މަސްތުވާތަކެތީގެ ފަރުވާ ޕްރޮގުރާމްގައި ދެ ވަނަފަހަރަށް ބައިވެރިވާ މީހުންގެ އަތުން ފީ އެއް ނެގުމަށް ހުށަހަޅައިފި

މަސްތުވާތަކެތީގެ މައްސަލައަކާ ގުޅިގެން ޑްރަގު ކޯޓުގައި ދައުވާ އުފުލި މީހަކަށް ދެ ވަނަ ފަހަރަށް މަސްތުވާތަކެތީގެ ވަބާއިން ސަލާމަތްވުމަށް ކުރިއަށް ގެންދާ "ފަރުވާ" ޕްރޮގުރާމްގައި ބައިވެވޭނީ ފީ އެއް ދެއްކުމަށް ފަހު ކަމަށް ކަނޑައަޅަން ސަރުކާރުން ރައްޔިތުންގެ މަޖިލީހަށް ހުށަހަޅައިފި އެވެ. ސަރުކާރުގެ ފަރާތުން އައްޑޫ ފޭދޫ ދާއިރާގެ މެމްބަރު އިބްރާހިމް ދީދީ ރައްޔިތުންގެ މަޖިލީހަށް މި އިސްލާހް ގެނައުމަށް ހުށައަޅުއްވާފައި ވަނީ މަސްތުވާތަކެއްޗާއި ބެހޭ ގާނޫނަށް ގެނައުމަށް ހުށަހަޅާފައިވާ އިސްލާހްތަކުގެ ތެރޭގަ އެވެ.

އެ އިސްލާހްގައި ބުނެފައިވާ ގޮތުން ޑްރަގް ކޯޓުގެ ފަރުވާ ޕްރޮގުރާމް އެއް ފަހަރު ފުރިހަމަ ކޮށްފައިވާ ނުވަތަ ޕްރޮގުރާމް ފުރިހަމަ ނުކޮށް ހުއްޓާލާފައިވާ ފަރާތެއް ނަމަ ދެ ވަނަ ފަހަރަށް އެ ޕްރޮގުރާމްގައި ބައިވެރިވޭނީ ފީ އެއް ދައްކައިގެންނެވެ. އަދި އެ ފީ ކަނޑައަޅާނީ އެ ގާނޫނުގެ ދަށުން ހަދާ ނެޝަނަލް ޑްރަގް އެޖެންސީން ހަދާ ގަވައިދެއްގައި ކަމަށް ވެސް އެ އިސްލާހްގައި ބުނެފައިވެ އެވެ. ނޭޝަނަލް ޑްރަގް އެޖެންސީ މިހާރު ކުރިއަށް ގެންދާ މަސްތުވާތަކެތީގެ ފަރުވާ ޕްރޮގުރާމަށް އެއްވެސް ފީއެއް މިހާތަނަށް ނަގަމުން ނުދެ އެވެ.

އައްޑޫ ފޭދޫ ދާއިރާގެ މެމްބަރު އިބްރާހިމް ދީދީ:- އޭނާ ވަނީ މަސްތުވާތަކެތީގެ ގާނޫނަށް ބައެއް އިސްލާހްތައް ހުށަހަޅާފައި

މަސްތުވާތަކެއްޗާއި ބެހޭ ގާނޫނަށް ގެންނަށް ހުށަހަޅާފައިވާ އެހެން އިސްލާހްތަކުގެ ތެރޭގައި އެ ގާނޫނުގެ ދަށުން އުފައްދާފައިވާ ނޭޝަނަލް ޑްރަގު ކޮންޓްރޯލް ކައުންސިލުގައި ނެޝަނަލް ޑްރަގު އެޖެންސީ ބޯޑުގެ ޗެއާމަން އާއި ކޮމިޝަނަރ އޮފް ޕްރިޒަންސް ހިމެނުމަށް ހުށަހަޅުއްވާފައިވެ އެވެ. މިހާރު އެ ބޯޑުގައި ސަރުކާރުގެ އިސްވެރިންނާއި މިނިސްޓަރުން ހިމެނޭ ގޮތަށް 12 މެމްބަރުން ތިއްބަވަ އެވެ. ހަމަ އެހެންމެ ނޭޝަނަލް ޑްރަގު އެޖެންސީ ބޯޑުގައި އިސްލާމިކް މިނިސްޓްރީ އާއި މޯލްޑިވްސް ކަރެކްޝަނަލް ސާވީސް ތަމްސީލް ކުރާނެ މެމްބަރުން ތިބެން ޖެހޭ ގޮތަށް ޑްރަގް އެޖެންސީ ބޯޑާ ބެހޭ މާއްދާ ބަދަލު ކުރުމަށް ވެސް ވަނީ ހުށަހަޅުއްވާފަ އެވެ.

މީގެ އިތުރުން މަސްތުވާތަކެތީގެ މައްސަލަތަކުގައި ހިމެނޭ މީހުންގެ ތެރެއިން ވެސް ޑްރަގް ކޯޓަށް އިހްތިސާސް ނުހިނގާނެ މީހުންގެ ތެރެއިން ވަކި ބާވަތްތަކުގެ ކުށްތަކެއް ސާބިތުވާ މީހުން ހިމެނޭއިރު އ މާއްދާ އަށް ބަދަލުތަކެއް ގެނައުމަށް ވަނީ ހުށަހަޅާފަ އެވެ. މި ގޮތުން މިހާރު އެ ގާނޫނުގައި ހިމެނިފައިނުވާ ބައެއް ކުށްތައް ސާބިތުވެފައިވާ މީހުން ވެސް ޑްރަގު ކޯޓުގެ އިހްތިސާސް ނުހިނގާނެ ކަމަށް ކަނޑައެޅުމަށް އިތުރު ކުށްތަކެއް ހިމެނުމަށް ވަނީ ހުށަހަޅުއްވާފަ އެވެ.

މީގެ އިތުރުން ޑްރަގް އޮފެންޑަރ ޑިމާންޑް ސެންޓަރެއް ފުލުހުންގެ މުވައްސަސާއިން އުފައްދާ ހިންގަން ލާޒިމް ކުރާ ގޮތަށް އެ ގާނޫނަށް ވަނީ އިސްލާހް ހުށަހަޅާފަ އެވެ. އަދި އަދި މި ގޮތަށް ފާސްވެ ގާނޫނަކަށް ވާތާ 180 ދުވަސް ތެރޭގައި މި ސެންޓަރު އުފައްދަން ޖެހޭނެ ކަމަށް އެ އިސްލާހްގައި ބުނެފައިވާއިރު ސެންޓަރުގައި ހިންގާ ފަރުވާގެ ޕްރޮގުރާމް ކަނޑައަޅާ ހިންގާނީ ނޭޝަނަލް ޑްރަގު އެޖެންސީން ކަމަށް ވެސް އެ އިސްލާހްގައި ބުނެފައިވެ އެވެ. އަދި އޭގެ އިތުރުން އެ އެޖެންސީ ތަކުގައި މަސައްކަތް ކުރާނީ އެ އެޖެންސީ ދޫކުރާ ލައިންސް ލިބިފައިވާ ފަރާތްތަކުން ކަމަށްވެސް ބުނެފައިވެ އެވެ.