ވައްކަމާއި ކޮރަޕްޝަނުގެ މައްސަލަތަކެއްގައި ސްޕެއިންގެ ރަސްގެފާނުގެ ޅިޔަނު، އިނާކީ އުރުޑުންގަރިން 5 އަހަރާއި 10 މަހަށް ޖަލަށް ލުމަށް ހުކުމް ކުރުމާ ގުޅިގެން އަމިއްލައަށް ގޮސް ޖަލުގައި ބަންދު ވެއްޖެއެވެ.

އިނާކީގެ މައްޗަށް ދަށު ކޯޓުން ކުރި ޙުކުމަށް ސްޕްރީމް ކޯޓުން ވަނީ ލުއިތަކެއް ގެނެސްދީފައެވެ. އެހެން ނަމަވެސް ހުކުމް ތަންފީޒުކުރަން ޖެހޭ މުއްދަތަށް ބަދަލެއް ގެނެސްފައެއް ނުވެއެވެ. އިނާކީއަށް ލިބުނު ލުއިތަކުގެ ތެރޭގައި އޭނާގެ ހުކުމް ތަންފީޒު ކުރަން ބޭނުންވާ ޖަލެއް އިޚްތިރު ކުރުމަށް ފަސް ދުވަހުގެ މުއްދަތެއް ވަނީ ދީފައެވެ. އަދި އެ ފަސް ދުވަސް ވަންދެން އޭނާ ހުންނާނީ ފުލުހުންގެ ދަށުގައި ނޫންކަން ވެސް ވަނީ ކަނޑަ އަޅާފައެވެ.

އިނާކީ ވަނީ އެ ފުރުސަތުގެ ބޭނުން ހިފާ، އަމިއްލައަށް ގޮސް ސްޕެއިންގެ އަވީލިއާ އަވަށުގައި ހުންނަ ބްރީވިއާ ޖަލުގައި އަމިއްލައަށް ގޮސް ބަންދުވެފައެވެ. 162 ގޮޅި ހުންނަ އެ ޖަލަކީ އަންހެނުންނަށް ޚާއްސަކޮށްގެން ހަދާފައި ހުރި ތަނަކަށްވީ ނަމަވެސް ފިރިހެނުން ބޭތިއްބޭނެ އިމެއް ޖަލުތެރޭގައި ވަނީ ހަދާފައެވެ. ބެލެވޭ ގޮތުގައި އިނާކީ އެ ޖަލު އީޚްތިޔާރު ކުރީ އެ ތަން މެޑްރިޑާ ކައިރި ވީމައެވެ. މެޑްރިޑަކީ އޭނާގެ އަންހެނުން، ސްޕެއިންގެ ރަސްގެފާނުގެ ދައްތަ ޕްރިންސަސް ކްރިސްޓީނާ އުޅޭ ގަނޑުވަރު ހުންނަ ސަރަހައްދެވެ.

އިނާކީގެ މައްޗަށް ސާބިތުވެފައިވާ ކުށްތަކުގެ ތެރޭގައި ޓެކްހަށް މަކަރުހެދުމާއި ސަރުކާރުން އެވޯޑްކުރާ ކޮންޓްރެކްޓްތަކަށް ނުފޫޒު ފޯރުވުމާއި ގަވާއިދާ ޚިލާފަށް ހިންގާ ހަރަކާތްތަކުން ލިބޭ ލާރި ބޭރު ގައުމް ތަކުގައި ފޮރުވުން ހިމެނެއެވެ.

މިއާއެކު މިދުވަސްވަރު ދިމާ ވަމުންދާ ހާދިސާތަކާ ގުޅިގެން، އާންމުންގެ މެދުގައި ސްޕެއިން ސަރުކާރަށް އޮތް މަގުބޫލުކަން ވެސް ވަނީ ވަރަށް ބޮޑަށް ވެއްޓިފައެވެ. އެންމެބޮޑު ހާދިސާއެއް ކަމަށް ބެލެވެނީ ރަސްގެފާނުގެ ޅިޔަނު ކުރި ކަންތަކަށް ބަސް ނުބުނެ ހުއްޓާ، އެތް މެރުމުގެ ފޯރީގައި ރަސްގެފާނުގެ މިތުރުންނާ އެއްކޮށް އުޅުއްވާކަން އެގުމުންނެވެ.