ރައީސް ޔާމިން ގެންދަވަނީ ސިޔާސީ ހަރަކާތްތަކަށް އެޅެން ހުރި ހުރިހާ ހުރަސްތަކެއް އެޅުއްވުމަށް މަސައްކަތް ކުރައްވަމުން: އަހުމަދު އީސަ
25 ޖޫން 2018 | ހޯމަ 08:24ސުލްހަވެރި ސިޔާސީ ހަރަކާތްތަކަށް ހުރަސްއަޅަނީ ގަދަބާރުން ވެރިކަން ދިފާއު ކުރެއްވުމަށް
ރައްޔިތުން މަޖިލީހުގެ ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސަ ވާހަކަ ދައްކަވަނީ...
ރައީސުލްޖުމްހޫރިއްޔާ އަބްދުލްﷲ ޔާމިން އަބްދުލްގައްޔޫމް ގެންދަވަނީ ސުލްހަވެރި ސިޔާސީ ހަރަކާތްތަކަށް އެޅެން ހުރި ހުރިހާ ހުރަސްތަކެއް އެޅުއްވުމަށް މަސައްކަތް ކުރައްވަމުން ކަމަށް ރައްޔިތުން މަޖިލީހުގެ ކެދިކުޅުދޫ ދާއިރާގެ ކުރީގެ މެންބަރު އަހުމަދު އީސަ ވިދާޅުވެއްޖެ އެވެ.
ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްވަމުން މެންބަރު އަހުމަދު އީސަ ވިދާޅުވީ ގަދަ ބާރުން ރައީސް ޔާމިންގެ ވެރިކަން ދިފާއު ކުރެއްވުމަށްޓަކައި ސުލްހަވެރި ސިޔާސީ ހަރަކާތްތަކަށް ވަރަށް ބޮޑަށް ހުރަސްއަޅާފައިވާ ކަމަށެވެ. ނަމަވެސް އެމްޑީޕީއަކީ އެއްވެސް އިރެއްގައި ގާނޫނާއި ހިލާފަށް މަސައްކަތަށް ހުރަސްއަޅާފާނެ ކަމަށްޓަކައި ކުރަން ޖެހޭ މަސައްކަތް ނުކޮށް ދޫކޮށްލައިގެން ތިބޭ ބައެއް ނޫން ކަމަށެވެ.
އަހުމަދު އީސަ ވިދާޅުވީ ސިޔާސީ ޕާޓީތައް އުފެއްދުމާއި ހިންގުމާއި ޕާޓީތަކުގައި ހަރަކާތްތެރިވުމާއި، މިފަދަ ހައްގުތަކަކީ ގާނޫނު އަސާސީގެ ދެވަނަ ބާބުން ކަށަވަރުކޮށްދީފައި ހުރި ވަރަށް މުހިންމު އަސާސީ ހައްގުތަކެއް ކަމަށެވެ. އޭނާ ވިދާޅުވީ މިހައްގުތައް ދޫކޮށްނުލާނެ ކަމަށާއި، ގާނޫނުން ލިބިދީފައިވާ ހައްގުގެ ތެރެއިން މަސައްކަތް ކުރާނެ ކަމަށެވެ. އަދި ހައްގުތައް ހޯދުމަށް ކުރަންޖެހޭ މަސައްކަތްތައް ވެސް ކުރާނެ ކަމަށެވެ.
މިމަހު ބާއްވާ އެމްޑީޕީގެ ކޮންގްރެސް ރައީސް ޔާމިންއަށް ނުހުއްޓުވޭނެކަން ފާހަގަކުރައްވައި އަހުމަދު އީސަ ވިދާޅުވީ އެމްޑީޕީގެ ޕްރައިމެރީ ވެސް ނުހުއްޓުވުނު ކަމަށެވެ. އަދި މިއަހަރުގެ ރިޔާސީ އިންތިޚާބުގައި އެމްޑީޕީގެ ކެންޑިޑޭޓަކު ވާދަކުރުން ވެސް ނުހުއްޓުވޭނެ ކަމަށް އޭނަ ވިދާޅުވި އެވެ.
" ޔާމިން ކިތަންމެ މަސައްކަތް ކުރިއަސް ކުރިއަށް އޮތް ރިޔާސީ އިންތިހާބެއްގައި ޔާމިން ބޭނުންވާހާ މަކަރެއް ހަދާކަށެއް އަޅުގަނޑުމެން ފުރުސަތެއް ނުދޭނަން. އިންސާފުގެ ކުޑަ މިންވަރެއް ހުއްޓަސް، ދިވެހިރާއްޖޭގެ ގާނޫނުތަކުގައި ބަޔާންކޮށްފައި އޮތް މިނިވަން އިންސާފުވެރި އިންތިހާބެއްގެ ކުޑި ފަށެއް ވެސް އަޅުގަނޑުމެންނަށް ލިބުނު ނަމަވެސް މިއިންތިހާބު ކާމިޔާބު ކުރާނަން. އިންތިޚާބު ބާއްވާފިއްޔާ އިންޚާބު ކާމިޔާބު ކުރާނަން" އަހުމަދު އީސަ ވިދާޅުވިއެވެ.
އަހުމަދު އީސަ ވިދާޅުވީ މިއަހަރުގެ ރިޔާސީ އިންތިޚާބަށް ފަހު ދެން އުފެދިގެން އަންނާނީ އެމްޑީޕީ އިސްވެ އޮވެ އުފައްދާ ސަރުކާރެއް ކަމަށާއި، ރައީސް ޔާމިންއަށް މިގައުމުން ދެން ޖާގަ ނުލިބޭނެ ކަމަށެވެ. އަދި ވިދާޅުވީ ފާއިތުވެދިޔަ ހަތަރު އަހަރު ދުވަހުގެ ތެރޭގައި ދިވެހި ރައްޔިތުންގެ އަތުން ނިގުޅައިގަނެ ހުރިހާ އިންސާނީ ހައްގުތައް ހޯދައިދޭނެ ކަމަށެވެ.
