މާވަރުފަޅު ހިއްކުމަށް އެމްޓީސީސީއާ ހަވާލުކޮށްފި

މާލެ އަތޮޅު މާވަރުފަޅު ހިއްކުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އާ ހަވާލުކޮށްފި އެވެ.

ފަތުރުވެރިކަމުގެ މަޝްރޫއެއް ފެށުމަށް މާވަރުފަޅު ގުޑް ކެޗް ޕްރައިވެޓް ލިމިޓެޑުން ގަނެފައިވަނީ މިއަހަރު މެއިމަހުގެ ތެރޭގައެވެ. އެގޮތުން މާވަރު ފަޅުގައި ހަތަރު ރަށް ހިއްކުމަށް އެމްޓީސީސީއާ ހަވާލުކޮށްފައިވަނީ މިދިޔަ ހަފްތާ ތެރޭގައެވެ.

އެމްޓީސީސީއިން ބުނީ މިފަޅު ހިއްކުމުގެ މަސައްކަތް ކުރިއަތް އޮތް 10 ދުވަސް ނުވަތަ 15 ދުވަހުގެ ތެރޭގައި ފަށާނެ ކަމަށެވެ. މި މަސައްކަތުގައި ބޭނުންކުރާނީ ކަޓަރ ސަކްޝަން ޑްރެޖަރުތަކެއް ކަމަށް ވެސް އެމްޓީސީސީން މައުލޫމާތު ދެއެވެ.

ދިގުމިން ތިން ކިލޯމީޓަރު ހުންނަ މާވަރު ފަޅުގައި ފުރަތަމަ ފިޔަވަހީގެ ދަށުން އަށް ހެކްޓަރުގެ ދެ ރަށް ހިއްކާނެ އެވެ. އަދި އެމްޓީސީސީއިން އެމަސައްކަތް 60 ދުވަސް ތެރޭގައި ނިންމަންޖެހެއެވެ.

ގުޑް ކެޗް ކުންފުންނިން ބުނީ މި ދެ ރަށުގައި ފަސް ތަރިއާއި ހަތް ތަރީގެ ހޮޓެލްތައް އަޅާނެ ކަމަށެވެ. އަދި މިއީ ފަތުރުވެރިކަމުގެ ސިނާއަތަށް ލިބޭ އިތުރު ކުރިއެރުމެއް ކަމަށް ވެސް އެކުންފުނިން ދެކެއެވެ.