އައްޑޫގައި އަޅާ އާ ޓާޝިއަރީ ހޮސްޕިޓަލް ފުރަތަމަ ހުޅުވާނީ ބައެއް ޚިދުމަތަކާ އެކު: ހެލްތު
19 ޖޫން 2018 | އަންގާރަ 10:03އޮކްޓޫބަރުގައި ހޮސްޕިޓަލް ނިމޭނެ
އިކުއިޓޯރިއަލ ކޮންވެންޝަން ސެންޓަރ: އާ ހޮސްޕިޓަލް ޤާއިމް ކުރަނީ އެ އިމާރާތުގައި
ސާކް ސަމިޓަށް އައްޑޫގައި ޤާއިމްކުރި އިކުއިޓޯރިއަލް ކޮންވެންޝަން ސެންޓަރު (އީސީސީ) ގައި ތަރައްޤީ ކުރާ 100 އެނދުގެ ޓާޝިއަރީ ހޮސްޕިޓަލް ހުޅުވާއިރު އެތަނުން ލިބޭނީ ބައެއް ޚިދުމަތްތައް ކަމަށް ހެލްތު މިނިސްޓްރީން ބުނެފިއެވެ.
އޮންލައިން ނޫހަކަށް ދެއްވި އިންޓަރވިއުއެއްގައި ހެލްތު މިނިސްޓްރީގެ ޑެޕިއުޓީ މިނިސްޓަރ މުހައްމަދު ރަފީގު ހުސެއިން ވިދާޅުވެފައި ވަނީ ހޮސްޕިޓަލަށް ބޭނުންވާ ޑޮކްޓަރުން ހޯދުމުގެ މަސައްކަތް ކުރާނީ ހޮސްޕިޓަލް ހުޅުވުމާ ގާތްކޮށްލާފައި ކަމަށާއި ހޮސްޕިޓަލް ފުރަތަމަ ފަށާނީ ހުރިހާ ހިދުމަތްތަކާ އެކުގައި ނޫން ކަމަށެވެ. އަދި ޚިދުމަތްތައް ތަޢާރަފް ކުރަމުން ގެންދާނީ ވަކިވަކިން ކަމަށް އޭނާ ވިދާޅުވިއެވެ.
ރަފީޤް ވިދާޅުވެފައި ވަނީ ހޮސްޕިޓަލްގެ މަސައްކަތް އޮކްޓޫބަރ އަށް ނިމި ތަނަށް ބޭނުންވާ ސާމާނު އޮކްޓޫބަރުގެ ކުރިން ލިބޭނެ ކަމަށެވެ.
އޭނާ މިހެން ވިދާޅުވިއިރު މީގެ ކުރިން ސަރުކާރުގެ އިސްވެރިން ވަނީ އައްޑޫގައި ޤާއިމްކުރެވޭ ހޮސްޕިޓަލުން ޒަމާނީ ހުރިހާ ވަސީލަތެއް ލިބޭނެ ކަމަށް ވިދާޅުވެފައެވެ. އެގޮތުން ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެފައި ވަނީ، އައްޑޫގައި ހަދަމުން އަންނަ އާ ހޮސްޕިޓަލް ނިންމައި ހިދުމަތް ދޭން ފަށާއިރު، ވެރި ރަށް މާލޭން ނުލިބޭ ސިއްހީ ހިދުމަތް އައްޑޫން ލިބޭނެ ކަމަށެވެ.
