް ލިބުމަށް އެދޭ" ކަމަށެވެ.

ކެޓްރީނާ މިދުވަސްކޮޅު ދަނީ އިނގިރޭސިވިލާތުގައި އާއިލާއާ އެކުގައި ޗުއްޓީ ހޭދަކުރަމުންނެވެ. ކެޓްރީނާ ވަނީ އާއިލާގެ މެމްބަރުންނާ އެކުގައި ނަގާފައިވާ ފޮޓޯތައް އިންސްޓާގްރާމްގައި ޝެއަރ ކޮށްފައެވެ.

ކެޓްރީނާ އެނބުރި އިންޑިއާ އަށް ދިއުމަށް ފަހު ދެން އެންމެ އަވަހަށް ކުރާނެ މަސައްކަތަކީ މި އަހަރުގެ ޑިސެމްބަރު މަހު ރިލީޒް ކުރަން ހަމަޖެހިފައިވާ ފިލްމް "ޒީރޯ" ގެ މަސައްކަތެވެ. ޗުއްޓީއަށް ފަހު އެ ފިލްމްގެ ލަވައެއް ޝޫޓް ކުރަން ޖެހޭ ކަމަށް ކެޓްރީނާ ވަނީ ބުނެފައެވެ.

މި ފިލްމްގައި ކެޓްރީނާއާ އެކުގައި ހަރަކާތްތެރިވަނީ ޝާހުރުކްހާންގެ އިތުރުން އަނުޝްކާ ޝަރްމާއެވެ.

މީގެ އިތުރުން މި އަހަރުގެ ނޮވެމްބަރު މަހު ކެޓްރީނާ ހަރަކާތްތެރިވާ ފިލްމް ތަގްސް އޮފް ހިންދުސްތާން ރިލީޒް ކުރުމަށް ވަނީ ހަމަޖެހިފައެވެ.

ކެޓްރީނާގެ ގިނަ ފޭނުންނާއި އެތައް ފަންނާނުން ވަނީ އުފަންދުވަހުގެ ތަހުނިޔާ ކިޔާފައެވެ.

ކެޓްރީނާއަކީ ކުޑަދުވަސްކޮޅެއްގެ ތެރޭގައި އެންމެންގެ ލޯބި ހޯދާފައިވާ ކުޅަދާނަ ތަރިއެކެވެ.