މޯލްޑިވްސް ވިޒިޓިންގ ގައިޑް ތައްޔާރުކޮށް އިސްތިހާރު ކުރުމަށް ބަޔަކާ ހަވާލުކޮށްފި އެވެ. 

މި ގައިޑް ނެރުމަށް މޯލްޑިވްސް ޕަބްލިކޭޝަން އާއި ލޯކަލްޗާ އާއި ދެމެދު އެއްބަސްވުމުގައި ސޮއިކުރުމުގެ ރަސްމިއްޔާތު ބާއްވާފައިވަނީ ޖެނުއަރީ 15 ވަނަ ދުވަހު ސޯލްޓް ރެސްޓޯރަންޓުގައެވެ.

މި އެއްބަސްވުމުގައި މޯލްޑިވްސް ޕަބްލިކޭޝަންގެ ފަރާތުން އެ ކުންފުނީގެ ސީއީއޯ މަޝްއޫދު އަބްދުﷲ ސޮއިކުރައްވާފައިވާއިރު ލޯކަލްޗާގެ ފަރާތުން ސޮއިކުރެއްވީ ޑިރެކްޓަރ އަބްދުﷲ ނާއިލްއެވެ.

ލޯކަލްޗާގެ ފަރާތުން ވަނީ މޯލްޑިވްސް ވިޒިޓިންގް ގައިޑްގެ ފުރަތަމަ އެޑިޝަން މި ރަސްމިއްޔާތުގައި ލޯންޗުކޮށްފައެވެ. މި ފޮތް ރަސްމީކޮށް ލޯންޗުކޮށް ދެއްވީ މަޓާޓޯގެ ރައީސް އަބްދުﷲ ގިޔާސް ރިޔާޒްއެވެ.

މި ރަސްމިއްޔާތުގައި ވާހަކަ ދައްކަވަމުން ނާއިލް ވިދާޅުވީ މި ފޮތުގައި ރާއްޖޭގެ ފަތުރުވެރިކަމުގެ ދާއިރާ އާއި ބެހޭ ތަފާތު ގިނަ މައުލޫމާތު އެކުލިވެގެންވާނެ ކަމަށެވެ. އެގޮތުން ރާއްޖޭގެ ކެފޭ ރެސްޓޯރަންޓުތަކުން ފެށިގެން ގޮސް ރާއްޖޭގެ މޭޕްވެސް ހިމެނޭ ކަމަށެވެ.

ނާއިލް އިތުރަށް ވިދާޅުވީ ލޯންޗުކުރެވިގެންދިޔަ ކުޑަ ފޮތުގެ ބޭނުމަކީ ރާއްޖެއާބެހޭ މައުލޫމާތު ފަސޭހަކަމާއެކު ފަތުރުވެރިންނަށް ލިބޭނެ މަގު ފަހިކޮށްދިނުން ކަމަށެވެ.

މި ފޮތް ޒުވާނުންގެ ޓީމަކުން ތައްޔާރުކޮށްފައިވާއިރު މި ފޮތުން އާންމުންނަށް ދޭން ބޭނުންވާ މެސަޖަކީ ޒުވާން އުމުރުފުރައިގެ ކުދިންނަށްވެސް ފަތުރުވެރިކަމުގެ ދާއިރާގައި މަސައްކަތް ކުރަން ބޭނުންވާ ކަމުގައިވާނަމަ އެ ފުރުސަތު ފަހިކޮށްދީ މަގު ދައްކަދޭނެ ބަޔަކު ތިބިކަން ކަމަށް ލޯކަލްޗާ އިން ބުންޏެވެ.

މި ފޮތް ހިލޭ ލިބިގެންދާއިރު ރާއްޖޭގައި އާއި ރާއްޖޭން ބޭރުގެ އެކި ފެއަރ ތަކުން ލިބިގެންދާނެއެވެ.