ނޮވެމްބަރު މަހު އޮންނަ އެމެރިކާގެ ގާނޫނު ހަދާ މަޖިލީހުގެ މިޑްޓާމް އިންތިޚާބު ނިމެންދެން ވެރިކަން ކުރާ ރިޕަބްލިކަން ޕާޓީ އަށް ނިސްބަތްވެވަޑައިގަންނަވާ މެމްބަރުން, އެމެރިކާއަށް ހިޖުރަ ކުރާ މީހުންނާ ބެހޭ ބިލް ފާސްނުކޮށް މަޑުކުރުމަށް އެމެރިކާގެ ރައީސް ޑޮނަލްޑް ޓްރަމްޕް އިލްތިމާސްކުރައްވައިފިއެވެ.
އެމެރިކާގެ ރައީސް ކުރެއްވި ޓްވީޓެއްގައި އިތުރަށް ވިދާޅުވީ ނޮވެމްބަަރު މަހު އިތުރު ސެނެޓަރުންނާއި ކޮންގްރެސް މެމްބަރުން އިންތިޚާބު ވަންދެން ރިޕަބްލިކަން ޕާޓީގެ މެމްބަރުން ހިޖުރަވެރިންނާ ގުޅޭގޮތުން ވަގުތު ބޭކާރުނުކޮށް ތިބެން ޖެހޭ ކަމަށާއި، ޑިމޮކްރަޓިކް ޕާޓީއަށް ނިސްބަތްވާ ގާނޫނު ހަދާ މަޖިލީހުގެ މެމްބަރުން ކުޅެމުން ދަނީ ގޭމު ކަމަށެވެ. އަދި ޑިމޮކްރަޓިކް ޕާޓީގެ މެމްބަރުން އެތައް އަހަރެއްވީ ހިޖުރަވެރިންނާ ގުޅޭ މައްސަލަތައް ހައްލުކުރަން އެއްވެސް ނިޔަތެއް ނެތް ކަމަށެވެ.
ރައީސް ޓްރަމްޕް މިގޮތަށް ޓްވީޓް ކުރެއްވިއިރު ގާނޫނު ހަދާ މަޖިލީހަށް ނިސްބަތްވާ ރިޕަބްލިކަން ޕާޓީގެ މެމްބަރުން ގެންދަވަނީ ފުރިހަމަ ހިޖުރަވެރިންނާ ގުޅޭ ބިލެއް ފާސްކުރުމަށް ގާނޫނު ހަދާ މަޖިލީހުގައި ދަތިތަކެއް ކުރިމަތިކުރުވަމުންނެވެ. އެގޮތުން އެއް ދުވަސްތެރޭ ދެވަނަ ފަހަރަށް ހިޖުރަވެރިންނާ ގުޅޭ ބިލެއް ފާސްކުރުމަށް ރިޕަބްލިކަން ޕާޓީގެ މެމްބަރުން ވަނީ ވޯޓަށް އެހުން ފަސްކޮށްފައެެވެ. މީގެ އިތުރުން އެމެރިކާ އަށް ގާނޫނާ ހިލާފަށް އެތެެރެވާ އާއިލާތަކުގެ ކުޑަކުދިން އެ އާއިލާތަކާ ދުރުކުރުން ނިމުމަކަށް ގެނައުމުގެ ބިލެއްވެސް ގާނޫނު ހަދާ މަޖިލީހުގައި ދަނީ ފާސްކުރުމަށް މަސައްކަތް ކުރަމުންނެވެ.
ބޯޑަރު ހުރަސްކޮށް އެމެރިކާ އަށް ގަވާއިދާ ޚިލާފަށް ވަންނަ ފަރާތްތަކުގެ ތެރެއިން ކުޑަ ކުދިންނާއި އެ ކުދިންގެ މައިންބަފައިން ވަކިކުރުމުގެ ސިޔާސަތެއް ކަނޑައެޅުއްވުމަށް ފަހު އެ ސިޔާސަތު ކުރިއަށް ނުގެންދަން ރައީސް ޑޮނަލްޑް ޓްރަމްޕް ވަނީ ނިންމަވާފައެވެ. އާއިލާތައް ދެ ތަން ކުރުމުގެ ސިޔާސަތަށް ޓްރަމްޕް ނިމުން ގެންނަވާފައި މި ވަނީ ބައިނަލްއަގުވާމީ ގޮތުން ކުރިމަތި ކުރަމުން ދިޔަ ޕްރެޝަރާ ގުޅިގެންނެވެ.
އެމެރިކާ އަށް ހިޖުރަ ކުރާ ކުޑަކުދިންގެ ތެރެއިން 20،000 ކުޑަކުދިންނަށް ބޯހިޔާވަހިކަން ދިނުމަށްޓަކައި ހަތަރު އަސްކަރީ ބޭހެއްގައި އެކުދިން ބޭތިއްބުމުގެ އިންތިޒާމް ހަމަޖައްސަމުންދާ ކަމަށް ޕެންޓަގަން އިން ބުރާސްފަތި ދުވަހު ވިދާޅުވިއިރު، އެކުދިންނާ އެކު އެކުދިންގެ ބެލެނެވެރިންނަށް ބޯހިޔާވަހިކަން ދޭނެ ކަމެއް އަދި އެއްވެސް އިދާރާއަކުން ހާމަކޮށްފައެއް ނުވެއެވެ.
