އެމެރިކާގައި އޮޔާ ދިޔަ ދެ ކުދިން ސަލާމަތް ކުރުމަށް އެ ގައުމުގައި ކިޔަވަމުންދާ ސައުދީގެ ދެ ދަރިވަރުން މަސައްކަތް ކުރަމުން ދަނިކޮށް ގެނބިގެން މަރުވެއްޖެއެވެ.
ހުކުރު ދުވަހުގެ އެ ހާދިސާ ހިނގާފައި ވަނީ މެޗަސޫޓަސްގެ ޗިކޮޕީ ކޯރުގައެވެ. ދަރިވަރުންގެ ތިމާގެ މީހަކު ބުނީ، އެ ދަރިވަރުން ދިޔައީ ސިވިލް އިންޖްނިއަރިންގް ކިޔަވަމުން ކަމަށާއި މިހާރު ގާތްގަނޑަކަށް ފަސް އަހަރު ވެފައިވާ ކަމަށެވެ. އަދި ޔުނިވާސިޓީން ގްރެޖުއޭޓްވާ ދުވަސް ކައިރިވެފައިވާއިރު، ކިޔަވަން ފެށީއްސުރެ އާއިލާއަށް އެ ކުދިން ނުފެންނަ ކަމަށާއި އެންމެން ވެސް ދިޔައީ، އެ ކުދިން ގްރެޖުއޭޓް ވެގެން ސައުދީއަށް އެނބުރި އަންނަވާއިރަށް ތައްޔާރުވަމުން ކަމަށެވެ.
އެކުދިންގެ ހަށިގަނޑު މިހާރު އެމެރިކާގެ ކަމާ ބެހޭ މުއައްސަސާތަކުގެ ބެލުމުގެ ދަށުން ދަނީ ސައުދީއަށް ފޮނުވާލުމުގެ މަސައްކަތް ކުރަމުންނެވެ. އެހެން ނަމަވެސް ފުރިހަމަ ކުރަންޖެހޭ އިޖްރާއަތްތަކެއް ހުރުމުން އެ ކުދިންގެ ހަށިގަނޑު ފޮނުވާލުމުގައި ލަސްތަކެއް ވަނީ ވެފައެވެ.
އާއިލާ އާއި އެ ކުދިންނާ ދެމެދު އެންމެ ފަހުން މުއާމަލާތެއް ހިނގާފައި ވަނީ އެ ހާދިސާ ހިނގުމުގެ ދެ ދުވަސް ކުރިން ކަމަށް ރިޕޯޓްތައް ބުނެއެވެ.
ސައުދީގެ ތީބް އަލްޔާމިން (27އ) އާއި ޖަސީރް ދަހަމް އަލްރަޚް (25އ) ގެނބިފައި ވަނީ އެމެރިކާގެ އާއިލާއަކަށް ނިސްބަތްވާ ދެކުދިން އޮޔާދާން ފެށުމުން އެކުދިން ސަލާމަތް ކުރެވޭތޯ އެތައް ބަޔަކު ކުރި މަސައްކަތް އެއްބާރުލުން ދިނުމަށް، އެކަމުގައި ހަރަކާތްތެރި ވަނިކޮށް ކުއްލިއަކަށް އުފެދުނު ބާރުގަދަ އޮއިވަރެއްގައި ދަމައިގަތުމުގެ ސަބަބުންނެވެ.
މަރުވި ދަރިވަރުންގެ އާއިލާއަށް ފުން ހިތާމައެއް މިކަމުގެ ސަބަބުން ލިބިފައިވާއިރު އެ ދަރިވަރުންގެ އާއިލާތައް ދަނީ އެ ކުދިން މަރުވެފައި ވަނީ ވަރަށް މަތިވެރި މަގްސަދެއްގައި ހަރަކާތްތެރިވަނިކޮށް ކަމަށް ބުނެފައި ކަމަށް ރިޕޯޓްތައް ބުނެއެވެ.
